ސަރުކާރުގެ ސިޔާސަތުތައް ތަންފީޒުކުރުމަށް ދެކޮޅު ހައްދަވާ ސިޔާސީ މަޤާމްތަކުގައި ތިއްބެވި ބެފުޅުން މަޤާމުން ވަކި ކުރި ނަމަވެސް، ސަރުކާރުގެ ސިޔާސަތުތަކާއި ދެކޮޅު ނުހައްދަވާހާހިނދަކު، ސިޔާސީ އެއްވެސް މަޤާމަކުން އެއްވެސް ބޭފުޅަކު ވަކި ނުކުރައްވާނެކަމަށް ރައީސް އޮފީހުގެ ތަރުޖަމާނު މިޢުވާން މުޙައްމަދު ވިދާޅުވެއްޖެއެވެ.
ރައީސް އޮފީހުގައި ނޫސްވެރިންނަށް މައުލޫމާތު ދެއްވަމުން ރައީސުލްޖުމްހޫރިއްޔާގެ އޮފީހުގެ ތަރުޖަމާން މިޢުވާން މުޙައްމަދު ވިދާޅުވީ ސަރުކާރުގެ އެއްވެސް ވަޒީފާއެއްގައި ހުރި އެއްވެސް މީހަކަށް ސަރުކާރުން ވަޒީފާގެ ބިރު ނުދައްކާނެކަމަށެވެ. އަދި ކުރީގެ ސަރުކާރުގައި ވަޒީފާގެ ބިރު ދެއްކިނަމަވެސް، މިސަރުކާރުން އެގޮތަށް ޢަމަލު ނުކުރާނެކަމުގެ ޔަގީންކަން މިއުވާން ދެއްވިއެެވެ.
މިއުވާން ވިދާޅުވީ ސިޔާސީ މަޤާމުތަކަށް މީހުން އައްޔަންކުރައްވަނީ ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރާއި އިޚްތިޔާރުގެ ތެރެއިންކަމަށެވެ. އަދި އެ މަޤާމުތަކުގައި ތިއްބަވާ ބޭފުޅުން ސަރުކާރުގެ ސިޔާސަތުތައް ތަންފީޒްކުރުމާއި ރައީސުލްޖުމްހޫރިއްޔާ ހަވާލުކުރައްވާ މަސައްކަތްތައް ކުރެއްވުމަކީ އެބޭފުޅުންގެ ޒިންމާއެއްކަމަށް މިއުވާން ވިދާޅުވިއެވެ.
މިއުވާން ވިދާޅުވީ ރައީސުލްޖުމްހޫރިއްޔާ އައްޔަންކުރައްވާފައިވާ މަޤާމެއްގައި ހުންނަވާ ބޭފުޅަކު ޒިންމާތަކާއި ވަޒީފާގެ މަސްޢޫލިއްޔަތުތައް އަދާނުކުރައްވާނަމަ، އެ ބޭފުޅަކު ވަކިކުރުމުގެ ބާރު ރައީސުލްޖުމްހޫރިއްޔާއަށް ލިބިވަޑައިގަންނަވާނެކަމަށްވެސް މިއުވާން ވިދާޅުވިއެވެ.
"ހެނދުނު ނިކުމެ ސަރުކާރުގެ ސިޔާސަތުތައް ތަންފީޒުކުރަން އުޅެފައި، ރޭގަނޑު އެހެން ފިކުރެއްގެ މީހުންނާއެކު ނިކުމެ، ހެނދުނު އެ ތަންފީޒްކުރަން އުޅުނު ސިޔާސަތު ގޯސްކޮށް ވާހަކަ ދައްކާކަމަށްވާނަމަ، އެއްގޮތުން ދަންނަވާނަމަ އެމީހަކު ސިޔާސީ ކަންކަމަށް ލޯ ނުހުޅެވެނިއްޔޭ ނުވަތަ މަޤާމުގަ އެބޭފުޅަކު ހުރުމުގެ ބޭނުން އެ ކެނޑެނިއްޔޭ. ސިޔާސީ މަޤާމުތަކަކީ ޢާންމު ވަޒީފަތަކަށް އުސޫލްތައް ހިނގާ މަޤާމުތަކެއް ނޫން." މިއުވާން ވިދާޅުވިއެވެ.
މިއުވާން ވިދާޅުވީ ޢާންމު ވަޒީފާތަކާއި ސިވިލް ސާރވިސް ވަޒީފާގައި ތިބި މުވައްޒަފުންނަށް ވަޒީފާގެ ކަށަވަރުކަން ޤާނޫން ލިބިދީފައި އޮންނަކަމަށެވެ. އަދި ސިޔާސީ ފިކުރު ހުރިގޮތަކުން އެފަރާތްތަކަށް ސަރުކާރުން ފިޔަވަޅު ނާޅާނެކަމުގެ ޔަޤީންކަން މިއުވާން ދެއްވިއެވެ.
ޖުމްހޫރީ ޕާޓީން ރިޔާސީ އިންތިޚާބަށް ނިކުމެއްޖެނަމަ އެކަމުގައި ޖޭޕީއާއެކު މަޝްވަރާކޮށް، އެ ޕާޓީގެ ފަރާތުން ސަރުކާރުގައި ތިއްބެވި ބޭފުޅުންނާމެދު އަމަލުކުރާނެ ގޮތަކާއި މެދު މަޝްވަރާކޮށް ގޮތެއް ނިންމަވާނެކަމަށް ވެސް މިޢުވާން ވިދާޅިވިއެވެ.
