އެމްޑީޕީގެ ރައީސް، ރައީސް ނަޝީދަށް އެންމެ ރަނގަޅު ގޮތަކީ އަދިވެސް ރައީސް ޞާލިޙުގެ ފަހަތުގައި ކުރިއަށް ދިއުންކަމަށާ، އެފުރުސަތު އަދިވެސް އެބައޮތްކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.
އޭނާ ވިދާޅުވީ މިހާރު ޙާލަތު އޮތްގޮތުން ރައީސް ނަޝިދު އަރުއްވާނެ ގޮޅިއެއް ނެތްކަމަށެވެ. އެވިދާޅުވާ ހަކުޅި ކުރިއަށް ކުޅުއްވެންވެސް އޮތީ ޤާސިމް އިބްރާހީމްގެ ދީލަތިކަމުގެ ސަބަބުންކަމަށެވެ. އަދި ނަޝީދާއި އޭނާގެ ފިކުރެއްގެ ދިރުމުގެ މުސްތަޤުބަލެއް އޮތީވެސް ޤާސިމް ދެއްވާ ދީލަތި ފުރުސަތެއްގެ ތެރެއިންކަމަށެވެ.
އަދިވެސް ނަޝީދާއި ފިކުރެއްގެ ދިރުމަށް ނިސްބަތްވާ އެމްޑީޕީ މެމްބަރުންނަށް އޮތް އެންމެ ރަނގަޅުގޮތަކީ ރައީސް ޞާލިޙާއެކު އެމްޑީޕީގައި ކުރިއަށް ދިއުންކަމަށް މަވޯޓާ ވިދާޅުވިއެވެ. އަދިވެސް ފުރުސަތު ނުގެއްލޭކަމަށާ، ގޮސްދޫކޮށް ޕާޓީގެ މެޖޯރިޓީން ނިންމާފައިވާ ނިންމުމާއެކު ކުރިއަށް ދިއުމަށް ފުރުސަތު އެބައޮތްކަމަށް އޭނާވިދާޅުވިއެވެ. އެހެންނަމަވެސް ނަޝީދާއި ފިކުރެއްގެ ދިރުމުން ފެންނަނީ ގޮތް ދޫނުކޮށް ހަސަދަވެރިކަމާއެކު ތިބި މަންޒަރުކަމަށް މަވޯޓާ ވިދާޅުވިއެވެ.
Adhives @MohamedNasheed ah ves FIkureggeDhirun ah ves oi emme ragalhu gothakee @MDPSecretariat ge nimmun thakah ihthiraam koh Party candidate fahathah erun. MDP aa eku kuyyah dhiun. E furusath adhives eba oi.Ehenas zaathee hasadhayaa rulhiverikan iskuraa than mifennanee.
— Ibrahim Shareef (@AdduShareef) April 1, 2023
އަންނަ ރިޔަސީ އިންތިޚާބުގައި އެމްޑީޕީގެ ރިޔާސީ ޓިކެޓު ހޯއްދެވުމަށް ރައީސް ނަޝީދު ވަނީ އެޕާޓީގެ ރިޔާސީ ޕްރައިމެރީގައި ރައީސް ޞާލިޙާ ވާދަކުރައްވައި ބަލިވެވަޑައިގެންފައެވެ. ތަނަވަސް އަޣުލަބިއްޔަތަކުން ޕްރައިމެރީ ކާމިޔާބުކުރެއްވީ ރައީސް ޞާލިޙެވެ. އެހެންނަމަވެސް ނަޝީދު އެ ނަތީޖާއެއް ޤަބޫލެއް ނުކުރައްވައެވެ. އޭނާ ވިދާޅުވީ އޮންތިޚާބު އޮޅުވާލީކަމަށެވެ. އެހެންކަމުން އިންތިޚާބަށްފަހު ނަޝީދު އަންނަނީ ރައީސް ޞާލިޙާ ދެކޮޅަށް މަސައްކަތްކުރައްވަމުންނެވެ. އަންނަ ރިޔާސީ އިންތިޚާބުގައި ރައީސް ޞާލިޙާ ދެކޮޅަށް ޤާސިމް އިބްރާހީމާއެކު މަސައްކަތް ކުރައްވަން ނަޝީދުވަނީ ނިންމަވާފައެވެ. އަދި ނަޝީދު އުފައްދަވާފައިވާ ސިޔާސީ ޙަރަކާތް ފިކުރެއްގެ ދިރުމުން އަންނަނީ ޖުމްހޫރީ ޕާޓީއާއެކު މަސައްކަތް ކުރަމުންނެވެ.
