މިދުނިޔޭގައި އާފިލްވެފައި ތިއްބާ، އިންޒާރެއްނެތި ކުއްލިއަކަށް މަރާއި ކުރިމަތިލާން ޖެހި، ހެޔޮކަމުގެ ފުރުސަތު ގެއްލިދާނެކަމަށާއި، އެއަށްފަހު ދެން ކިތަންމެ ބޭނުންވިޔަސް ހެޔޮ ޢަމަލު ކުރާނެ ފުރުސަތު ނުލިބޭނެ ކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
"މިއީ ޙަޔާތުގެ އެންމެ ފަހު ރަމަޟާންމަހަށް ވެދާނެއެވެ." މިމައުޟޫއަށް ޚާއްސަ ކުރެވިގެންދިޔަ ޚުޡުބާގައިވަނީ، އެހެންކަމުން ސަލަފުއް ޞާލިހުންގެ ޙަޔާތްޕުޅުން ޢިބުރަތް ލިބިގަނެ ހެޔޮކަމުގައި ހީވާގިވުމަށް ގޮވާލައްވާފައެވެ.
މުސްލިމް އަޚުންނޭވެ! ހެޔޮކަމުގެ މޫސުންތަކުގައި ހެޔޮކަމުގައި އުޅުމަށް ލިބޭ ފުރުސަތަކީ ފިސާރިކުޑަ، އެހާމެ އަގުބޮޑު ހިނދުކޮޅެކެވެ. އޭގެ އަގު ވަޒަން ކުރެވޭނީ، އެ ފުރުސަތުން މަހުރޫމުވާނެ ވަގުތުކަމުގައިވާ މަރު އަހަރެމެންނާ ބައްދަލު ކުރީމައެވެ. އެ ހިނދު، ހެޔޮކަމުގެ ފުރުސަތަކަށް އެދި އިންސާނާ އާދޭސް ދަންނަވާނެއެވެ. އެދުވަހުން ތައުބާވެ، ނަމާދުކޮށް، ޞަދަގާތްކޮށް، މީސްތަކުންނަށް ހެޔޮފޯރުވާން އޭނާ ކިތަންމެހައިވެސް ބޭނުންވާނެއެވެ. ހެޔޮގޮތުގައި ރަމަޟާންމަހު ރޯދަހިފާ، ކީރިތި ޤުރުއާން ކިޔަވައި، ރޭއަޅުކަންކޮށް، ލައިލަތުން ޤަދުރީގެ މަތިވެރި ސަވާބު ހޯދަން އޭނާ ދަހިވެތި ވާނެއެވެ. ނަމަވެސް ވަގުތު އެވަނީ ފާއިތުވެފައެވެ. އެދުވަހުން ކިތަންމެ ހިނދުކޮޅެއްވެސް ނުދެވޭ ހުއްޓެވެ.
މިއަދު ޚުޡުބާގައި ވިދާޅުވެފައި ވެއެވެ.
ޚުތުބާގައި ވިދާޅުވި ގޮތުގައި، ދަންނަ އެއްފުރާއިގެ ޒުވާނުންކުރެ މިވަގުތީ ހަޔާތާއި އެތައް ބަޔަކު ވަނީ ފާއިތުވި ރަމަޟާން މަހަށްފަހުވެސް ވަކިވެފައެވެ. އެތައް ޒުވާނަކަށް މަރާއި ކުރިމަތިލާ، ތައުބާވުމުގެ ފުރުސަތު ވަނީ ގެއްލިފައެވެ. އެއްހާސް މައްސަރަށްވުރެ ހެޔޮކަން ބޮޑު، ލައިލަތުންޤަދުރި ހޯދުމުގެ މަތިވެރި ނިޢުމަތުން ވަނީ މަޙުރޫމް ވެފައެވެ.
މާތް اللهގެ އޯގާވަންތަ ކަމުން، ތިބާ ތިޔަވަނީ އަދި މިދުނިޔޭގައެވެ. ބަރަކާތްތެރި ރަމަޟާންމަހުގެ ހިޔަލުގައެވެ. މިއީ ތިބާ ތައުބާވުމަށް އޮތް އެންމެ ފަހުގެ ފުރުސަތު ކަމުގައި ވެދާނެއެވެ. މާދަމާ އަހުރެންވެސް އަދި ތިބާވެސް އެ ނިޢުމަތުން މަޙުރޫމް ވެދާނެއެވެ.
ޚުޡުބާގައި އިތުރަށް ވިދާޅުވެފައި ވެއެވެ.
މިއަދު ޚުތުބާގައިވަނީ ރަމަޟާންމަހުގެ ނިދާއަށް އިޖާބަދީ، ޢާފިލްކަމުގެ ނިދިން ހޭލައި، ހެޔޮކަމުގެ މޫސުމާއި ކުރިމަތިލުމަށް ގޮވާލައްވާފައެވެ. އަދި ފަރުޟު ފަސްނަމާދަށް ރައްކާތެރިވެ، މައިންބަފައިންނަށް ހެޔޮކޮށް ހިތާ، އަނބި ދަރީންގެ ޙައްގުތައް އަދާކޮށް، ރަމަޟާންމަހުގެ ތަރުބަވީ މަދުރަސާއިން ފިލާވަޅު ލިބިގަތުމަށްވެސް ނަސޭހަތްތެރި ވެފައި ވެއެވެ.