ރާއްޖޭގެ ދާޚިލީ އަމަން އަމާންކަމާއި ހަމަޖެހުން ދެމެހެއްޓުމުގައި ފުލުހުން މިހާތަނަށް އަދާކޮށްފައިވަނީ ވަރަށް މަތިވެރި ދައުރެއް ކަމުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
ފުލުހުންގެ ޚިދުމަތުގެ 90 ވަނަ އަހަރީ ދުވަހުގެ ތަހުނިޔާ ފުލުހުންނަށާއި ފުލުހުންގެ އާއިލާތަކަށް ފޮނުވައި ޤާސިމް ވިދާޅުވީ ދިވެހި ފުލުހުންނަކީ ރާއްޖޭގެ އަމަން އަމާންކަމާއި ސުލްހަ މަސްލަހަތު ގާއިމް ކުރުމުގައި އެންމެ ބުރަމަސައްކަތް ކުރަމުންދާ މުއައްސަސާ ކަމަށެވެ. އެބޭފުޅުންގެ ގުރުބާނީއަކީ ތާއަބަދު ފެންނާނެ ގުރުބާނީއެއްކަމަށް ޤާސިމް ވިދާޅުވިއެވެ.
ދިވެހި ފުލުހުންގެ ޚިދުމަތުގެ 90 ވަނަ އަހަރީ ދުވަހުގެ ތަހުނިޔާ ފުލުހުންނަށާއި، ފުލުސް އާއިލާތަކަށް އަރިސްކުރަން. ޝައްކެތް ނެތް ގޮތުގައި ރާއްޖޭގެ ދާޚިލީ އަމަން އަމާންކަމާއި ހަމަޖެހުން ދެމެހެއްޓުމުގައި ފުލުހުން މިހާތަނަށް އަދާކޮށްފައިވަނީ ވަރަށް މަތިވެރި ދައުރެއް.
– ފުލުހުންނަށް ތަހުނިޔާ ފޮނުވަމުން ޤާސިމް ވިދާޅުވިއެވެ.
ދިވެހިރާއްޖޭގައި ފުލުހުންގެ ޚިދުމަތް ރަސްމީގޮތުން ފެށިފައިވަނީ 1933 ވަނަ އަހަރުއެވެ. އެއީ ދިވެހިރާއްޖޭގައި ފުރަތަމަ ފަހަރަށް ޤާނޫނު އަސާސީ އެކުލަވާލައި، އެޤާނޫނު އަސާސީގައި ކަނޑައަޅާފައިވާ ފަދައިން އޭރު ހުންނެވި ރަދުން އައްޞުލްޠާން މުޙައްމަދު ޝަމްސުއްދީންގެ ރަސްކަމުގައި 1933 ވަނަ އަހަރު މާރޗް 29 ވަނަ ދުވަހުއެވެ.
ފުލުހުންގެ ޚިދުމަތް ސިފައިންގެ ޚިދުމަތާއެކު އެއް މުއައްސަސާއެއްގެ ދަށުން ދެމުން އައިސް ސިފައިންނާއި ފުލުހުންގެ ޚިދުމަތް ވަކި ޚިދުމަތެއްގެ ގޮތުގައި ދޭން ސަރުކާރުން ހަމަޖެއްސީ 2004 ވަނަ އަހަރުގެ ސެޕްޓެމްބަރުމަހުގެ ފުރަތަމަ ދުވަހުއެވެ. ފުލުހުންގެ ޚިދުމަތަށް މިއަހަރު 90 އަހަރު ފުރޭއިރު، ފުލުހުންގެ މުޢައްސަސާއަށް މުހިންމު ހެޔޮ ބަދަލުތަކެއް ގެނައުމަށް ދަނީ ގިނަ މަސައްކަތްތަކެއް ކުރަމުންނެވެ. ޤާނޫނުތަކާއި ގަވާއިދުތަކާއި އުސޫލުތަކަށް ޒަމާނާއެއްގޮތަށް ބަދަލު ގެންނަމުންނެވެ.
