ޖުޑީޝަލް ސާވިސް ކޮމިޝަން (ޖޭއެސްސީ) އަށް މިދިޔަ އަހަރު ފަނޑިޔާރުންނާ ގުޅޭ ގޮތުން ހުށަހެޅި ޝަކުވާތަކުގެ ތެރެއިން މަދު މައްސަލައެއް ބަލަން ކޮމިޝަނުން ނިންމަން ޖެހުނީ، ފަނޑިޔާރުންގެ ސުލޫކަށް ހެޔޮ ބަދަލުތަކެއް އައުމާ ގުޅިގެން ކަމަށް އެ ކޮމިޝަންގެ ރައީސް ހިސާން ހުސައިން ވިދާޅުވެއްޖެއެވެ.
ޖޭއެސްސީން އިއްޔެ ނެރުނު އެ ކޮމިޝަންގެ މިދިޔަ އަހަރުގެ އަހަރީ ރިޕޯޓުގައި ހިސާން ވިދާޅުވެފައިވަނީ މިދިޔަ އަހަރު ފަނޑިޔާރުންނާ ގުޅޭ 392 މައްސަލައެއް އެ ކޮމިޝަނަށް ހުށަހެޅިޔަސް، އެ ކޮމިޝަނުން ބަލަން ނިންމާފައި އޮތީ 15 މައްސަލައެއް ކަމަށެވެ. ހިސާން ވިދާޅުވެފައިވާ ގޮތުގައި އެއީ ފަނޑިޔާރުންގެ ސުލޫކަށް ހެޔޮ ބަދަލެއް އައިސްފައިވާ ކަމުގެ ހެއްކެކެވެ.
އަހަރީ ރިޕޯޓުގައި ހިމަނާފައިވާ ހިސާންގެ ލިޔުމުގައިވާ ގޮތުން، އޭނާ ދެކެވަޑައިގަންނަވާ ގޮތުގައި ބަލަން ނިންމި މައްސަލައިގެ ނިސްބަތް މަދުވުމަކީ ފަނޑިޔާރުންގެ ސުލޫކަށް ހެޔޮ ބަދަލުތަކެއް އައިސްފައިވާ ކަމުގެ ހެއްކެއް ކަމުގައެވެ.
2022 ވަނަ އަހަރު ބަލަން ނިންމުނު މައްސަލަތަކުގެ އިންސައްތަ ދަށްވުމީ، ފަނޑިޔާރުންގެ ސުލޫކަށް ހެޔޮ ބަދަލުތަކެއް އައިސްފައިވާ ކަމުގެ ހެއްކެކެވެ.
– ހިސާންގެ ލިޔުއްވުމުގައިވެއެވެ.
ހިސާން ވިދާޅުވެފައިވަނީ އެ ކޮމިޝަނުުން ނުބަލަން ނިންމި މައްސަލަތަކުގެ އަދަދު އިތުރު ވިޔަސް، އެކަންކަން ޝަރުއީ ނިޒާމުގެ ތެރެއިން ހައްލުކުރަން އެކަށީގެންވާ މަސައްކަތްތަކެއް އެ ކޮމިޝަނުން ކޮށްފައިވާ ކަމަށެވެ. އަދި މިދިޔަ އަހަރަކީ ކޮވިޑް-19 އަށްފަހު އެންމެ ބޮޑު ކުރިއެރުމެއް ލިބުނު އަހަރު ކަމަށް އޭނާ ވިދާޅުވިއެވެ.
އޭގެ އިތުރަށް، ހުށަހެޅިފައިވާ ޝަކުވާއަކާ ގުޅިގެން ޝަރުއީ ނިޒާމުގެ ތެރެއިން އަދި ފަނޑިޔާރު ހަވާލުވެފައިވާ ޝަރީއަތް މެދުވެރިކޮށް ރަނގަޅު ކުރެވެން ހުރި ކަންކަމުގައި، ކޮމިޝަނުން މައްސަލަ ބެލުމުގެ ބަދަލުގައި ޝަރީއަތް މެދުވެރިކޮށް ރަނގަޅު ކުރުމަށް ބާރު އަޅުވާފައިވާނެ ކަމަށް ވެސް ހިސާން ވިދާޅުވެފައިވެއެވެ.
ޖޭއެސްސީގެ ތަފާސް ހިސާބުތައް ދައްކާ ގޮތުން މިދިޔަ އަހަރު 392 މައްސަލައެއް ހުށަހެޅިއިރު، 2021 ވަނަ އަހަރު ބާކީ ހުރި މައްސަލަތަކާ އެކު 434 މައްސަލައެއް އެ ކޮމިޝަނުން ބެލި އެވެ. އޭގެ ތެރެއިން 379 މައްސަލައެއް ނުބަލަން ނިންމާފައިވެއެވެ. ތަހުގީގުކުރަން ފެށީ ކުރީ އަހަރުގެ މައްސަލަތަކާ އެކު 17 މައްސަލައެއް ކަމަށް ވިޔަސް، މިދިޔަ އަހަރު ނިންމީ އެންމެ ހަ މައްސަލައެވެ. އަދި 38 މައްސަލައެއް އިތުރަށް ދަނީ ދިރާސާ ކުރަމުންނެވެ.
