އެސްޓީއޯގެ މެނޭޖިން ޑިރެކްޓަރުކަމާއި ބޯޑު ޑިރެކްޓަރު ކަމާއި ސީއީއޯ ކަމުގައި ހުންނެވި ހުސައިން އަމްރު އެ މަގާމުތަކުން ވަކިކުރުމުން އެމްޑީޕީގެ ރައީސް މުޙައްމަދު ނަޝީދު އޭނާ އެމަޤާމުތަކުގައި ހުންނަވައިގެން މިހާތަނަށް ކުރެއްވި މަސައްކަތްޕުޅުތައް ފާހަގަކުރައްވައި ޝުކުރު އަދާކުރައްވައިފިއެވެ.
އަމްރު މަޤާމުން ވަކުކުރިކަން ހާމަކުރައްވައި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން ވަނީ ޓްވީޓުކުރައްވާފައެވެ. އަމްރު ވަކިކުރެއްވީ އޭނާ ވަކިކުރައްވަފާނެކަމަށް ވަރަށްގިނަބަޔަކު ބުނަމުންދަނިކޮށެވެ. މިހާރު ދެބައިވެފައިވާ ވެރިކަންކުރާ ޕާޓީ އެމްޑީޕީގެ މެމްބަރު ޙުސައިން އަމްރަކީ އެޕާޓީގެ ރައީސް ނަޝީދު ފެކްޝަނުގެ އިސް މެމްބަރެކެވެ. ނަޝީދުގެ ފަރާތުން އެފެކްޝަނުގެ އެކިއެކި ކަންކަމައި ބައްދަލުވުންތަކުގައި އެންމެ އިސް ދައުރެއް އަދާކުރާ އެއް ބޭފުޅަކީވެސް އަމްރެވެ. އެހެންކަމުން އެމްޑީޕީގެ އެތެރެއިން ޚާއްސަކޮށް ރައީސް ޞާލިޙަށް ތާޢީދުކުރާ މީހުންގެ ނުރުހުން އަމްރަށް ވަނީ އަމާޒުވެފައެވެ. އަދި ރައީސް ޞާލިޙާ ދެކޮޅަށް މަސައްކަތް ކުރައްވާނަމަ އެސްޓީއޯގެ އެންމެ އިސް މަޤާމުތަކުގައި ހުންނަވައިގެން އެކަންކުރެއްވުމަކީ ކޮށްގެންވާނެކަމެއް ނޫންކަމަށް އެމީހުން ދެކެއެވެ. އަދި އަމްރުގެ އިސްތިއުފާއަށްވެސް އެމްޑީޕީގެތެރެއިން އައީ ގޮވަމުންނެވެ.
އަމްރު މަޤާމުން ވަކިކުރެއްވުމާ ގުޅިގެން ރައީސް ނަޝީދު ކުރެއްވި ޓުވީޓުގައި ވިދާޅުވެފައިވަނީ ސަރުކާރުގެ އެހެން ކުންފުނިތަކާ އަޅާބަލާއިރު، އެސްޓީއޯ އިންވަނީ މިދިޔަ ހަތަރު އަހަރު އަމްރުގެ ލީޑަޝިޕްގައި ރަނގަޅު ނަތީޖާއެއް ނެރެފައިކަމަށެވެ. ކުންފުނީގެ ފައިދާ ބޮޑުކަމަށާ، ތަކެތީގެ އަގު އުފުލުނަ ނުދީ ހިފެހެއްޓިކަމަށާ، އަދސި ކޮވިޑްގެ ހާލަތުގައި ވެސް ރަށްރަށް ކާޑަށް ނުޖެހި ހިފެހެއްޓުމުގައި އެސްޓީއޯގެ ދައުރު ބޮޑުކަން ނަޝީދު ފާހަގަކުރެއްވިއެވެ.
Midhiya 4 aharakee STO ragalhu natheeja nerunu aharuthakeh. Sarukaaru hissaava ehen kunfunithakai alhakiyalumun saafuvane.Kunfuneege faidha bodu ehenas thaketheege agu ufuluna nudhee hifehetti. Covid ge haalathugaves rahrah kaadah nujehi hifehetti @HusenAmr ah marhaba aai shukur
— Mohamed Nasheed (@MohamedNasheed) March 26, 2023
އެސްޓީއޯގެ މަގާމުތަކަށް ޕީސީބީން އަމްރު އައްޔަންކުރީ ނޮވެމްބަރު 18، 2018 ގައެވެ. އަމްރު މަގާމުން ވަކިކޮށް މެނޭޖިން ޑިރެކްޓަރު އައްޔަން ކުރެވެން ދެން އެސްޓީއޯގެ ހިންގުން ވަގުތީ ގޮތުން ހަވާލުކުރަން ޕީސީބީން ނިންމާފައިވަނީ އެ ކުންފުނީގެ ސީއެފްއޯ މުހައްމަދު ނިޒާމުއާއެވެ.
