ސައިބާ ކްރައިމްއާއި ގުޅުންހުރި އަމަލުތަކަކީ ކުށެއްގެ ގޮތުގައި ކަނޑައެޅުމަށް ގާނޫނުލްއުގޫބާތަށް ހުށަހަޅާފައިވާ އިސްލާހު މަޖިލީހަށް ބަލައިގެންފިއެވެ.
ސަރުކާރުގެ ފަރާތުން، ހެންވޭރު އުތުރު ދާއިރާގެ މެންބަރު އިބްރާހީމް މުޢިއްޒު ހުށަހަޅުއްވާފައިވާ، މި ބިލަށް މިއަދު އޮތް މަޖިލިސް ޖަލްސާގައި ވަނީ ވޯޓަށް އަހައި 44 މެމްބަރުގެ ވޯޓާއި އެކު ބިލް ވަނީ މަޖިލީހަށް ބަލައިގެންފައެވެ.
ބިލުގައި ހިމެނޭ މައިގަނޑު ކަންކަން:
- ހުއްދަނެތި ކޮމްޕިއުޓާ ސިސްޓަމަކަށް އެކްސެސްވުން.
- އިތުރު ކުށެއް ކުރުމަށް މަގުފަހި ކުރުވުމުގެ ނިޔަތުގައި ހުއްދަނެތި ކޮމްޕިއުޓާ ސިސްޓަމަކަށް އެކްސެސްވުން.
- ހުއްދަނެތި ކޮމްޕިއުޓާ ޑޭޓާ އިންޓަސެޕްޓް ކުރުން.
- ހުއްދަނެތި ކޮމްޕިއުޓާ ޑޭޓާއަށް އިންޓަފިއާ ކުރުން.
- ނަހަމަ ގޮތުގައި ޑިވައިސް ބޭނުންކުރުން.
- ސައިބާ ވަޔަލަންސްގެ އަމަލުތައް.
- ކޮމްޕިއުޓަރާ ގުޅުންހުރި އޮޅުވާލުމުގެ އަމަލުތައް.
- ކޮޕީރައިޓާއި އެއާގުޅޭ އެހެނިހެން ހައްގުތަކަށް އަރައިގަތުމުގެ އަމަލުތައް.
އެ އިސްލާހުގައިވާ ގޮތުގައި ކޯޓު އަމުރެއްގެ ދަށުން ނުވަތަ ގާނޫނަކުން ބާރު ލިބިގެން ދޫކޮށްފައިވާ ހުއްދައެއްގެ ދަށުން އެ ކޯޓު އަމުރުގައި ނުވަތަ ހުއްދައިގައި ބަޔާންކުރާ ގޮތުގެ މަތިން ކޮމްޕިއުޓަރަކަށް ނުވަތަ ޑޭޓާއަކަށް ނުވަތަ އެއިން އެއްޗެއްގެ ވަކި ވަޔަކަށް އެކްސެސްވުމަކީ ކުށެއް ކަމުގައި ނުބެލެވޭނެއެވެ.
