ކޯލިޝަން ޕާޓްނަރަކަށް ވެއޮވެ، ރައްޔިތުންގެ މަޖިލިސް ތެރެއިން ސަރުކާރަށް ދޭންޖެހޭ އެއްބާރުލުން ދުވަހަކުވެސް ޖުމްހޫރީ ޕާޓީން ދީފައި ނުވާކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވީ ޖުމްހޫރީ ޕާޓީގެ ޕީޖީ ގްރޫޕުން މަޖިލީހުގައި މިހާތަނަށް މަސައްކަތް ކުރެއްވި ގޮތާއި ގުޅޭގޮތުން ކުރެެއްވި ޓުވީޓުގައެވެ. ޝަރީފް ވިދާޅުވީ ސަރުކާރު ކޯލިޝަންގައި ޖުމްހޫރީ ޕާޓީއާއިއެކު މަސައްކަތް ކުރިނަމަވެސް މަޖިލިސް ތެރެއިން ޖުމްހުރީ ޕާޓީގެ އެއްވެސް އެއްބާރުލުމެއް ނުލިބޭކަމަށެވެ. މަޖިލިސް ތެރެއިން ސަރުކާރު ވައްޓާލުމަށް ފިކުރެއްގެ ދިރުމުން ކުރަމުންދާ މަސައްކަތް ފެއިލްކޮށްލާފައިވަނީ ރައީސް ޞާލިހުގެ ހިކުމަތްތެރި ކަމާއިއެކުގައިކަމަށް ޝަރީފް ވިދާޅުވިއެވެ.
ކޯލިޝަން މިހިސާބަށް ދެމެހެއްޓުނީވެސް ރައީސް ޞާލިހުގެ ހިކުމަތްތެރިކަމާއި ކެތްތެރިކަމާއިއެކު. ޖުމްހޫރީ ޕާޓީގެ މަޖިލިސް މެމްބަރުން އެއްވެސް އިރެއްގައި ސަރުކާރަށް އެއްބާރުލުން ނުދެއްވާ. ފިކުރެއްގެ ދިރުން ސަރުކާރު ވައްޓާލަން އިދިކޮޅު ފަރާތްތަކާއި ގުޅިގެން ކުރަމުންއައި އައި މަސައްކަތް ފެއިލްވީވެސް އިބްރާހިމް މުހައްމަދު ޞާލިހުގެ ސިޔާސަތުން.
– ޝަރީފް ވިދާޅުވިއެވެ.
ޝަރީފް ވިދާޅުވީ މަޖިލިސް ތެރޭގައި މިހާތަނަށް ކުރެވުނު މަސައްކަތްތަކުގައި ޖޭޕީގެ މަޖިލިސް މެމްބަރުން އަބަދުވެސް މަސައްކަތް ކުރީ ސަރުކާރާއި ދެކޮޅަށް ކަމަށެވެ. އެކަން މަޖިލީހުގެ ޔައުމިއްޔާތަކުން ފެންނަން ހުންނާނެކަމަށެވެ.
ކޯލިޝަންގައި ހިމެނެނުނު ޕާޓްނަރުން ސަރުކާރަށް އެއްބާރުލުން ދިންވަރު މަޖިލިސް ޔައުމިއްޔާ ތަކުން އެހެރީ ރީތިކޮށް ފެންނަން. ފިކުރެއްގެ ދިރުމެކޭ، ޕީޕީއެމްއެކީ ޖުމްހޫރީ ޕާޓީއެކޭ މާބޮޑު ތަފާތެއް ނެތް. މެމްބަރު ޝިޔާމްއެކޭ، އަލީ ހުސެއިނެކޭ، އިމްތިޔާޒެކޭ، ބޮންޑެއެކޭ، ހަސަން ލަތީފެކޭ، އަލީ އާޒިމްއެކޭ އެއްވެސް ތަފާތެއް ނެތް.
– ޝަރީފް ވިދާޅުވިއެވެ.
ޝަރީފްގެ ފާޑުކިޔުން ޖުމްހޫރީ ޕާޓީއަށް އަމާޒުވެފައިވާއިރު، ނިމިގެން މިދިޔަ ހަފްތާގެ މަޖިލީހުގެ ޖަލްސާތަކުގައި އެމްޑީޕީގެ ރައީސް ޞާލިހަށް ތާއީދުކުރާ މެމްބަރުން ވަނީ ޖުމްހޫރީ ޕާޓީ ސަރުކާރު ކޯލިޝަނުްނ ވަކިކޮށް، މަޤާމުތަކުގައި ތިބި ޖޭޕީގެ ބޭފުޅުން ވަކި ކުރުމަށް ގޮވާލާފައެވެ. އަދި ޖުމްހޫރީ ޕާޓީއަކީ މަކަރުވެރި ޕާޓީއެއްކަމަށް އެމެމްބަރުން ވަނީ ވިދާޅުވެފައެވެ.
