ބައިނަލްއަޤްވާމީ ފަތުރުވެރިކަމުގެ ސިނާއަތުގައި ދެވޭ އެންމެ ޝަރަފުވެރި އެވޯޑް، "ވޯލްޑް ޓްރެވަލް އެވޯޑްސް"ގެ "ވޯލްޑްސް ލީޑިން ޑެސްޓިނޭޝަން" އެވޯޑް ފުރަތަމަ ފަހަރަށް ރާއްޖެއަށް ލިބިއްޖެ އެވެ.
މި އެވޯޑް ރާއްޖެއަށް ލިބުނުކަން އިއުލާން ކުރީ ވާޗުއަލްކޮށް ރޭ ބޭއްވި މިއަހަރުގެ ވޯލްޑް ޓްރެވަލް އެވޯޑްސްގެ ގްރޭންޑް ފިނާލޭ ހަފްލާގަ އެވެ. ރާއްޖެއަށް މި ލިބުނު ކާމިޔާބީ އާއި ގުޅިގެން ވޯލްޑް ޓްރެވަލް އެވޯޑްސްގެ ފައުންޑަރ އަދި ރައީސް ގްރަހަމް ކޫކް ވެސް ވަނީ ރޭގެ ހަފްލާގައި ރާއްޖެއަށް މަރުހަބާ ދަންނަވާފައެވެ.
ދުނިޔޭގެ އެންމެ މަޤްބޫލު ފަތުރުވެރިކަމުގެ މަންޒިލްގެ އެވޯޑު ރާއްޖޭން ހޯދީ ފަތުރުވެރިންގެ މެދުގައި މަގުބޫލު 22 މަންޒިލަކާ ވާދަކޮށްގެންނެވެ. އޭގެތެރޭގައި ތެރޭގައި ދުބާއީ، ބްރެޒިލް، ގްރީސް، މަޔާމީ ބީޗް، މެލޭޝިޔާ، ސްޕެއިން، މޮރިޝިއަސް، ސައުތު އެފްރިކާ، ނިއުޒިލެންޑް އަދި ސްރީލަންކާ ފަދަ މަގުބޫލް މަންޒިލްތައް ހިމެނެ އެވެ.
ވޯލްޑް ޓްރެވަލް އެވޯޑްސް ގައި މިއަހަރު 40 ކެޓަގަރީއަކުން ރާއްޖެ ނޮމިނޭޓްވެފައި ވެއެވެ. މީގެތެރޭގައި ރިސޯޓް ތަކާއި ހޮޓާތައް ހިމެނޭ ބައިން 30 ކެޓަގަރީއަކުން ރާއްޖޭގެ 53 ރިސޯޓަކާއި ހޮޓާތައް ނޮމިނޭޓްވެފައިވެއެވެ. އަދި މުޅި ދުނިޔެއިން ވާދަކުރި 3 ކެޓަގަރީއިން ވެސް 3 ނޮމިނޭޝަންގައި ރާއްޖެ ވަނީ ދުނިޔޭގެ އެންމެ މަތީ ފަންތީގެ ހިދުމަތްދޭ ފަތުރުވެރިކަމުގެ މަންޒިލްތަކާއި ވާދަކޮށްފައެވެ.
މިއަހަރުއެ ވޯލްޑް ޓްރެވަލް އެވޯޑްސްގައި ރާއްޖެއިން ހޯދި އެވޯޑްތަކަކީ:
ވޯލްޑްސް ލީޑިން ނިއު ރިސޯޓް 2020: އެމަރަލްޑް މޯލްޑިވްސް ރިސޯޓް އެންޑް ސްޕާ
ވޯލްޑްސް ލީޑިން ލަގްޒަރީ އައިލެންޑް ރިސޯޓް 2020: ދަ ސެއިންޓް ރެޖިސް މޯލްޑިވްސް ވޮއްމުލި ރިސޯޓް
ވޯލްޑްސް ލީޑިން ލަގްޒަރީ އައިލެންޑް ވިލާސް 2020: ބަރޮސް މޯލްޑިވްސް
ވޯލްޑްސް ލީޑިން ހަނީމޫން ރިސޯޓް 2020: ޖޭއޭ މަނަފަރު
ވޯލްޑްސް ލީޑިން ވޯޓާ ވިލާ ރިސޯޓް 2020: ފޯ ސީޒަންސް ރިސޯޓް މޯލްޑިވްސް އެޓް ކުޑަ ހުރާ
ވޯލްޑްސް ލީޑިން ސީޕްލޭން އޮޕަރޭޓާ 2020: ޓްރާންސް މޯލްޑިވިއަން އެއާވޭސް
ވޯލްޑްސް ލީޑިން އެއާޕޯޓް ރިސޯޓް 2020: ހުޅުލެ އައިލެންޑް ހޮޓެލް
ދުނިޔޭގެ އެންމެ މަޤްބޫލު ފަތުރުވެރިކަމުގެ މަންޒިލްގެ އެވޯޑު ރާއްޖެއަށް ލިބުމާގުޅިގެން ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ، ފަތުރުވެރިންގެ މެދުގައި ރާއްޖެއަށް އޮންނަ މަގުބޫލުކަން މި އެވޯޑުން އެނގިގެން ހިނގައްޖެކަމަށެވެ. އަދި މިއީ ފަތުރުވެރިކަމުގެ ދާއިރާއިން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހްގެ ހަރުދަނާ ސިޔާސަތު ތަކާއި ފަތުރުވެރިކަމުގެ ސިނާއަތުގެ އެންމެހާ ފަރާތްތަކުގެ މަސައްކަތާއި ދިވެހިންގެ ހިތްހެޔޮ މެހްމާންދާރީ ސަބަބުން ރާއްޖެއަށް ލިބުނު ޝަރަފެއް ކަމަށް މިނިސްޓަރު ވިދާޅުވިއެވެ.
މި އެވޯޑް ރާއްޖެ އަށް ލިބުމާ ގުޅިގެން ވާޗުއަލް ހަފްލާގައި ވާހަކަ ދައްކަވަމުން އެމްއެމްޕީއާރްސީގެ މެނޭޖިން ޑިރެކްޓަރު ޠައްޔިބު މުޙައްމަދު ވިދާޅުވީ މިފަދަ ދަތި ދަނޑިވަޅެއްގައި ރާއްޖެއަށް މިހާ ޝަރަފުވެރި އެވޯޑެއް އަދި ހާއްސަކޮށް ފުރަތަމަ ފަހަރަށް ހާސިލްކުރެވުމަކީ ލިބޭ ވަރަށްބޮޑު ޝަރަފެއް ކަމަށެވެ.
"އަޅުގަނޑުމެންގެ މި ތަފާތު ޖިއޯގްރަފީ އާއި ސަލާމަތީ ގޮތުން އަޅާފައިވާ ފިޔަވަޅު ތަކުގެ ސަބަބުން، އަޅުގަނޑުމެންގެ ޤައުމަކީ މި ފަދަ ދަނޑިވަޅެއްގައި ދަތުރުކުރަން އެންމެ ރައްކާތެރި މަންޒިލް. އަޅުގަނޑުމެން މުޅި ދުނިޔެއަށްވެސް ދައުވަތު އަރުވަން ރާއްޖޭގެ " ސަނީ ސައިޑް އޮފް ލައިފް" އަލުން ހަމަ ތަޖުރިބާ ކޮށްލަން"
– އެމްއެމްޕީއާރްސީގެ މެނޭޖިން ޑިރެކްޓަރު ޠައްޔިބު
ރާއްޖޭން ވަނީ މިއަހަރުގެ ވޯލްޑް ޓްރެވަލް އެވޯޑްސްގެ އިންޑިއަން އޯޝަން ކެޓަގަރީއިން ވެސް ހަތަރު އެވޯޑެއް ކާމިޔާބުކޮށްފަ އެވެ. މިއަހުގެ އެވޯޑުގެ އިންޑިއަން އޯޝަން ކެޓަގަރީއިން ރާއްޖެއިން ވަނީ ޖުމްލަ 10 ކެޓަގަރީއަކުން ވާދަކޮށްފައެވެ. އެތަނުން ރާއްޖެއިން އެވޯޑު ހޯދީ:
އިންޑިއަން އޯޝަންސް ލީޑިން ބީޗް ޑެސްޓިނޭޝަން 2020
އިންޑިއަން އޯޝަންސް ލީޑިން ކުރޫޒް ޑެސްޓިނޭޝަން 2020
އިންޑިއަން އޯޝަންސް ލީޑިން ޑެސްޓިނޭޝަން 2020
އިންޑިއަން އޯޝަންސް ލީޑިން ޑައިވް ޑެސްޓިނޭޝަން 2020
މި ހަތަރު ކެޓަގަރީން ނެވެ. އިންޑިއަން އޯޝަންސް ލީޑިން ޑެސްޓިނޭޝަންގެ އެވޯޑު ރާއްޖެއިން ހޯދި މިއީ 13 ވަނަ ފަހަރެވެ.
1993 ވަނަ އަހަރު ދޭންފެށި ވޯލްޑް ޓްރެވަލް އެވޯޑްގެ މަޤްސަދަކީ ބައިނަލްއަޤްވާމީ ފަތުރުވެރިކަމުގެ ދާއިރާގައި ޚާއްސަ ކާމިޔާބީތައް ޙާސިލްކުރާ ފަރާތްތައް ފާހަގަކުރުމެވެ. އަދި މިއީ ދުނިޔޭގެ ފަތުރުވެރި މަންޒިލްތަކުގެ ފެންވަރާއި މަގުބޫލުކަން ކަނޑައަޅައިދޭ އެންމެ އިތުބާރު ބޮޑު އެވޯޑެވެ. އެގޮތުން މިއެވޯޑު މަޝްހޫރުވެފައި ވަނީ ފަތުރުވެރިކަމުގެ ދާއިރާގެ އޮސްކާގެ ގޮތުގައެވެ.
