ރިޔާސީ އިންތިޚާބުގައި ކާމިޔާބެއް ހޯދުމަށް ވަކިވަކި ފަރުދުންގެ އެންމެ ގިނަ ވޯޓު ހޯދޭނެ ބޭފުޅަކީ ޖުމްހޫރީ ޕާޓީގެ ލީޑަރު ޤާސިމް އިބްރާހިމްކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެއެވެ.
އޭނާ މިހެން ވިދާޅުވީ އިއްޔެ މަޖިލީހުގައި ޖުމްހޫރީ ޕާޓީގެ ސްލޮޓްތަކުގައި ސަރުކާރުގައި ތިބި މީހުން އިސްތިއުފާ ދިނުމށް ގޮވާލައި ދެއްކި ވާހަތަކާއި ގުޅިގެން ގިނަ ބައެއްގެ ފާޑުކިޔުން އަމާޒު ވެފައިވާ ދަނޑިވަޅެއްގައެވެ. މަޖިލީހުގެ އިއްޔެގެ ޖަލްސާގައި ވާހަކަދައްކަވަމުން ރާއީ ވިދާޅުވީ، ޖޭޕީގެ ސްލޮޓްތަކުގައި ތިއްބެވި ހުރިހާ ބޭފުޅުން އިސްތިއުފާ ދެއްވަން ޖެހިވަޑައިގަންނަވާނެ ކަމަށެވެ. އަދި އިސްތިއުފާ ނުދެއްވައިފި ނަމަ، ކަންބަޅިތަކެއް ހެން މަޖިލީހަށް ގެނެސް ވަކި ކުރައްވާނެ ކަމުގެ އިންޒާރު ވެސް އޭނާ ދެއްވިއެވެ.
ރާއީއަށް އަމާޒުވި ފާޑުކިޔުންތަކުގެ ތެރެއިން ޝައިޚު ޒައިދު އަމާޒުކުރި ފާޑުކިޔުމަށް ރައްދު ދެއްވައި ރާއީ ވިދާޅުވީ ރާއްޖޭގައި ވެރިކަމެއް ގެނައުމަށް މިވަގުތު ތިބި ވަކިވަކި ސިޔާސީ ޝަހުސިއްޔަތުތަކުގެ ތެރެއިން ވަކިވަކި ފަރުދުންގެ ވޯޓް އެއްމެ ގިނައިން ހޯދޭނެ އެއް ބޭފުޅަކީ ޖޭޕީ ލީޑަރ ޤާސިމް އިބްރާހިމް ކަމަށެވެ.
ވެރިކަމެއް ގެނައުމަށް ރާއްޖޭގައި މިވަގުތު ތިބި ވަކިވަކި ސިޔާސީ ޝަހުސިއްޔަތުންނަށް ބަލާ ކަމުގައިވާނަމަ، ވަކިވަކި ފަރުދުންގެ ވޯޓް އެއްމެ ގިނައިން ހޯދޭނެ އެއް ބޭފުޅަކީ ޖޭޕީ ލީޑަރ ޤާސިމް އިބްރާހިމް އަދި ކޯލިޝަނަކަށް ކުޑަ ބޮޑެތި ބަސްބުނާ ޕާޓީ އަށްވުރެ މުހިއްމު ވާނީވެސް ޖޭޕީއެވެ.
– ރާއީ ވިދާޅުވިއެވެ.
ރިޔާސީ އިންތިޚާބުގައި ޖުމްހޫރީ ޕާޓީން ކެނޑިޑޭޓަކު ނެރުމަށް ނިންމައި، އެޕާޓީން އިސްވެއޮވެ ޕާޓީތަކާއި ހަދާ ކޯލިޝަނުން ވެރިކަމަށް އައުމަށް އެޕާޓީގެ ކައުންސިލުން ވަނީ މިދިޔަ އަންގާރަދުވަހު ނިންމާފައެވެ. ރިޔާސީ އިންތިޚާބުގައި ޖުމްހޫރީ ޕާޓީގެ ފަރާތުން ވާދަކުރާ ކެނޑިޑޭޓަކު ކަނޑައެޅުމަށް ބާއްވާ ޕްރައިމަރީގައި ވާދަކުރުމުގެ ފުރުސަތު އެ ޕާޓީގެ ވަނީ ހުޅުވާލާފައެވެ.
ރިޔާސީ އިންތިހާބުގައި ވާދަކުރުމަށް ޖުމްހޫރީ ޕާޓީގެ ކައުންސިލްގެ އިއްތިފާގުން ފާސްކޮށްފައިވާއިރު، އެމްޑީޕީއާއެކު ކޯލިޝަން ހަދަން އެ ޕާޓީއަށް އޮތީ ދައުވަތު ދީފައެވެ. ނަމަވެސް އަދި މިހާތަނަށް އެޕާޓީން އެހެން ޕާޓީއަކާއެކު ކޯލިޝަން ހެދުމަށް މަޝްވަރާ ކޮށްފައިނުވެއެވެ.
މިއަހަރުގެ ބާއްވާ ރިޔާސީ އިންތިހާބު އޮންނަނީ ސެޕްޓެމްބަރުމަހުގެ 9 ވަނަ ދުވަހުއެވެ.
