އިޒްރޭލުގެ އެއަރލައިނަކުން ރާއްޖެއަށް ދަތުރުތައް ފަށަން އުޅޭކަމަށް ދެކެވެމުންދާ ވާހަކަތައް ސަރުކާރުގެ ފަރާތުން ދޮގުކޮށްފިއެވެ.
މިއަދު ރައީސް އޮފީހުގައި ބޭއްވު ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވީ ރާއްޖެއަކީ އިސްރާއީލާއި ވިޔަފާރީގެ އެއްވެސް ގުޅުމެއް ބާއްވަމުންދާ ގައުމެއް ނޫންކަމަށާއި، އެހެންކަމުން އިޒްރާއީލުގެ އެއަރލައިނަކުން ރާއްޖެއަށް ދަތުރުތަކެއް ކުރުމުގެ އިންތިޒާމްތަކެއް ހަމަޖެހިގެން ނުދާނެ ކަމުގައެވެ.
މި ނޫސްވެރިންގެ ބައްދަލުވުމުގައި ވާހަކަ ދައްވަމުން މިއުވާން އިތުރަށް ވިދާޅުވީ ރާއްޖެއާއި އިސްރާއީލާ ދެގައުމުގެ ދޭތެރޭ އެއަރސާވިސް އެގްރީމަންޓެއްވެސް ނޯންނާނެ ކަމަށާއި، އެހެންކަމުން ރާއްޖެއާއި އިސްރާއީލާ ދެމެދު ވައިގެ ދަތުރުތައް ކުރުމަކީ ކުރެވޭނެ ކަމެއްވެސް ނޫން ކަމުގައެވެ.
އެނގިވަޑައިގަންނަވާނެ، ވިޔަފާރީގެ ގުޅުމެއް ރާއްޖެއާއި އިސްރާއީލާ ދެމެދަކު މިހާރަކު ނޯންނާނެ. އެހެންވީމަ އެފަދަ އެއްބަސްވުމަކަށް ނުވަތަ އެފަދަ ދަތުރުތަކެއް ކުރެވޭނެ އިންތިޒާމެއް ހަމައެއް ނުޖެހޭނެ. އަދި ހަމައެއާއެކު ދެގައުމުގެ ދޭތެރޭ އެއަރ ސާވިސް އެގްރީމަންޓެއްވެސް ނޯންނާނެ. އެހެންވީމަ އެއީ ކުރެވޭނެ ކަމެއް ނޫން.
މިއުވާން ވިދާޅުވިއެވެ.
އޭނާ ވިދާޅުވި ގޮތުގައި އިޒްރޭލުގެ އެއަރލައިނަކުން ރާއްޖެއަށް ދަތުރުތައް ފަށަން އުޅޭކަމުގެ ވާހަކަ ނޫސްތަކުން ފެނުނު ކަމަށާއި، އެހެންނަމަވެސް އެފަދަ ހުށަހެޅުމެއް އިސްރާއީލުގެ ފަރާތުންވެސް އަދި އެ އެއަރލައިންގެ ފަރާތުންވެސް ސަރުކާރަށް ލިބިފައި ނުވާކަމުގައެވެ.
އިސްރާއީލުގެ އެއަރލައިންތައް ރާއްޖެއަށް ދަތުރު ނުކުރިނަމަވެސް، ޓްރާންސިޓްކޮށް އިސްރާއީލުގެ ފަތުރުވެރިންނަށް ރާއްޖެއަށް ޒިޔާރަތް ކުރުމުގެ ފުރުސަތު އޮވެއެވެ.
އިސްރާއިލުގެ އެލް އަލްގެ ދަތުރުތައް ރާއްޖެއަށް ފަށަން އުޅޭ ކަމަށް އެ އެއާލައިންއާ ހަވާލާދީ ރޮއިޓާސް ނިއުސް އެޖެންސީން ވަނީ މިހަފްތާގައި ރިޕޯޓްކޮށްފަ އެވެ.
