ކ. ގުރައިދޫ ދާއިރާގެ ބައި- އިލެކްޝަނުގައި އެމްޑީޕީގެ ޓިކެޓްގައި ވާދަކުރާ ކެނޑިޑޭޓަކު ހޮވުމަށް ހޮނިހިރު ދުވަހު ބާއްވާ ޕްރައިމަރީގައި ވޯޓުލުމުގެ ހައްގު ލިބިފައިވަނީ 844 މީހުންނަށް ކަމުގައި އެޕާޓީން ބުނެފިއެވެ.
ގުރައިދޫ ދައިރާގެ ގޮނޑި ހުސްވެފައިމިވަނީ އެ ދާއިރާގެ މެމްބަރުކަމުގައި ހުންނެވި ޕީޕީއެމްގެ މެމްބަރު އިބްރާހިމް ރިޒާ މިމަހުގެ 23 ވަނަދުވަހު އަވަހާރަވުމާއި ގުޅިގެންނެވެ. ރިޒާ އަވަހާރަވީ ކެންސަރުގެ އާލާސްކަންފުޅަށް މެލޭޝިއާގައި ފަރުވާ ހޯއްދަވަމުން ގެންދަވަނިކޮށެވެ. ރިޒާއަކީ މަޖިލީހުގައި އެންމެ ގިނަ ދުވަސްވީ އެއް މެންބަރެވެ. ރިޒާ ވަނީ، ނިމުނު 3 ދައުރުގައިވެސް މެންބަރުކަން ކުރައްވާފައެވެ. މި ދާއިރާގައި މިިދިޔަ ތިން ދައުރުވެސް އެމްޑީޕީން ވާދަކުރިނަމަވެސް އެ ޕާޓީއަކަށް ކާމިޔާބުކުރެވިފައެއް ނުވެއެވެ.
އެމްޑީޕީން މިއަދު އާންމުކުރި އެޕާޓީގެ ބައި އިލެކްޝަންގެ ޕްރައިމަރީގައި ވޯޓު ލުމުގެ ޙައްޤުލިބިފައިވާ މެންބަރުންގެ ދާއިމީ ވޯޓާސް ލިސްޓް އެމެންބަރުން ވޯޓުލުމަށް ރަޖިސްޓަރީ ކުރެވިފައިވާ ރަށާއެކު ވަނީ އާންމުކޮށްފައެވެ. މިލިސްޓުގައި ގޮތުން އެންމެ ގިނަ އަދަދަކަށް ވޯޓުލުމުގެ ހައްގު ލިބިފައިވަނީ މާފުށީ އެމްޑީޕީ މެމްބަރުންނަށެވެ.
ވޯޓުލުމުގެ ހައްގު ލިބިފައިވާ މީހުންގެ ރަޖިސްޓްރީ:
– މާފުށީ: 366
– ގުރައިދޫ: 310
– ގުޅި: 99
– މާލެއަށް ވޯޓުލާން ރަޖިސްޓްރީ މެމްބަރުން: 69
އެމްޑީޕީ ވާދަކުރާ 4 ކެނޑިޑޭޓުން:
1- މުޙައްމަދު މުސްތަފާ – ވިވިޑް / ކ. މާފުށި
2- ސަލްމާން ރަޝީދު – މާފަރިވާގެ / ކ. މާފުށި
3- އިބްރާހިމް ޝާޒް – ފައިވްރޯޒް / ކ ގުރައިދޫ
4- އަބްދުﷲ ސައީދު – ވެލި / ކ. ގުރައިދޫ
ގުރައިދޫ ދާއިރާގެ ބައި އިލެކްޝަން ގައި އެމްޑީޕީގެ ފަރާތުން ވާދަކުރާނެ ކެންޑިޑޭޓެއް ހޮވުމަށް ބާއްވާ ޕްރައިމަރީގެ ވޯޓުލުމަށް ހަމަޖެހިފައިވަނީ ހޮނިހިރު ދުވަހުގެ ހެނދުނު 9:00 އިން ހަވީރު 5:00 އަށެވެ. އަދި ވޯޓުފޮށި ބެހެއްޓުމަށް ހަމަޖެހިފައިވާ މަރުކަޒުތައްވެސް މިއަދު ވަނީ އާންމުކޮށްފައެވެ.
ވޯޓު ފޮށިތައް ބަހައްޓާ މަރުކަޒުތައް:
– ކ ގުޅި – ގުޅި ސްކޫލް
– ކ މާފުށި – މާފުށި ސްކޫލް
– ކ ގުރައިދޫ – ގުރައިދޫ ޒުވާނުންގެ މަރުކަޒު
– މާލޭގައި ވޯޓުފޮށި ބެހެއްޓިފައި ހުންނާނީ އެމް.ޑީ.ޕީ މައި ހަރުގޭގައިއެވެ.
ގުރައިދޫ ދާއިރާގެ ގޮނޑި ހުސްވުމުން އެ ދާއިރާގެ ބައި- އިލެކްޝަން އަންނަ އޭޕްރިލްމަހުގެ 15ވަނަ ދުވަހު ބާއްވާނެކަން އިލެކްޝަންސް ކޮމިޝަނުން ވަނީ އިއުލާންކޮށްފައެވެ. ގުރައިދޫ ދާއިރާގައި ގުރައިދޫގެ އިތުރުން ދެން ހިމެނެނީ މާފުއްޓާއި ގުޅިއެވެ.
