މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ މެންބަރެއްގެ މެންބަރުކަމުގެ ދައުރުހަމަވާތީ، އެ މަޤާމަށް ކުރިމަތިލެއްވި ހަތަރު ބޭފުޅެއްގެ ނަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރައްޔިތުންގެ މަޖިލީހަށް ފޮނުވިނަންތަކަށް އާންމުންގެ ޚިޔާލު ހޯދުމަށް މަޖިލީހުން ހުޅުވާލައިފިއެވެ.
މަޖިލީހުގެ ޤަވާއިދު މިހާރު ބުނާގޮތުން ކޮމިޝަންތަކަށް މީހުން އައްޔަން ކުރުމުގައާއި، ބިލްތަކާއި އަދި އެނޫން މަސައްކަތްތަކުގައިވެސް މަޖިލީހުގެ ކޮމިޓީތަކުން އާންމުންގެ ޚިޔާލު ހޯދަންޖެހެއެވެ.
ބްރޯޑްކޮމްގެ މެންބަރުކަމަށް ބޭފުޅަކު އައްޔަންކުރެއްވުމަށް ރައީސުލްޖުމްހޫރިއްޔާ ނިންމެވީ، މިހާރު އެކޮމިޝަނުގައި ހިމެނިވަޑައިގަންނަވާ އަމްޖަދު ވަޙީދުގެ މެންބަރުކަމުގެ ދައުރު މާރޗް 15އަށް ހަމަވާތީއެވެ. އެ މަޤާމަށް ކުރިމަތިލުމަށް ހުޅުވާލި ފުރުޞަތުގައި ކުރިމަތިލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާ އިސްކަންދެއްވާ 4 ނަމެއް ވަނީ މަޖިލީހަށް ފޮނުއްވާފައެވެ.
ބްރޯޑްކޮމްގެ މެންބަރުކަމަށް އައްޔަންކުރެއްވުމަށް ފޮނުއްވި ނަންތައް:
1- އަލްއުސްތާޛް ޝިހާމް މުޙައްމަދު ވަޙީދު، ރސ.5143
2- އަލްއުސްތާޛް ޝާން ޞާލިޙް މުޙައްމަދު، ފިނިވާދީ، ދ.ކުޑަހުވަދޫ
3- ޙުސައިން ޢަމްރު، ވ.ރޯޝަން
4- ޝަފާ ޝަފީގް، ބިއްލޫރިވިލާ. ދ.މީދޫ
މި ހަތަރު ނަން ދިރާސާކުރުމަށް މަޖިލީހުން ފޮނުވީ މިނިވަން މުއައްސަސާތަކުގެ ކޮމިޓީއަށެވެ. މިހަތަރު ނަމާއިމެދު އާންމުންގެ ޚިޔާލަށް ހުޅުވާލާފައިވަނީ މިމަހުގެ 13 ވަނަ ދުވަހުގެ ނިޔަލަށެވެ.
7 މެންބަރުންގެ މައްޗަށް އެކުލެވޭ ބްރޯޑްކާސްޓިންގ ކޮމިޝަންގައި މިހާރު ތިއްބެވީ، އެކޮމިޝަންގެ ރައީސާ މަރްޔަމް ވަޙީދާއާއި، ނާއިބު ރައީސް މުޙައްމަދު ފަޒީންގެ އިތުރުން ކޮމިޝަންގެ މެންބަރުން ކަމަށްވާ އަމްޖަދު ވަހީދާއި، އަލީ ޔޫސުފާއި، އާމިނަތު އަމީނާއާއި، ޝިފްލާ އިބްރާހީމްއެވެ.
