އެމްޑީޕީގެ ރިޔާސީ ޕްރައިމަރީ އަލުން ބާއްވައިދިނުމަށް އެދި ސިވިލް ކޯޓަށް މައްސަލަ ހުށަހަޅާފައިވާ އަލީ އަމްޖަދަކީ އެމްޑީޕީގެ މެމްބަރެއް ނޫންކަން ހާމަވެއްޖެއެވެ،

މިކަން ހާމަވެފައިވަނީ، ޕްރައިމަރީ ބާތިލް ކުރަން ކޯޓަށް މައްސަލަ ހުށަހެޅި އަލީ އަމްޖަދާއި ބެހޭ މައުލުމާތު އެމްޑީޕީގެ ޗެއަރޕާސަންގެ ނައިބު އިބްރާހިމް ވަހީދު (އިބުރޭ) ބައެއް މީޑިއާތަކަށް ހާމަ ކުރުމުންނެވެ.

ބައެއް މީޑިއާތަކަށް މައުލޫމާތު ދެއްވަމުން އިބުރޭ ވިދާޅުވެފައިވަނީ، އަލީ އަމްޖަދު އެމްޑީޕީގެ މެމްބަރެއްގެ ގޮތުގައި ހުރެފައިވަނީ، 2005 ވަނަ އަހަރު އެޕާޓީ ރަޖިސްޓްރީ ކުރަން އުޅުނު ދުވަސްވަރު ކަމުގައެވެ.

އިބުރޭ ވިދާޅުވި ގޮތުގައި، އެހެންނަމަވެސް އެއަށްފަހު 2008 ވަނަ އަހަރު އޭނާ އަމިއްލައަށް އެދިގެން އެމްޑީޕީން ވަކިވުމަށްފަހު ރަޖިސްޓްރީ ވެފައިވަނީ، މޮނާޒާ ނައީމް އިސްވެ އޭރު އުފެއްދި މޯލްޑިވްސް ނޭޝަނަލް ކޮންގްރެސް (އެމްއެންސީ)ގައި ކަމަށެވެ.

އަދި ފަހުން އެޕާޓީ އުވުމަށްފަހު، އަލީ އަމްޖަދު ރަޖިސްޓްރީ ވެފައިވަނީ ޖުމުހޫރީ ޕާޓީގައި ކަމަށްވެސް އިބުރޭ ވިދާޅުވެފައި ވެއެވެ.

އިބުރޭ ހާމަ ކޮށްފައިވާ ގޮތުގައި، ފާއިތުވި އެމްޑީޕީގެ ރިޔާސީ ޕްރައިމަރީގެ ލިސްޓު އާންމު ކުރުމުން އޭނާގެ ނަން ލިސްޓުގައި ނެތިގެން ޝަކުވާ ކޮށްފައިވާ ކަމަށާއި، އެހެންނަމަވެސް އޭނާއަކީ މާކުރިން، އަމިއްލައަށް އެދިގެން އެމްޑީޕީން ވަކިވެފައިވާ މީހެއް ކަމުގައެވެ.

އެނގިފައިވާ ގޮތުގައި ޖުމުހޫރީ ޕާޓިގައި ނަން އޮވެގެން އަލީ އަމްޖަދު އިލެކްޝަންސް ކޮމިޝަނަށް ޝަކުވާ ހުށަހަޅާފައި ވެއެވެ. އެހެންނަމަވެސް، އޭނާއަކީ އަމިއްލައަށް އެދިގެން އެމްޑީޕީން ވަކިވުމަށްފަހު މޯލްޑިވްސް ނޭޝަނަލް ކޮންގްރެސް (އެމްއެންސީ)ގެ ރަޖިސްޓްރީގައި ނަން އޮތް މީހަކަށް ވާތީ، އޭނާގެ ނަން މިހާރު އެއްވެސް ޕާޓީއެއްގެ ދަފްތަރުގައި އިލެކްޝަންސް ކޮމިޝަނުން ހިމަނާފައެއް ނުވެއެވެ.

އެމްޑީޕީގެ ރިޔާސީ ޕްރައިމަރީ ބާތިލް ކުރުމަށް ހުށަހެޅި މައްސަލާގެ ޝަރީއަތުގައި، ސިވިލް ކޯޓުން މި މައްސަލަ ބެލުމުގެ އިހްތިސޯސެއް ނެތް ކަމަށް އެމްޑީޕީން ބުނުމާއި ގުޅިގެން، އެ ނިންމާފައިވަނީ، މައްސަލަ ހުށަހެޅި ފަރާތުން އިހުތިސޯސްއާ މެދު ދެކޭ ގޮތް ހުށަހަޅަން ވަކީލުންނަށް 10 ދުވަހުގެ ފުރުސަތެއް ދިނުމަށެވެ. ނަމަވެސް ބެލެވޭ ގޮތުގައި މި ހަފުތާ ތެރޭގައި ޖަވާބެއް ހުށަހަޅާނެ އެވެ.

އަލީ އަމްޖަދުގެ ވަކީލަކަށް މިމައްސަލާގައި ވަޑައިގަތީ ކުރީގެ ބަންޑާރަ ނައިބު ދިޔާނާ ސައީދާއި ނާޒިމް އަބްދުލް ސައްތާރެވެ.