ހުސްވެފައިވާ ގުރައިދޫ ދާއިރާގެ ބައި އިލެކްޝަންގައި ވާދަކުރުމަށް ޝައުގުވެރިވާ އެޕާޓީގެ މެމްބަރުންނަށް، މޯލްޑިވްސް ނޭޝަނަލް ޕާޓީ (އެމްއެންޕީ) އިން ޕްރައިމަރީއަށް ފުރުސަތު ހުޅުވާލައިފިއެވެ.
އެމްއެންޕީން ކޮށްފައިވާ އިއުލާނުގައިވަނީ، ބައި އިލެކްޝަންގައި ވާދަކުރަން ބޭނުންވާ އެމިޕާޓީގެ މެމްބަރުން އެކަމަށް އެދޭ ފޯމް ފުރިހަމަކޮށް، ފޯމާއެކު ހުށަހަޅަންޖެހޭ ލިޔެކިޔުންތަކާއެކު، 7 މާރޗް 2023 ވާ (އަންގާރަ) ދުވަހުގެ 14:00 ކުރިން އެމް.އެން.ޕީގެ އޮފީހަށް ހުށަހެޅުމަށެވެ.
އަދި ޕްރައިމަރީއެއް ބާއްވަންޖެހޭ ހާލަތެއްގައި، ވޯޓްލުން ކުރިއަށްދާނީ 10 މާރޗް 2023 ވާ (ހުކުރު) ދުވަހު މެންދުރުފަހު 14:00 ން 18:00އަށް ކަމަށްވެސް މި އިއުލާންގައި ބުނެފައި ވެއެވެ.
ގުރައިދޫ ދާއިރާގެ ބައި އިލެކްޝަންގައި އެމްޑީޕީންނާއި އަދި އިދިކޮޅު ޕީޕީއެމްއިންވެސް ވާދަ ކުރާނެކަމަށް ވަނީ ބުނެފައެވެ. އެމްޑީޕީގެ ބައި އިލެކްޝަން ޕްރައިމަރީ ބޭއްވުމަށް ހަމެޖެހިފައިވަނީ މިމަހުގެ 11 ވަނަ ދުވަހުއެވެ.
ގުރައިދޫ ދާއިރާގެ ގޮނޑި ހުސްވީ، އެދާއިރާގެ މެންބަރުކަމުގައި ހުންނެވި އިބްރާހީމް ރިޒާ އަވަހާރަވުމުންނެވެ. ގުރައިދޫ ދާއިރާގެ ބައި-އިލެކްޝަން އޭޕްރީމް މަހުގެ 15 ގައި ބޭއްވުމަށް އިލެކްޝަންސް ކޮމިޝަނުން ވަނީ ނިންމާފައެވެ.
ކެންސަރުގެ އާލާސްކަންފުޅަށް މެލޭޝިއާގައި ފަރުވާ ހޯއްދަވަމުން ގެންދަވަނިކޮށް، ފާއިތުވި ފެބްރުއަރީމަހު އަވަހާރަވި ރިޒާއަކީ އިދިކޮޅު ޕީޕީއެމްގެ ކައުންސިލް މެމްބަރެއްގެ އިތުރުން، ރައްޔިތުންގެ މަޖިލިހުގެ މެމްބަރުކަން ފާއިތުވި 14 އަހަރު މެދުނުކެނޑި ކުރައްވައިފައިވާ ބޭފުޅެކެވެ.
އަދި ރިޒާ ވަނީ، ނިމުނު 3 ދައުރުގައިވެސް މަޖިލިސް މެންބަރުކަން ކުރައްވާފައެވެ.
