ތ.ހިރިލަންދޫ ސްކޫލަށް ދިމާވެފައިވާ ޖާގައިގެ ދަތިކަން ހައްލުކުރުމުގެ ގޮތުން އަޅާ އިމާރާތްތަކުގެ މަސައްކަތް ނިންމާ އަންނަ އަހަރުގެ ޖެނުއަރީ މަހު ބޭނުން ކުރަން ފެށޭނެ ކަމަށް މިނިސްޓަރ އޮފް އެޑިއުކޭޝަން ޑރ.އައިޝަތު އަލީ ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ހިރިލަންދޫ ސްކޫލަށް 71 އަހަރު ފުރުމުގެ ގޮތުން ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ހިރިލަންދޫ ސްކޫލަށް 71 އަހަރު ފުރުމާ ގުޅިގެން ބޭއްވި ރަސްމިއްޔާތުގައި މިނިސްޓަރ އޮފް އެޑިއުކޭޝަން ޑރ. އައިޝަތު އަލީ ވިދާޅުވީ އެ ސްކޫލަށް ދިމާވެފައިވާ ޖާގައިގެ ދަތިކަން ހައްލުކުރުމަށްޓަކައި މަސައްކަތްތައް ކުރަމުން އަންނަކަމަށެވެ. އެގޮތުން މިހާރުވެސް 3 ފަންގިފިލާގެ 2 އިމާރާތާއި މަލްޓިޕަރޕަސް ހޯލް އެޅުމުގެ މަސައްކަތް ކުރަމުން އަންނަކަމަށެވެ. އަދި މި އިމާރާތްތަކުގައި 11 ކްލާސްރޫމާއި، ލައިބްރަރީއާއި، ސްޓާފްރޫމާއި އޮފީސް ބައިގެ އިތުރަށް ފާޚާނާތައް ހުންނާނެކަން މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ މިއިމާރާތްތަކުގެ މަސައްކަތް އަންނަ އަހަރުގެ ޖެނުއަރީ މަހަށް ނިންމާލާ ބޭނުންކުރަން ފެށޭނެ ކަމަށެވެ.
ހިރިލަންދޫ ސްކޫލަކީ ހިރިލަންދޫއަށް ވާ ސަބަބުތައް ނަގަހައްޓާ ފަޚުރުވެރި ދަރިންތަކެއް އުފައްދާނެކަމަށް އުއްމީދު ކުރާކަމަށާއި ރަށުގެ ތާރީޚާއި އަހުލުވެރި ހޭލުންތެރި ދަރިންތަކެއް ސްކޫލުން އުފައްދާނެ ކަމަށް އުއްމީދު ކުރާކަމަށްވެސް މިނިސްޓަރ ވިދާޅުވިއެވެ.
ތ. ހިރިލަންދޫ ސްކޫލަކީ މީގެ 70 އަހަރު ކުރިން ތަޢުލީމް ފޯރުކޮށްދޭން ފެށި ސްކޫލެކެވެ. 1951 ވަނަ އަހަރު ހިރިލަންދޫގައި ތައުލީމް ފޯރުކޮށްދިނުމުގެ މަސައްކަތް ފެށީ އެރަށަށް ނިސްބަތްވާ އަލްމަރްޙޫމް ހުސައިން ކަލޭފާނުއެވެ. 25 ދަރިވަރުންނާއި 2 މުދައްރިސުންނާއެކު ފެށި މިމަސައްކަތުގައި ފުރަތަމަ ކިޔަވައިދެމުން އައީ ރައްޔިތުންގެ މަރުކަޒެއްގައެވެ.
ފުރަތަމަ މަކްތަބުއް ހުރަވިއްޔާގެ ނަމުން ތަޢުލީމް ފޯރުކޮށްދެމުން އައިސް ހިރިލަންދޫ ސްކޫލްގެ ނަމަށް ނަން ބަދަލުކުރީ 1991 ވަނަ އަހަރުއެވެ. އަދި 1987 ވަނަ އަހަރު އެސްކޫލްގައި ގްރޭޑް ތަޢުލީމް ފޯރުކޮށްދީ ކިޔަވައިދެމުން ގެންދިޔައެވެ. ހިރިލަންދޫ ސްކޫލްގައި އޭރު ކިޔަވައިދެމުން އައީ ރަށުގެ ރައްޔިތުންގެ ފައިސާއިން ނަމަވެސް 2003 ވަނަ އަހަރު އެސްކޫލް ސަރުކާރުގެ ސްކޫލަކަށް ބަދަލުކުރިއެވެ. އެއަށްފަހު 2007 ވަނަ އަހަރު ޖީސީއީއޯލެވެލް އިމްތިހާނުގައި ބައިވެރިވެ އެސްކޫލް ވަނީ އެއަހަރުގެ 1 ވަނަ ސްކޫލަކަށް ހޮވިފައެވެ.ޒަމާނަށް އަންނަ ބަދަލުތަކާއި ތަޢުލީމީ ދާއިރާއަށް އަންނަމުންދާ އިންޤިލާބީ ބަދަލުގެ ހިރިލަންދޫ ސްކޫލަށްވެސް އަންނަނީ އަންނަމުންނެވެ. އެގޮތުން ދަރިވަރުންގެ ކިޔެވުން ފުޅާވާން ފެށިއެވެ. އަދި ދަރިވަރުންނަށް ކިޔަވއިދޭ މުދައްރިސުންގެ އަދަދު ވެސް ވަނީ އިތުރުވެފައެވެ. މިހާރު އެރަށު ސްކޫލްގައި 246 ދަރިވަރުންނަށް ކިޔަވައިދިނުމަށް 37 މުދައްރިސުން އަންނަނީ ހަރަކާތްތެރިވަމުންނެވެ. މި ސްކޫލްގައި އެލްކޭޖީން ފެށިގެން ގްރޭޑް 10 އަށް އަންނަނީ ކިޔަވައިދެމުންނެވެ.
ހިރިލަންދޫ ސްކޫލަށް 71 އަހަރު ފުރުން ފާހަގަކުރުމަށް ބޭއްވި ރަސްމިއްޔާތުގައި ވަނީ ހިރިލަންދޫ ސްކޫލަށް ދިގުމުއްދަތަކަށް ޚިދުމަތްކުރެއްވި 3 ބޭފުޅުންގެ ޚިދުމަތުގެ އަޤުވަޒަންކޮށް ހަނދާނީ ފިލާދެއްވާފައެވެ. މިހަނދާނީ ފިލާތައް ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހްއެވެ.
