ތިން މިނިޓް ތެރޭގައި އެންމެ ގިނަ ސެލްފީ ނެގި މީހާގެ ރެކޯޑު، އިންޑިއާގެ މަޝްރޫރު ފިލްމީ ތަރި އަކްޝޭ ކުމާރު މުގުރާލައިފިއެވެ. އޭނާ މި ރެކޯޑު މުގުރާލާފައިވަނީ، ތިން މިނިޓް ތެރޭގައި 184 ސެލްފީ ނަގައިގެންނެވެ.
މީގެ ކުރިން މި ރެކޯޑު އޮންނަނީ، ތިން މިނިޓް ތެރޭގައި 168 ސެލްފީ ނަގައިގެން، އިނގިރޭސިވިލާތުގެ ރައްޔިތެއް ކަމުގައިވާ ޖޭމްސް ސުމިތު ކިޔާ މީހެއްގެ އަތުގައެވެ. އޭގެ ކުރިން މި ރެކޯޑު ހާސިލް ކޮށްފައިވާ މީހުންގެ ތެރޭގައި، ހޮލީވުޑްގެ ސުޕަރ ސްޓާރެއް ކަމުގައިވާ ޑުވޭން "ދަ ރޮކް" ޖޯންސަންއާއި، ލަވަކިޔުންތެރިއާ ޑޮނީ ވަލްބާގް ހިމެނެއެވެ. މި ދެމީހުންނަކީވެސް އެމެރިކާއަށް ނިސްބަތްވާ ދެމީހުންނެވެ. އަދި، އިނގިރޭސިވިލާތަށް ނިސްބަތްވާ، ކުރީގެ ފުޓްބޯޅަ ކުޅުންތެރިއެއް ކަމުގައިވާ އަލަން ޝިއަރަރވެސް މީގެކުރިން މި ރެކޯޑް މުގުރާލާފައި ވެއެވެ.
އަކްޝޭ ކުމާރު މި ރެކޯޑު މުގުރާލާފައިވަނީ އިންޑިއާގެ މުމްބާއީގައި ހުންނަ މެހެބޫބު ސްޓޫޑިއޯގައެވެ. މި ސްޓޫޑިއޯއަށް، އަކްޝޭ މި ރެކޯޑު މުގުރާލުމަށް ބޭއްވި އިވެންޓުގައި ބައިވެރިވުމަށް، އޭނާއަށް ތާއީދުކުރާ 240 ފޭނުންވެސް ހާޒިރު ވެފައި ވެއެވެ.
މި ރެކޯޑު މުގުރާލުމަށްޓަކާ، އޮރެންޖު ކުލައިގެ ޖަމްޕްސޫޓެއް ލާއިގެން ހުރި، އުމުރުން 55 އަހަރުގެ އަކްޝޭ ހުއްޓިގެން ހުރެފައިވަނީ، އޭނާގެ ފޭނުން ދެ ލައިނަކަށް އެތުރިގެން ތިބިއިރު އެ ލައިނުގެ މެދުގައެވެ. އެއީ ވީހާ ގިނަ އަދެއްގެ ސެލްފީ ނެގުމަށް ތައްޔާރުވެގެން ހުރެއެވެ.
މިގޮތުން، އަކްޝޭގެ ފޭނުން މީހަކަށްފަހު މީހެއް ފޮޓޯ ފްރޭމްގެ ތެރެއަށް ދިއުމަށް ދެފަރާތަށް ޖެހެމުން ގޮސް، ތިން މިނިޓް ހަމަވިއިރު 209 ސެލްފީ ނަގާފައި ވެއެވެ. އެހެންނަމަވެސް، ރަގަޅަށް ސާފުނުވެ، ފުސްވެފައި ހުރުމުގެ ސަބަބުން ބައެއް ފޮޓޯތައް ވަނީ ބަލައި ނުގެންފައެވެ.
ޖިނެސް ވާރލްޑް ރެކޯޑުގެ ގަވާއިދުގައިވާ ގޮތުން، ހުރިހާ ސެލްފީތަކެއްވެސް ވާން ޖެހެނީ ރަގަޅަށް ފޯކަސް ކުރެވިފައިވާ، އަދި ރަގަޅަށް އަލި، ސެލްފީގައި ފެންނާން ހުންނަ މީހާއަކީ ކާކުކަން ރަގަޅަށް ވަކިވާވަރަށް ސާފު ސެލްފީއަކަށެވެ.
މިގޮތުން ހުރިހާ ސެލްފީތައް ގަނާ ނިމުނުއިރު، 25 ސެލްފީ ޑިސްކޮލިފައި ވެގެން ދިޔަނަމަވެސް، އަކްޝޭ ނަގާފައިވާ، ޝަރުތު ހަމަވާ ހުރިހާ ސެލްފީތަކެއް އެއްކޮށްލުން، މި ރެކޯޑު އޭނާ ވަނީ ފަސޭހަކަމާއެކު މުގުރާލާފައެވެ.
މި އިވެންޓަށްފަހު ވާހަކަ ދައްކަމުން އަކްޝޭ ބުނެފައިވަނީ އޭނާ ދެން މުގުރާލަން ބޭނުންވަނީ ފިޓްނަސް ރެކޯޑެއް ކަމުގައެވެ. މިގޮތުން "ފުޝް އަޕް" ރެކޯޑު މުގުރާލަން އޭނާ ވަރަށް ބޮޑަށް ޝައުގުވެރިވާއިރު، އެއަށްވުރެވެސް އުދަގޫ ބާވަތުގެ ރެކޯޑެއްވެސް މުގުރާލުމުގެ ޝައުގުވެރިކަން އަކްޝޭވަނީ ފާޅުކޮށްފައެވެ. އެއީ ހެލިކޮޕްޓަރަކުން އެލިގަނެގެން އޮވެ، ރެކޯޑް މުގުރާލައިގެން ދުނިޔޭގެ ރެކޯޑް ފޮތަށް އެރުމެވެ.
އަކްޝޭ މި ރެކޯޑު މުގުރާލާފައިވަނީ، މިމަހުގެ 24ވަނަ ދުވަހު ސިނެމާތަކަށް އަންނަ އޭނާގެ ފިލްމު "ސެލްފީ" ޕްރޮމޯޓު ކުރުމުގެ ގޮތުންނެވެ.
