ބައިނަލްއަޤުވާމީ މާދަރީ ބަހުގެ ދުވަހުގެ މުނާސަބާގައި ސްރީލަންކާގައި ހުންނަ ބަންގްލަދޭޝް ހައިކޮމިޝަނުން އިންތިޒާމު ކޮށްގެން ކުރިޔަށް ގެންދިޔަ އިވެންޓުގައި، ލަންކާގައި ހުންނަ ރާއްޖޭގެ ކަލްޗަރަލް ސެންޓަރު (ސޯސަންވިލާ) ގެ ދަރިވަރުން ހުށަހަޅައިދިން އައިޓަމަށް ބޮޑު ތަރުހީބެއް ލިބިއްޖެއެވެ.
ސޯސަންވިލާގެ 23 ދަރިވަރުން ހުށަހަޅައިދިން "ދިވެހިންގެ ލޭނާރު – މަސްވެރިކަން" ވެގެންދިޔައީ މުޅި އިވެންޓުގައިވެސް ހުށަހަޅައިދިން އެންމެ ހިތްގައިމު އިވެންޓަށެވެ. އެ ރަސްމިއްޔާތަށް ވަޑައިގެން ތިއްބެވި އެހެން ގައުމު ތަކުގެ މީހުންވެސް ވަނީ ދިވެހި ދަރިވަރުންގެ ހުށަހެޅުމަށް ތައުރީފު ކޮށްފައެވެ.
ސޯސަންވިލާގެ ދަރިވަރުން ހުށަހަޅައިދިނީ އިހުގައި ކާބަފައިން މަސްވެރިކަން ކުރަމުން އައިގޮތާއި، އޭރު މަސްވެރިކަމުގައި ދިވެހި އަންހެނުންގެ ދައުރު އޮތް ގޮތެވެ.
މި އިވެންޓުގައި މޯލްޑިވިއަން އެޑިޔުކޭޝަނަލް އެންޑް ކަލްޗަރަލް ސެންޓަރުގެ ދަރިވަރުންގެ އިތުރުން ލަންކާގައި ހުންނަ ބަޔެއް އެހެން ގައުމުތަކުގެ އެމްބަސީ ތަކާއި ކަލްޗަރަލް ސެންޓަރު ތަކުންވެސް އައިޓަމްތައް ހުށަހަޅާފައިވެއެވެ. އޭގެތެރޭގައި ބަންގްލަދޭޝް، ސްރީލަންކާ، ރަޝިޔާ، އީރާން، ސައުތު ކޮރެއާވެސް ބައިވެރިވެފައިވެއެވެ.
ބަންގްލަދޭޝް ހައިކޮމިޝަނުގެ އިވެންޓުގެ އިތުރުން މާދަރީ ބަހުގެ ދުވަސް ސޯސަންވިލާގައިވެސް ވަނީ ވަރަށް ކުލަގަދަކޮށް ފާހަގަ ކޮށްފައެވެ.
