އެމްޑީޕީގެ ޕްރައިމަރީ އަލުން ބާއްވައިދިނުން އެދި ރައީސް މުހައްމަދު ނަޝީދުގެ ފަޅިން ސިވިލް ކޯޓަށް ހުށަހެޅި ތިން މައްސަލައިގެ ތެރެއިން އެއް މައްސަލަ ބަލައިގަނެ، އަންނަ ހަފްތާގައި ޝަރީއަތް ފަށަން ތާވަލުކޮށްފިއެވެ.
މި މައްސަލަ ތިން ފަރާތަކުން ސިވިލް ކޯޓަށް ހުށައަޅާފައިވެއެވެ. ނަމަވެސް ތިން މައްސަލާގައިވެސް އެއްކަމަކަށް އެދިފައިވާތީ ސިވިލް ކޯޓުން ބަލައިގަތީ އެތަނުން އެއް މައްސަލައެވެ. އެގޮތުން ސިވިލް ކޯޓަށް ބަލައިގަތީ ޢަލީ ޢަމްޖަދު ކިޔާ މީހަކު ހުށައަޅާފައިވާ މައްސަލައެވެ. ސިވިލް ކޯޓުގައި މި މައްސަލަ ކުރިއަށް ގެންދަން ތާވަލުކޮށްފައިވަނީ އަންނަ އަންގާރަ ދުވަހަށެވެ.
އެމްޑީޕީގެ ޕްރައިމަރީއާއި ގުޅޭގޮތުން ސިވިލް ކޯޓަށް ހުށައަޅާފައިވާ މައްސަލާގައި ވަނީ، ޕާޓީގެ މެންބަރުކަމުން ވަކިކުރުމަކީ، އެ މެންބަރަކާމެދު އެޅޭ ފިޔަވަޅެއްކަން އެމްޑީޕީގެ އަސާސީ ޤަވާއިދުގައި ބަޔާންކުރާއިރު، އެޕާޓިން 39،000 މެންބަރުން ވަކިކޮށްފައިވަނީ އިޖްރާޢަތްތައް ފުރިހަމަ ނުކޮށްކަމަށެވެ. އެހެންކަމުން އެ މެންބަރުންގެ ވޯޓުދިނުމުގެ ހައްގު ގެއްލޭގޮތަށް ބޭއްވި ޕްރައިމަރީ ޞައްހަ ނޫންކަމަށް ކަނޑައަޅައި، އަލުން ޕްރައިމަރީ ބޭއްވުމަށް އެމްޑީޕީގެ މައްޗަށް ޢަމުރުކޮށްދިނުމަށް އޭނާ އެދިފައިވެއެވެ.
އެމްޑީޕީގެ ޕްރައިމަރީ ބާޠިލުކުރުމަށް ސިވިލް ކޯޓަށް ހުށައެޅި މައްސަލަ އެކޯޓުން ބަލައިގަނެފައިވާއިރު، އެމްޑީޕީން ވަނީ އެޕާޓީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް މިދިޔަ ހޮނިހިރު ދުވަހުގެ ރޭ ރަސްމީކޮށް ރިޔާސީ ޓިކެޓް ހަވާލުކުރައްވާފައެވެ.
ނަޝީދުގެ ފަޅިން ހުށަހެޅި މި މައްސަލާގައި ބުނެފައި އޮތީ ޕާޓީގެ މެންބަރަކު ވަކިކުރުމަކީ މެންބަރާ މެދު އަޅާ ފިޔަވަޅެއްކަން އަސާސީ ގަވާއިދުން އެނގެން އޮންނައިރު، ވަކިކުރި 39،000 މެންބަރުން ވަކިކުރީ ފިޔަވަޅު އެޅުމުގައި އަމަލު ކުރަންޖެހޭ އިޖުރާއަތުތަކާ ހިލާފަށް ކަމަށެވެ.
ޖެނުއަރީ މަހުގެ 28 ވަނަ ދުވަހު ބޭއްވި އެމްޑީޕީގެ ޕްރައިމަރީ އިންތިހާބު ބޮޑު ތަފާތަކުން ކާމިޔާބުކުރެއްވީ ރައީސް ސޯލިހު އެވެ. މި އިންތިހާބުން ނަޝީދަށް ލިބިވަޑައިގަތީ 39 އިންސައްތަ ވޯޓެވެ. އިންތިހާބު ކާމިޔާބު ކުރެއްވި ރައީސް ސޯލިހަށް ލިބިވަޑައިގަތީ 61 އިންސައްތަ ވޯޓެވެ.
