ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ރިޔާސީ ދެވަނަ ދައުރެއް ދިނުމަށް ތާއީދު ކުރައްވައި ނައިބް ރައީސް ފައިސަލް ނަސީމް ޓުވީޓް ކުރައްވައިފިއެވެ.
ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރައްވުމަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް، ރިޔާސީ ޓިކެޓް ރަސްމީކޮށް އެރުވިތާ ގިނަ އިރުތަކެއްނުވެ ނައިބް ރައީސް ފައިސަލް ނަސީމް ވަނީ ރައީސް ޞާލިހަށް މަރުހަބާ ދަންނަވާފައެވެ. ވެރިކަން ކުރާ ކޯލިޝަންގައި ހިމެނޭ ޖުމްހޫރީ ޕާޓީގެ ސްލޮޓެއްގައި ނައިބް ރައީސް ވަނީ މީގެ ކުރިންވެސް ރައީސް ޞާލިހަށް ދެވަނަ ދައުރެއް ދޭންޖެހޭކަމަށް ވިދާޅުވެ ވާހަކަ ދައްކަވާފައެވެ.
ނައިބް ރައީސް ފައިސަލް ނަސީމް ރޭ ކުރެއްވި ޓުވީޓުގައި ވިދާޅުވީ ދިވެހި ޤައުމަށް އިތުރު ހަމަޖެހުމާއި ކުރިއެރުން ގެނައުމަށްޓަކައުި ރައީސް އިބްރާހިމް މުހައްމަދު ޞާލިހަށް ދެވަނަ ދައުރެއް ލިބެންޖެހޭ ކަމަށެވެ.
މަރުހަބާ އެމްޑީޕީގެ 2023 ގެ ރިޔާސީ ކެނޑިޑޭޓް ރައީސް އިބްރާހިމް މުހައްމަދު ޞާލިހު. ދިވެހި ޤައުމަށް އިތުރު ހަމަޖެހުމާއި ކުރިއެރުން ގެނައުމަށް 2 ވަނަ ދައުރެއް.
– ނައިބް ރައީސް ވިދާޅުވިއެވެ.
ނައިބް ރައީސްގެ ތާއީދު ރައީސް ޞާލިހަށް އޮތްކަން ހާމަ ކުރައްވަމުންދާއިރު، ރިޔާސީ އިންތިޚާބުގައި ޖުމްހޫރީ ޕާޓީން ކުރިއަށްދާނެ ގޮތަކާއިމެދު އަދި މިހާތަނަށް ވަކި ގޮތެއް ނިންމާފައިނުވެއެވެ. އެޕާޓީން ރިޔާސީ އިންތިޚާބާއިމެދު ގޮތެއް ނިންމާނީ ކުރިއަށް އޮތް އެޕާޓީގެ ގައުމީ ޖަލްސައަށްފަހު އެކުލަވާލެވޭ އާ ކައުންސިލުން ނިންމާ ގޮތެއްގެ މައްޗަށެވެ. އެޕާޓީން ކުރިއަށް އޮތް ރިޔާސީ އިންތިޚާބުގައި ވާދަކުރާނެކަމަށް ބެލެވޭއިރު، އިންތިޚާބުގައި ވާދަކުރެއްވުމަށް އެޕާޓީގެ ލީޑަރު ޤާސިމް އިބްރާހިމް ނިކުންވަނާނެކަމަށް ގިނަ ބަޔަކު ދަނީ ބުނަމުންނެވެ.
ޖުމްހޫރީ ޕާޓީން ދާދިފަހުން ބޭއްވި ނޫސްވެރިންގެ ބައްދަލުވުމެއްގައިވެސް އެޕާޓީން ކެނޑިޑޭޓަކު ނެރޭ ހާލަތެއްގައި އެހެން ޕާޓީތަކުގެ ކެނޑިޑޭޓުންނަށް ތާއީދުކޮށް އެޕާޓީންގެ މެމްބަރުން އަމަލުކުރާނަމަ އެމެމްބަރަކު ޕާޓީން ވަކިވުމަކީ އެންމެ ރަނގަޅުގޮތްކަމަށް ވަނީ ވިދާޅުވެފައެވެ.
އެމްޑީޕީން ރިޔާސީ ޓިކެޓް ރައީސް ޞާލިހަށް ހަވާލު ކުރުމަށް ރޭ ބޭއްވި ޖަލްސާގައި އެޕާޓީގެ ރައީސް މުހައްމަދު ނަޝީދާއި، ނައިބް ރައީސް މުހައްމަދު ޝިފާޒާއި، އަދި ރައީސް ނަޝީދަށް ތާއީދުކުރާ އެއްވެސް މަޖިލިސް މެމްބަރެއްވެސް މިޖަލްސާގައި ބައިވެރިވެފައި ނުވެއެވެ.
