މިމަހު 11 ވަނަ ދުވަހު ހުޅުވަން ތައްޔާރު ވެފައިވާ، ޕިކްނިކް އައިލޭންޑް ކުޑަގިރީގެ ފެރީގެ އަގަކީ ކޮޅަކަށް 25 ރުފިޔާ ކަމުގައި ނާއިބުރައީސް ފައިސަލް ނަސީމް ވިދާުވެއްޖެއެވެ.
އަންނަ ހޮނިހިރު ދުވަހު، ކުޑަގިރި ޕިކްނިކް އައިލޭންޑް ރަސްމީކޮށް ހުޅުވުމަށް ހަމަޖެހިފައިވަނީ ރައީސުލްޖުމްހޫރިއްޔާ އިބުރާހިމް މުހައްމަދު ސާލިހެވެ.
ކުޑަގިރި ހުޅުވުމަށް ވަމުންދާ ތައްޔާރީތަކާއި ގުޅޭގޮތުން ނޫސްވެރިންނަށް މައުލޫމާތު ދެއްވަމުން ނާއިބު ރައީސް ފައިސަލް ނަސީމު ވިދާޅުވީ، އެ ރަށަށް ދާ ފަރާތްތަކުން ކޮޅަކަށް ދައްކަންޖެހޭ ފެރީގެ އަގަކީ 25 ރުފިޔާކަމަށާއި، އަދި އެންޓްރޭންސް ފީގެ ގޮތުގައި 50 ރުފިޔާ ދައްކާން ޖެހޭނެ ކަމުގައެވެ.
ފައިސަލް ވިދާޅުވީ، އެހެންނަމަވެސް ހަފްތާ ބަނދުގައާއި އަދި ސަރުކާރު ބަންދު ދުވަސްތަކުގައި އެރަށް ހިލޭ ދަތުރު ކުރެވޭނެ ކަމަށާއި، ބަންދު ދުވަސްތަކުގައި އެރަށަށް ދަތުރު ދެވޭނީ ހަމައެކަނި ދިވެހިންނަށް ކަމުގައެވެ.
އެޗްޑީސީން މީގެ ކުރިން ހާމަ ކޮށްފައިވާ ގޮތުގައި، ކުޑަގިރި އާންމުންނަށް ހުޅުވާލެވިގެންދާއިރު، ޕިކްނިކް އައިލެންޑެއްގެ ގޮތުގައި ކަނޑައަޅާފައިވީ ނަމަވެސް މިރަށުގައި ކައިވެނީގެ ހަފްލާތަކާއި، އުފަންދުވަސް ފާހަނގަކުރުމަށް ބާއްވާ ޕާޓީތަކާއި އެކިކަހަލަ އެއްވުންތަކުގެ އިތުރުން ކޯޕަރޭޓް އިވެންޓްތައް ބޭއްވުމުގެ ފުރުސަތުވެސް ހުޅުވިގެން ދާނެއެވެ. އަދި އޭގެ އިތުރުންވެސް، މި ރަށުގައި ޑައިވިން އަދި ވޯޓަރސްޕޯޓްސްގެ ގިނަ ހަރަކާތްތަކުގެ އިތުރުން ޓުއަރިސްޓުންނަށްވެސް މި ރަށަށް ޒިޔާރާތްކުރުމުގެ ފުރުސަތު އޮންނާނެކަމަށްވެސް އެޗްޑީސީން ބުނެފައި ވެއެވެ.
އެޗްޑީސީން ހާމަ ކޮށްފައިވާ ގޮތުގައި، ކުޑަގިރިއަށް ޕިކްނިކްދާ ފަރާތްތަކަށް ބޭނުންވާނެ އަސާސީ ކަންކަން ގާއިމް ކުރުމުގެ ގޮތުން، އެ ރަށުގައި ފާހަނާބަރި، ޗޭންޖިންގ ރޫމާއި ނާސިންގް ރޫމްވެސް ވަނީ ގާއިމުކޮށްފައެވެ. މި ރަށުގައި ގާއިމް ކޮށްފައިވާ ނާސިންގް ރޫމް ގާއިމްކުރެވިފައިވަނީ ކުޑަކުދިންގެ ނެޕީ ބަދަލުކޮށް، ތުއްތުކުދިންނަށް ގާތުން ދިނުންފަދަ ކަންކަން ފަސޭހައިން ކުރެވޭނެފަދަ އިންތިޒާމުތަކާއިއެކުއެވެ.
އޭގެ އިތުރުން މިސްކިތަކާއި، ކްލިނިކްއަކާއި، ކޮންވީނިއެންސް ސްޓޯރ އަދި ރީޓެއިލް ސްޓޯރގެ އިތުރުން މިރަށުގައި ކެފޭއެއްވެސް ވަނީ ގާއިމުކުރެވިފައިވާކަމަށް އެޗްޑީސީން ބުނެފައި ވެއެވެ. އަދި ފެނަކަ ކޯޕަރޭޝަންގެ ފަރާތުން މިރަށުގެ ފެނާއި ކަރަންޓުގެ ހިދުމަތްވެސް މިހާރު ވަނީ ފޯރުކޮށްދީފައެވެ.
ކުޑަގިރީގައި އާންމުން ބޭނުންކުރުމަށް ޑޭ ޔޫސް ރޫމްގެ ގޮތުގައި 12 ރޫމް ވަނީ ކަނޑައަޅާފައެވެ. އަދި އާންމުން ބޭނުންކުރުމަށް 13 ކުޑަ އަށި އަދި 4 ބޮޑު އަށިވަނީ ގާއިމުކޮށްފައެވެ. ކުޑަގިރީގައި ޤާއިމުކޮށްފައިވާ ކުޅިވަރުގެ ވަސީލަތްތަކުގެ ތެރޭގައި ވޮލީބޯޅަ ކޯޓު، ބާސްކެޓްބޯޅަ ކޯޓު، އައުޓްޑޯ މިނީ ފުޓްބޯޅަ ކޯޓު، ކުޑަކުދިންނަށް ހާއްސަކޮށްފައިވާ ޕްލޭގްރައުންޑް، ޑައިވް ސެންޓަރ އަދި ވޯޓަރ ސްޕޯޓްސް ސެންޓަރ ހިމެނެއެވެ.
މީގެއިތުރުން، އެޑްމިން ބިލްޑިންގ އަކާއި، ފްރަންޓް އޮފީހެއްގެ އިތުރުން ސެކިއުރިޓީ ބެލެހެއްޓުމަށް ސެކިއުރިޓީ އޮފީހަކާއި ސީސީޓީވީ ކެމެރާތައް މި ރަށުގެ އެކި ސަރަހައްދުތަކުގައި ގާއިމުކޮށްފައިވެއެވެ. ކުޑަގިރިއަށް ދަތުރުދާން ބޭނުންވާ ފަރާތްތަކަށް މާލެ އާއި ހުޅުމާލެއިން ޓިކެޓް ދޫކުރުމުގެ އިންތިޒާމްތައްވެސް ހަމަޖެހިފައި ވާކަމަށްވެސް އެޗްޑީސީން ބުނެފައި ވެއެވެ.
މި މަޝްރޫޢުއަކީ، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙްގެ ވައުދުތަކުގެ ދަށުން ދުޅަހެޔޮ، ހިތްފަސޭހަ އަދި އިޖްތިމާޢީ ގުޅުމާއި ހަމަޖެހުން ދެމެހެއްޓުމާއި، ރައްޔިތުންގެ ނަފްސާނީ ދުޅަހެޔޮކަން އިތުރުކޮށްދިނުމަށް ހިންގާ މަޝްރޫޢުއެކެވެ. މީގެ ކުރިން މާލެ ސަރަހައްދުގައި ދިރިއުޅޭ ރައްޔިތުން ހިތް އުފާކޮށްލުމަށް ޙާއްސަވެފައި އޮތް ކުޑަބަނޑޮސް ކުރީގެ ރައީސް ޔާމީންގެ ސަރުކާރުގައިވަނީ އަމިއްލަ ވިޔަފާރިއަކަށް ދޫކޮށްލާފައެވެ. އޭގެ ސަބަބުން މާލެ ކައިރީގައި ދަތުރު ދިޔުމަށް އޮތް ލުއި ފުރުޞަތު ހަނިވެގެން ގޮސްފައި ވެއެވެ.
ކުޑަގިރި ތަރައްގީ ކޮށްފައިވަނީ ސަރުކާރުން ފަސް ކުންފުންޏެއްގެ އެހީތެރިކަމާ އެކުއެވެ. އެ ކުންފުނިތަކަކީ އެމްޓީސީ އާއި އެޗްޑީސީ އާއި އެމްޑަބްލިއެސްސީ އާއި ފެނަކަގެ އިތުރުން ސްޓެލްކޯއެވެ.
