މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ މެމްބަރުކަމަށް ކުރިމަތިލާން ހުޅުވާލި މުއްދަތުގައި ފަސް ބޭފުޅަކު އެ މަގާމަށް ކުރިމަތިލައްވައިފިއެވެ.
މިއަދު އޮތް ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ތިންވަނަ ޖަލްސާގައި ވަނީ އެ މަގާމަށް ކުރިމަތިލެއްވި މެމްބަރުންގެ ތެރެއިން މަޖިލީހުން ރުހުންދޭނެ ބޭފުޅެއް ކަނޑައެޅުމަށް ޓަކައި ރައީސް ހުށަހެޅުއްވި ނަންތައް އިއްވާފައެވެ. އެ ނަންތައް އިއްވައިފައިވަނީ ރައީސް އިސްކަންދެއްވި ތަރުތީބުންނެވެ.
ބްރޯޑްކޮމްއަށް އަައްޔަން ކުރުމަށް ރައީސް ފޮނުވި ނަންތަކުގެ ތެރޭގައި އިސްކަންދެއްވި ތަރުތީބަށް ބަލާއިރު އެންމެ ފުރަތަމަވެސް އޮތް ނަމަކީ ރާއްޖެ ޓީވީގައި މަސައްކަތް ކުރާ ނުޒުހާގެ ނަމެވެ.
ބްރޯޑްކޮމަށް ކުރިމަތިލި މެންބަރުން:
1. އައިމިނަތު ނުޒުހާ، ރިވޯޑް، ހއ. ހޯރަފުށި
2. ހުސެއިން އަމްރު، ވ. ރޯޝަން
3. ޝާން ސޯލިހު މުހައްމަދު، ފިނިވާދީ، ދ. ކުޑަހުވަދޫ
4. މަރިޔަމް ނަރީމާން ޝަރީފް، މުޝްތަރީގޭ، ގދ. ތިނަދޫ
5. މަރިޔަމް މުނާ، ބޯގަންވިލާ، ސ. ފޭދޫ
ބްރޯޑްކާސްޓިންގ ކޮމިޝަންގެ މެމްބަރުކަމަށް ކުރިމަތިލުމަށް ހުޅުވާލީ އެކޮމިޝަނުގެ މެމްބަރު އަދި ނައިބު ރައީސްކަމުގެ މަޤާމުގައި ހުންނެވި އަޙުމަދު ގައިސް މަޤާމުން އިސްތިއުފާދެއްވުމާއި ގުޅިގެނެވެ. ގައިސް އިސްތިއުފާ ދެއްވީ ރައީސް އިބްރާހިމް މުހައްމަދު ސޯލިހުގެ ރިޔާސީ ޕްރައިމަރީގެ ކެމްޕެއިނަށް ވަގުތު ހުސް ކުރުމަށެވެ.
މޯލްޑިވްސް ބްރޯޑްކާސްޓިން ކޮމިޝަން އެކުލެވިގެންވަނީ 7 މެންބަރުންގެ މައްޗަށެވެ. އެކޮމިޝަންގައި މިހާރު ތިއްބެވީ ކޮމިޝަންގެ ރައީސާ މަރިޔަމް ވަހީދާއާއި، ނައިބު ރައީސް މުހައްމަދު ފަޒީންގެ އިތުރުން ކޮމިޝަންގެ މެމްބަރުން ކަމަށްވާ އަމްޖަދު ވަހީދު އާއި އަލީ ޔޫސުފް އާއި އާމިނަތު އަމީނާ އާއި ޝިފްލާ އިބްރާހީމްއެވެ.
