އެފްއޭއެމްގެ ކަރަންޓު ބިލްތަކަށް ސްޓެލްކޯއަށް ދައްކަން ޖެހޭ ފައިސާ ދެއްކުމުގެ ޒިންމާ ޔޫތު މިނިސްޓްރީން ނެގުމާއެކު، ސްޓެލްކޯއާއި އެފްއޭއެމްއާއި ދެމެދު އުފެދުނު ބިލްތަކުގެ މައްސަލަ މިހާރު ހައްލު ވެފައިވާކަމުގައި ސްޓެލްކޯގެ މެނޭޖިން ޑިރެކްޓަރ ޝަރީފް ވިދާޅުވެއްޖެއެވެ.
ބުދަ ދުވަހު ސްޓެލްކޯއިން ބޭއްވި ނޫސްވެރިންގެ ބައްދަލުވުމެއްގައި، އެކުންފުނީގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވީ، އެފްއޭއެމްއިން އެކުންފުންޏަށް ދައްކަންޖެހޭ 6.5 މިލިއަން ރުފިޔާގެ މައްސަލަ ހައްލުވީ އެފްއޭއެމް އަދި ޔޫތު މިނިސްޓްރީއާއި އެކުންފުނިން ބޭއްވި މަޝްވަރާތަކަށްފަހު ކަމަށެވެ.
އަދި އެފްއޭއެމްއިން ދައްކާންޖެހޭ ބިލްތަކުގެ ޒިންމާ ޔޫތު މިނިސްޓްރީން ނަގާނެކަމުގެ ޔަގީންކަން ދީފައިވާ ކަމުގައި ޝަރީފް ވިދާޅުވިއެވެ.
ޝަރީފް ވިދާޅުވީ ޔޫތު މިނިސްޓްރީއާއެކު މިހަރު ކުރިޔަށް ދަނީ މިފައިސާ ސްޓެލްކޯއަށް ދައްކާނެ ގޮތުގެ ޕޭމަންޓް ޝެޑިއުލްއަކަށް ދެފަރާތުން އެއްބަސްވުމުގެ މަޝްވަރާތައް ކަމުގައެވެ. މިގޮތުން މި ފައިސާގެ މައްސަލަ ވަކި ގޮތަކަށް ނިމި، އެއްބަސް ވެވިފައިވާތީ، މިހާރު އެފްއޭއެމްގެ ހުރިހާ އިމާރާތަކަށްވެސް ކަރަންޓު ލިބެމުންދާނެ ކަމުގައިވެސް ޝަރީފް ވިދާޅުވިއެވެ.
އެފްއޭއެމްގެ މައްސަލަ ހައްލުވެއްޖެ އިނގޭތޯ. ސަބަބަކީ އެފްއޭއެމްއާ އެކީގައި، ޔޫތު މިނިސްޓްރީއާއި އެކީގައި އަޅުގަޑުމެންނަށް ބައްދަލުވުމެއް ބޭއްވިއްޖެ. އަދި އެފްއޭއެމްއިން ދައްކަންޖެހޭ ފައިސާގެ ޒިންމާ ޔޫތު މިނިސްޓްރީން ނަގާނެކަމަށް އަޅުގަޑުމެން ކައިރީ ވިދާޅުވެފައިވޭ. އެހެންވީމާ އަޅުގަޑުމެން ޔޫތު މިނިސްޓްރީއާއެކީ ޕޭމަންޓް ޝެޑިއުލްއެއް ހެދުމުގެ މަސައްކަތް މިހާރު ކުރިޔަށް ދަނީ.
ޝަރީފް ވިދާޅުވިއެވެ.
6 މިލިއަނަށްވުރެ ގިނަ ރުފިޔާގެ ކަރަންޓު ބިލު ނުދައްކައިގެން އެފްއޭއެމް އިން ކަރަންޓު ކަނޑާލި މައްސަލާގައި އެފްއޭއެމްއިން މީގެ ކުރިންވަނީ ވަނީ ބަޔާނެއްވެސް ނެރެފައެވެ. އެ ބަޔާނުގައި ބުނެފައި ވަނީ ސްޓެލްކޯއިން އެ އިދާރާއާ ދޭތެރޭ އެޅި ފިޔަވަޅަކީ ޒިންމާދާރުކަން ކުޑަ އަމަލެއް ކަމުގައެވެ.
އެހެންނަމަވެސް، އެފްއޭއެމް އިން ނެރުނު ބަޔާނަށް ރައްދު ދެއްވާ ސްޓެލްކޯގެ މެނޭޖިންގ ޑިރެކްޓަރ އަޙްމަދު ޝަރީފް އޭރު ވިދާޅުވެފައިވަނީ، ބޮޑެތި ޢަދަދުތަކުން ބިލު ނުދައްކާތީ ސްޓެލްކޯއަށް ދަތިވަމުން އަންނަ ކަމަށާއި، ބަޔާންތައް ނުނެރެ އެފްއޭއެމް އިން އަވަހަށް ކަރަންޓު ބިލުތަކުގެ ފައިސާ ދެއްކުމަށް ގޮވާލާ ކަމަށެވެ. އަދި އޭރު ޝަރީފް ވިދާޅުވީ ކަރަންޓު ދޭނީ ފައިސާ ދައްކާ ޚަލާސްކުރުމުންކަމަށެވެ. އޭނާ ވިދާވީ ކަރަންޓު ބިލަށް 6 މިލިއަން ރުފިޔާ އެރީ ހަމަ ހުރެފަކައި ނޫންކަމަށެވެ.
އެފްއޭއެމް އިން ކަރަންޓު ކަނޑާލުމަށްފަހު ސްޓެލްކޯއިން އޭރު ބުނެފައިވަނީ އެފްއޭއިމް އިން އެކުންފުންޏަށް ދައްކަންޖެހޭ 6.5 މިލިއަން ރުފިޔާ ދެެއްކުމަށް އެކި ފަހަރުމަތިން އަންގާ، އެ ފައިސާދެއްކޭނެ ގޮތުގެ ޕްލޭނެއް ހުށަހެޅުމަށް ގިނަ ފުރުސަތުތަކެއްދެވި، އެކަންވެސްކޮށްފައި ނުވާތީ، އެފްއޭއެމް ހައުސްއިން ވަނީ ކަރަންޓުގެ ޚިދުމަތް މެދުކަނޑާލަން ޖެހުނީ ކަމަށެވެ. އަދި މި ފައިސާ ނުދައްކާނަމަ، އެފްއޭއެމްގެ އެހެން އިމާރާތްތަކުންވެސް ކަރަންޓުގެ ހިދުމަތް މެދުކަނޑާލުމަށް ވިސްނަމުން ދާކަމަށްވެސް ސްޓެލްކޯއިން ބުންޏެވެ.
