އެމްޑީޕީގެ ފާއިތުވި ރިޔާސީ ޕްރައިމަރީން ބިލިވުމަށްފަހު، އެޕާޓީގެ އެތެރޭގައި "ފިކުރެއްގެ ދިރުން" ނަމުގައި ގޮފިތައް ހައްދަވައިގެން ޕާޓީގެ އެތެރޭގައި އާ ސިޔާސީ ހަރަކާތެއް ހިންގުމަށް ނިންމަވާފައިވާ ނިންމުއާއެކު ކުރިޔަށް ވަޑައިގަންނަވާނެ ކަމަށާއި، ގޮފި ނުހަދަން ޕާޓީގެ ލީޑަރޝިލުން އެންގި ނަމަވެސް އެފަދަ އެންގެވުމަކަށް އަމަލު ނުކުރައްވާނެ ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވީ މިރޭ ދިވެހި ޓީވީ ޗެނަލްއަށް ދެއްވި ޚާއްސަ އިންޓަވިއުއެއްގައެވެ.

ދިވެހި ޗެނަލްގައި ވާހަކަ ދައްކަވަމުން ނަޝީދު ވިދާޅުވީ މިހާރު ސެކެޓްރިއޭޓަށް ގޮތްޕެއް ނުހެދުމަށް އެމަނިކުފާނަށް އެންގިދާނެ ކަމަށާއި، އެހެންނަމަވެސް އެއީ އެމަށްޗަށް އެމަނިކްފާނު އަމަލުކުރާނެ އެންގުމެއް ނޫންކަމަށެވެ.

ދެން މިހާރުގެ އެމްޑީޕީ ސެކެޓޭރިއޭޓުން މިސާލަކަށް، އެންގިދާނެ އަޅުގަޑަށް އެފަދަ ގޮތްޕެއް ނުހެދުމަށް. އެކަމަކު އަޅުގަޑު އެމައްޗަށް އަމަލު ކުރާނެ އެންގުމެއް ނޫން. އެހެންވީމާ އަޅުގަޑަށް ފެންނަ ތަނުގަ ހުއްޓުވޭނެ ގޮތެއް ނެތް. ބާރު ބޭނުން ކޮށްގެން ފުލުހުން އައިސް ކަރުދާސްތައް އަތުލައިގަނެގެން.. ފެނުނެއް ނޫންތޯ އެމްޑީޕީ ޕްރައިމަރީ 2017ވަނަ އަހަރު ފުލުހުން ހުއްޓުވިތަން. އެފަދަ ބާރު ބޭނުން ކޮށްގެން ސިޔާސީ ހަރަކާތެއް މި ހުއްޓުވެނީ. ޚާއްސަކޮށް އެއްވެ އުޅުމުގެ ހައްގު ގާނޫނު އަސާސީން ވަރަށް ފުޅާކޮށް ލިބި ދީފަ ވަނިކޮށް.

މި އިންޓަވިއުގައި ނަޝީދު ވިދާޅުވިއެވެ.

ނަޝީދު އިތުރަށް ވިދާޅުވީ އެމްޑީޕީ އުފެދިގެން އައިސްވެސް ބަޔަކު ހުއްދަ ދީގެން ނޫންކަމަށާއި، ކަނޑައެޅިގެން އެއި ގާނޫނާއި ޚިލާފް ކަމެއްކަމަށާއި، އެމްޑީޕީ އުފެދިގެން އައީ ވަރަށް ގިނަ އަނިޔާ މީހުންނަށް ލިބި، ވަރަށް ނުރައްކާތެރި މާހައުލެއްގެ ތެރޭގައި ކަމުގައެވެ.

އެހެންކަމުން އެމްޑީޕީ އުފެދިގެން އައީވެސް މީހަކު ހުއްދަ ދީގެން ނޫންކަމަށް ވިދާޅުވަމުން ނަޝީދު ވިދާޅުވީ ފިކުރެއްގެ ދިރުން ގޮފި ހަދަންވެސް މީހެއްގެ ހުއްދަ ހޯދާން ނުޖެހޭ ކަމަށާއި، ފިކުރެއްގެ ދިރުން ގޮފިތަކުގެ އެންމެ ބޮޑު އަސާސަކަށް ވާނީ، އެމްޑީޕީގެ ފަލްސަފާއަށް އެމްޑީޕީ އަލުން ރުޖޫޢަ ކުރުން ކަމުގައެވެ.

އަދި ނަޝީދު ވިދާޅުވީ، ފިކުރެއްގެ ދިރުން ގޮފީގެ މަގުސަދަކީ، 39،000 މެމްބަރުން އެމްޑީޕީން ވަކިކުރުންފަދަ އަމަލެއް ދެން އެމްޑީޕީގެ އެތެރޭގައި ހިގައިގެން ދިޔަ ނުދިނުންކަމުގައެވެ.

ނަޝީދު ވިދާޅުވީ އަލަށް އުފައްދާ ފިކުރެއްގެ ދިރުން ގޮތްޕަށް ވަރަށް ގިނަ މެމްބަރުން ވަންނާނެ ކަމަށާއި، އޭގެ ތެރޭގައި އެމްޑީޕީގެ ދަފްތަކުން ވަކިކޮށްފައި ތިބި މެމްބަރުންގެ އިތުރުން ޕާޓީގެ މެމްބަރުންގެ ގޮތުގައި މިހާރު ތިބި މެމްބަރުންވެސް ހިމެނޭނެކަމަށެވެ. މިގޮތުން މި ގޮފީގައި ބައިވެރި ވުމުން، ފާއިތުވެދިޔަ ކެމްޕޭންގައި ރައީސް ސާލިހަށް ތާއިދުކުރި މެމްބަރުންވެސް މަހުރޫމް ވެގެން ނުދާނެކަމުގައިވެސް ނަޝީދު ވިދާޅުވިއެވެ.

ފިކުރެއްގެ ދިރުން ނަމުގައި ގޮފި ހައްދަވައިގެން އެމްޑީޕީގެ އެތެރޭގައި ވަކި ސިޔާސީ ހަރަކާތެއް ހިންގެވުމަށް ނަޝީދު ނިންމެވި ނަމަވެސް ޕާޓީގެ ލީޑަރޝިޕުން ވިދާޅުވަމުން ގެންދަވަނީ، ޕާޓީގެ މެމްބަރެއްގެ ގޮތުގައި ހުންނަވައިގެން ޕާޓީގެ އެތެރޭގައި ވަކި ސިޔާސީ ހަރަކާތެއް ހިންގަވާ، އަދި ޕާޓީގެ ރިޔާސީ ކެނޑިޑޭޓު ނޫން އެހެން ރިޔާސީ ކެނޑިޑޭޓަކަށް ތާއިދު ކުރަން ޕާޓީގެ އެއްވެސް މެމްބަރަކަށް އަސާސީ ގަވާއިދުން ޖާގަދޭ ކަމެއް ނޫން ކަމުގައެވެ.

މިގޮތުން އެމްޑީޕީގެ ވަޓްސްއަޕް ގުރޫޕުގައި "ފިކުރެއްގެ ދިރުން" ކެމްޕޭނުން ތާއީދުކުރާނެ ރިޔާސީ ކެނޑިޑޭޓަކު ނިންމާނީ އަދި ފަހުގެ ތާރީޚެއްގައި ކަމަށް ނަޝީދު ވިދާޅުވުމުން، އެ ޕާޓީގެ ޗެއަރޕާސަން ފައްޔާޒު އިސްމާއިލްވަނީ އެ ނިންމެވުމާއިމެދު އަލުން ވިސެނެވުމަށް ނަޝީދުގެ އަރިހުން އެދިވަޑައިގެންފައެވެ.