އެމްޑީޕީގެ އަސާސީ ގަވާއިދުގައި ވާގޮތުން، ޕާޓީގެ ކެންޑިޑޭޓުންނަށް ތާއީދު ކުރުމާއި، ވޯޓް ހޯދާދިނުމަށް މަސައްކަތަކުރުމާއި ވޯޓުދިނުމަކީ ޕާޓީގެ ހުރިހާ މެންބަރުންގެ މަސްއޫލިއްޔަތެއްކަމަށް އެމްޑީޕީގެ ޑެޕިއުޓީ ޗެއަރޕާރސަން އިބުރާހިމް ވަހީދު (އިބުރޭ) ވިދާޅު ވެއްޖެއެވެ.

ފާއިތުވެދިޔަ އެމްޑީޕީގެ ރިޔާސީ ޕްރައިމަރީއައްފަހު އެމްޑީޕީގެ އެތެރޭގައި ވަކި ގޮފިތަކެއް އުފައްދައިގެން، ވަކި ސިޔާސީ ހަރަކާތެއް ފެއްޓުމަށް އެޕާޓީގެ ރައީސް މުހައްމަދު ނަޝީދު ނިންމެވުމުގާއި ގުޅިގެން އެމައްސަލަ ހޫނުވެފައިވާ ދަނޑިވަޅެއްގައި އިބުރޭ މިއަދު ކުރި ޓުވީޓެއްގައި، އެމްޑީޕީގެ އަސާސީ ގަވާއިދުގެ 16 ވަނަ މާއްދާގެ (ބ)ގައި ބުނާ އުސޫލުތައް މެމްބަރުންނަށް ވަނީ ހަނދާކޮށް ދެއްވައިފައެވެ.

ޕާޓީގެ ކެންޑިޑޭޓުންނަށް ތާއީދު ކުރުމާއި، ވޯޓް ހޯދާދިނުމަށް މަސައްކަތަކުރުމާއި ވޯޓުދިނުމަކީ ޕާޓީގެ ހުރިހާ މެންބަރުންގެ މަސްއޫލިއްޔަތެއް

އަސަސީ ގަވާއިދުގެ 16 ވަނަ މާއްދާގެ (ބ) pic.twitter.com/n683dJjw3Z

— Ibrahim Waheed (@ibreys) January 30, 2023

އެމްޑީޕީގެ އަސާސީ ގަވާއިދުގެ 16 ވަނަ މާއްދާގެ (ބ)ގައި ބުނަނީ، ޕާޓީގެ ކެނޑިޑޭޓުންނަށް ތާއީދު ކުރުމާއި، ވޯޓު ހޯދާ ދިނުމަށް މަސައްކަތް ކުރުމުގެ އިތުރުން ޕާޓީގެ ކެނޑިޑޭޓަށް ވޯޓު ދިނުމަކީވެސް އެ ޕާޓީގެ މެމްބަރުންގެ މަސްއޫލިއްޔަތުތަކުގެ ތެރޭގައި ހިމެނޭ ކަމެއް ކަމުގައެވެ.

ނިމިދިޔަ އެމްޑީޕީގެ ރިޔާސީ ޕްރައިމަރީން ބޮޑު ތަފާތަކުން އިންތިޚާބު ކާމިޔާބުކޮށް ރައީސް ސާލިހުވަނީ ކުރިޔަށް އޮތް ރިޔާސީ އިންތިޚާބުގެ ޕާޓީގެ ޓިކެޓް ކަށަވަރު ކުރައްވާފައެވެ. އެހެންނަމެސް އިންތިޚާބުން ބަލިވުމަށްފަހު ޕާޓީގެ ރައީސް މުހައްމަދު ނަޝީދުވަނީ ރައީސް ސާލިހަށް ތާއީދު ކުރައްވަން ދެކޮޅު ހައްދަވާފައެވެ.

މިގޮތުން ޕްރައިމަރީއަށްފު އެއްދުވަސް ވަންދެން ހަނު ހުއްނެވުމަށްފަހު ނަޝީދު ވަނީ މިއަދު ސަޕޯޓަރުންނާ ބައްދަލު ކުރައްވާފައެވެ. މި ބައްދަލުވުމުގައި ނަޝީދު ވިދާޅުވެފައިވަނީ ރިޔާސީ ޕްރައިމަރީގެ ނާކާމިޔާބީއަށްފަހު އެމްޑީޕީ ދޫކޮށްލުމުގެ ވިސްނުމެއްވެސް އަދި އެހެން ޕާޓީއެއް ހެއްދެވުމުގެ ވިސްނުންފުޅެއްވެސް ނުގެންގުޅުއްވާކަމަށެވެ.

މިއަދު ހެންވޭރުގައި ހުންނަ ދޮންމަނިކު ސްކއި ވިއުގައި މެންދުރުގެ ކެއުމަކުން އެމަނިކުފާނުގެ ކެމްޕެއިން ޓީމުތަކާ ބައްދަލުކުރަވާ ވާހަކަ ދައްކަވަމުން ނަޝީދު ވިދާޅުވީ ދެން ބެނުންފުޅުވަނީ އެމަނިކުފާނުގެ ޕްރައިމަރީ ކެމްޕެއިން ސްލޯގަން "ފިކުރެއްގެ ދިރުން" ގެ ނަމުގައި އެމްޑީޕީގައި ވަކި ގޮތްޕެއް ހަދައިގެން ޕާޓީގެ އެތެރޭގައި ވަކި ސިޔާސީ ހަރަކާތެއް ހިންގުމަށް ކަމުގައެވެ.

ނަޝީދު ވިދާޅުވެފައިވަނީ އޭނާ ދެނެވަޑައިގަންނަވާ ހަމައެކަނި ސިޔާސީ ޕާޓީއަކީ އެމްޑީޕީކަމަށާ، އެއީ އުވޭނެ ޕާޓީއެއް ވެސް ނޫންކަމަށާ، ބަލިވާނެ ޕާޓީއެއް ވެސް ނޫންކަމަށް ނަޝީދު ވިދާޅުވިއެވެ. އަދި އެމްޑީޕީގެ ތެރޭގައި ނަޝީދާއި އޭނާއަށް ވަފާތެރި މީހުންނަށް އިންތިޒާމު ވެވޭނެކަމަށާ، އެ ޕާޓީގެ ހިންގާ ގަވާއިދު ވެސް އެކަމަށް ޖާގަދޭކަމަށްވެސް ނަޝީދު ވިދާޅުވިއެވެ.

އަޅުގަނޑު ދެކޭގޮތުގައި އެ ޕާޓީގެ ތެރޭގައި އަޅުގަނޑުމެންނަށް އިންތިޒާމު ވެވޭނެ. އެ ޕާޓީގެ ހިންގާ ގަވާއިދު ވެސް ޖާގަ ދޭނެ. އަދި އެ ޕާޓީގެ ރޫހާއި އެ ޕާޓީގެ އުސޫލުތައް ވެސް މި ކަމަށް ޖާގަ ދޭނެ.

ނަޝީދު ވިދާޅުވިއެވެ.

ޕާޓީގެ އެތެރޭގައި ވަކި ސިޔާސީ ހަރަކާތެއް ހިންގަވަން ނިންމަވާފައިވާކަން ނަޝީދު ހާމަ ކުރައްވާފައިވާއިރު، އެމްޑީޕީގެ ޗެއަރޕާސަން ފައްޔާޒު އިސްމާއިލް ވިދާޅުވެފައިވަނީ އެއީ ޕާޓީގެ އަސާސި ގަވާއިދުން ފުރުސަތު ދޭކަމެއް ނޫންކަމުގައެވެ. އަދި އެފަދަ ހަރަކާތަކަށް ފުރުސަތު ނުދެއްވާނެކަމަށްވެސް އޭނާ ވިދާޅުވެފައި ވެއެވެ.