މިހާރު ކުރިޔަށްދާ އެމްޑީޕީގެ ރިޔާސީ ޕްރައިގެ ވޯޓުގައި، ލިސްޓުގައި ނަން ނެތްމީހުން ވޯޓު ލާފައިވާކަމަށް ބުނެ މާފަންނު ދެކުނު ދާއިރާގެ ވޯޓު ލުންވެސް ހުއްޓުވައިފިއެވެ.

މި ވޯޓު ފޮށީ ހިމެނޭ ސަރަަހައްދުގައި އެމްޑީޕީގެ ދެފެކްޝަނަށް ނިސްބަތްވާ މެމްބަރުން އެބަ ތިއްބެވެ. އަދި މައްސަލަ ހައްލު ނުވެ، މިހާރު ވޯޓުން ވަނީ ހުއްޓުމަކަށް އައިސްފައިކަމަށް ޚަބަރު އޮންލައިނަށް މައުލޫމާތު ދިން މީހަކު ކިޔައި ދީފައި ވެއެވެ.

Voting stopped in maafannu dhekunu due to unregistered people voting. pic.twitter.com/RRiiw2CBHS

— Ehab (@EhabAbdulla81) January 28, 2023

މިއަދު ކުރިޔަށްދާ އެމްޑީޕީގެ ޕްރައިމަރީގެ އިންތިޚާބުގައި، ވޯޓާސް ލިސްޓުގައި ނަން ނެތް ގިނަ ބަޔަކު ވޯޓުލަމުން ދާކަމުގެ ޝަކުވާތައް ވަނީ ގިނަވެފައެވެ.

މިގޮތުން ހޯޑެއްދޫގައިވެސް ވަނީ ވޯޓުލުން ހުއްޓުވާފައެވެ. އަދި ގދ. ގައްދޫގައި، ވޯޓުލާ ސަރަހައްދަށް ބޮޑީ ކެމެރާ ވައްދައިގެން ވޯޓު ލާން ފެށުމުން، އެރަށުގައި ތިބި ނަޝީދުގެ ސަޕޯޓަރުންވަނީ ވޯޓު ކަރުދާސްތައް ވީދާލާއި، ވޯޓު ފޮށިތައް ފުނޑާލާފައެވެ.

ޚަބަރު އޮންލައިނަށް މައުލުމާތު ލިބިފައިވާ ގޮތުގައި ގައްދޫގައި ހަމަ ނުޖެހުން އުފެދުނީ ރައީސް ސާލިހަށް ތާއިދުކުރާ ފަރާތްތަކުން، ލާ ވޯޓުތައް ފޮޓޯ ނެގުމަށް ބޮޑީ ކެމެރާ ވައްދާ ވޯޓު ފޮއްޓަށް ލާ ވޯޓު ފޮޓޯ ނަގަން ފެށުމާއި ގުޅިގެންނެވެ.

އަދި މިމައްސައާއި ގުޅިގެން އުފެދުނު ހަމަނުޖެހުންތައް ހައްލު ނުވުމާއެކު ނަޝީދަށް ތާއީދުކުރާ ފަރާތްތަކުންވަނީ ވޯޓުލާ މަރުކަޒުތެރެއަށް ވަދެގަނެ، މޭޒުތައް ފުނޑާލާ އަދި ވޯޓު ކަރުދާސްތައްވެސް ވީދާ ހަދާލާފައެވެ.

އެހެންނަމަވެސް ފުލުހުންގެ އެހީތެރިކަމާއެކު ފަހުން ވޯޓުލާ މަރުކަޒުން މީހުން ހުސްކޮށްފައިވާކަށް ވަނީ މައުލޫމާތު ލިބިފައެވެ. މައުލުމާތު ލިބެމުންދާ ގޮތުގައި ވޯޓުލުން މިހާރުވަނީ އެރަށުގައި ހުއްޓުމަކަށް އައިސްފައެވެ.

މިއަދު ކުރިޔަށްދާ އެމްޑީޕީގެ ރިޔާސީ ޕްރައިމަރީގައި އެހެން ބައެއް ސަރަހައްދު ތަކުގައިވެސް ވަނީ ހަމަނުޖެހުން ހިނގާ، ވޯޓުލުންވެސް ފަސްކުރަން ޖެހިފައި ވެއެވެ.

މިގޮތުން ވޯޓު ލުން ފެށިގެން ދިޔައިރު އިސްކަންދަރު ސްކޫލުގައި ހުރި ދުވާފަރު/އަލިފުށީ ފޮށީގެ ކައިރީގައިވަނީ ހަމަނުޖެހުންތަކެއް ހިނގާފައެވެ. އަދި ފޮށީގެ ކައިރީގައި އުފެދުނު ހަމަނުޖެހުންތައް ހައްލު ނުވެ، ވޯޓު ލާން ނުފެށި ވަރަށް ބޮޑަށް ލަސްވެގެންވެސް ދިޔައެވެ.