މިހާރު ކުރިޔަށްދާ އެމްޑިޕީގެ ރިޔާސީ ޕްރައިމަރީގެ، ރައީސް ނަޝީދުގެ އެންމެ ފަހުގެ ކެމްޕޭން ހަރަކާތްތައް މާލޭގެ މަގުތަކުގައި ބާއްވައިފިއެވެ. މިގޮތުން މިއަދު ހަވީރު 4:30 ގައި ފެށިގެން ދިޔަ ކެމްޕޭންގެ އެންމެ ފަހުންގެ ހިނގާލުމުގައި އެމްޑީޕީގެ ނަޝީދު ފެކްޝަނަށް ތާއީދުކުރާ ގިނަ އަދަދެއްގެ މެމްބަރުން ބައިވެރި ވެފައިވެއެވެ.
"ފިކުރެއްގެ ދިރުން" މާލޭގެ ކެމްޕޭން ހަރަކާތް ނިންމާލުމަށްޓަކާ އެމްޑީޕީގެ ގިނަ އަދަދެއްގެ މެމްބަރުނާއެކު ބޮޑު ހިގާލުން ނަޝީދު އިސްވެހުރު ފަށާފައިވަނ އެމްޑީޕީގެ ހަރުގެ ކުރިމަތިންނެވެ.
ހިގާލުން ބާއްވާފައިވަނީ މާލޭގެ ބޮޑެތި މަގުތަކުން، "ފިކުރެއްގެ ދިރުން" ކެމްޕޭންގެ ތީމް ލަވަ ޖަހަމުންނެވެ. އެމްޑީޕީގެ އެތައް ސަތޭކަ މެމްބަރުންނާއެކު ހިގާލުން ކުރިޔަށް ދިޔައިރު މަގުތަކަށް އެއްވެ ތިބި އެތައް ބަޔަކު ނަޝީދަށް މަރުހަބާ ކިޔާފައިވެސް ވެއެވެ. މި ހިނގާލުންވެސް ނިންމާލާފައިވަނީ ކުރެއްވުނު ޚާއްސަ ދުއާއަކާއެކުއެވެ.
ހިގާލުމުގައި ނަޝީދު ބައިވެރި ވެފައިވަނީ ވަރުގަދަ ސަލާމަތީ ފިޔަވަޅުތަކާ އެކީކަން ފާހަގަ ކޮށްލެވެއެވެ.
މާލޭގެ ފިޔަވާ ރާއްޖޭގެ އެހެން ރަށްތަކުގައި ނަޝީދުގެ ކެމްޕޭން ހަރަކާތްތައް ނިންމުމުގެ ގޮތުން އެއްވުންތަކެއް މިއަދު ބާއްވާފައިވާކަން އެގިފައެއް ނުވެއެވެ.
މާދަމާ ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭން ދެފަރާތުންވެސް ވަރަށް ވާދަވެރިކޮށް ކޮށްފައި ވާއިރު، ރޭ ދެ ޓީމުންވެސް ވަނީ ކެމްޕޭންގެ ބޮޑު ދެ ޖަލްސާ ބާއްވާފައެވެ.
މިގޮތުން ރައީސް ސާލިހުގެ ކެމްޕޭން ޖަލްސާ އައްޑު އަތޮޅު ހިތަދޫގައި ބާއްވާފައިވާއިރު ނަޝީދުގެ ކެމްޕޭން ޖަލްސާ ބާއްވާފައިވަނީ މާލޭގެ އާރޓިފިޝަލް ބީޗުގައެވެ. މި ދެ ޖަލްސާއަށްވެސް ގިނަ އަދަދެއްގެ ސަޕޯޓަރުން ހާޒިރުވެފައިވާކަން ފާހަގަ ކޮށްލެވެއެވެ.
ރައީސް ޞާލިހުވެސް ރައީސް ނަޝީދުވެސް ވިދާޅުވަމުންދަނީ މިއިންތިޚާބު ބޮޑު ތަފާތަކުން ކާމިޔާބު ކުރްއްވަނެ ކަމުގައެވެ.
އެމްޑީޕީން ބުނެފައިވަނީ މި އިންތިޚާބުގައި 200އަށް ވުރެ ގިނަ ވޯޓު ފޮށި ބެހެއްޓުމަށް ނިންމާފައިވާކަމަށެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާއިރު، އަތޮޅުތެރޭގައި 194 ވޯޓު ފޮށި ބަހައްޓަން އެޕާޓިން ނިންމާފައިވެއެވެ.މި އިންތިޚާބުގައި ވޯޓުލުން ކުރިއަށްދާނީ މާދަމާ ހެނދުނު 9:00 އިން ހަވީރު 5:00 އަށެވެ.
މި އިންތިޚާބުގައި މޮނީޓަރުންގެ މީޑިއާތަކުންވެސް ހަރަކާތްތެރި ވާނެއެވެ. މިގޮތުން ކޮންމެ ވޯޓު ފޮއްޓެއްކައިރި އެއްވަގުތެއްގައި ހަރަކާތްތެރިވެވޭނީ ކޮންމެ ޕްރިންޓް އަދި އޮންލައިން މީޑިއާ އަކުން އެއްބޭފުޅަކަށާއި އަދި ކޮންމެ ޓީވީ ސްޓޭޝަނަކުން 2 މީހަކަށް ކަމަށް އެމްޑޕީން ވަނީ ބުނެފައެވެ.
މިއިންތިޚާބުގައި ވޯޓުލާ އެމްޑީޕީގެ ވޯޓާސް ހިމެނެނީ އެޕާޓީގެ 57،257 މެމްބަރުންނެވެ.
