އެމްޑީޕީގެ ފުރަތަމަ ވެރިކަމުގައި، ރައީސް ނަޝީދުގެ ސަރުކާރުގައި އޭރު އައި ފައިނޭޝަން ކްރައިސިސްއިން އަރައިގަތުމަށް އޭރުގެ ސަރުކާރުން ތަންފީޒުކުރި ސިޔާސަތުތަކަށް އައްޑޫ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ފާޑު ވިދާޅުވެއްޖެއެވެ.

ރޭ އައްޑޫ ސިޓީގައި އޮތް ރައީސް ސާލިހުގެ "އެމްޑީޕީ ކުރިއަށް" ކެމްޕޭންގެ ބޮޑު ޖަލްސާގައި ވާހަކަ ދައްކަވަމުން އަސްލަމް ވިދާޅުވީ އިގްތިސާދީ ދަތިކަމަކީ އެމްޑީޕީގެ ކޮންމެ ސަރުކާރަކަށްވެސް އަންނަ ދަތިކަމެއް ކަމަށާއި، މިގޮތުން 2008 ވަނަ އަހަރުގެ އެމްޑީޕީ ސަރުކާރު ވެރިކަމާ ކުރިމަތި ލީއިރު އޭރު ކުރިމަތި ލާންޖެހުނީ ގްލޯބަލް ފައިނޭންޝަން ކްރައިސިސްއާއި ކަމުގައެވެ.

މިގޮތުން އަސްލަމް ވިދާޅުވީ މި އިގްތިސާދީ ކާރިސާއިން އަރައިގަތުމަށް އޭރު އަޅާންޖެހުނު ފިޔަވަޅުތަކަކީ ކޮންޓްރެކްޓަރީ ފިސްކަލް ޕޮލިސީތަކެއް ކަމަށާއި، އޭރު މަޖުބޫރުވެގެން ދިޔައީ ނުވަތަ އޭރުގެ ސަރުކާރުން ސިޔާސަތު ގާއިމް ކުރީ އެގޮތަށް ކަމަށެވެ.

އަޅުގަޑުމެން މުވައްޒަފުން ވަކި ކުރީ، މުސާރަ ދަށް ކުރީ، އަދި އިދިކޮޅު ފަރާތްތަކުން އެބުނާހެން ހަރު މުދާވެސް ވިއްކަން ޖެހުނީ. ދިރާގުގެ ހިއްސާ، އެމްޑަބްލިއުއެސްސީގެ ހިއްސާ އެގިވަޑައިގަންނަވާނެ.. 25 އަހަރަށް އެއަރޕޯޓުވެސް ކުއްޔަށް ދެވި އެޑްވާންސް ނަަގަން ޖެހުނު. އަޅުގަޑުމެން އެ ވަކިކުރި މުވައްޒަފުން، އެތައް ދުވަހަކަށް މަސައްކަތް ކުރި މުވައްޒިފުން، 17، 18 އަހަަރަށް ވަންދެން ސަރުކާރުގައި ތިބި މުވައްޒިފުން، 6500 ހެން އަޅުގަޑަށް ހީވަނީ މުވަޒަފުން، ވަކިކުރަން މަޖުބޫރުވެގެން ދިޔައީ. އެވެސް އެއް ގޮތް. ދެން ޓެކްސް ތައާފް ކޮށްގެން ދިޔައީ.

ރޭގެ ޖަލްސާގައި ވާހަކަ ދައްކަވަމުން އަސްލަމް ވިދާޅުވިއެވެ. އަސްލަމް ވިދާޅުވި މިސާރުކާރާ ކުރިމަތިވީ އެއަށްވުރެ މާބޮޑު، މުޅި ދުނިޔެ ހުއްޓިގެން ދިޔަ އާލަމީ ވަބާއެއް ކަމަށާއި، އެހެންނަމަވެސް އެންމެ މީހަކުވެސް ވަޒީފާއިން ވަކި ނުކުރާކަމަށާއި، އެންމެ މީހެއްގެ މުސާރަވެސް ކުޑަ ކޮށްފައި ނުވާކަމަށެވެ.

އެންމެ ހަރު މުދަލެއްވެސް ހަމަ ޔަގީނުންވެސް ވިއްކައެއް ނުލައްވާ. ހަރުމުދާ ވިއްކާވާހަކަ، ވިއްކާށޭ ވިއްކާށޭ، ޚަރަދު ކުޑަކުރާށޭ ޕްރޮޖެކްޓްތައް ހުއްޓާލާށޭ. އަޅުގަޑުމެންގެ ކަންފަތުގަ އަބަދުވެސް މަޖިލިސް ތެރެއިންނާއި ހުރިހާ ތަނަކުން އެކިއެކި ބޭފުޅުން.. އެއްވެސް ބޭފުޅެއްގެ ނަން އަޅުގަޑު ގަންނާކަށް ނެތިން. ލޯނުވެސް ނުނަގާށޭ އަވަހަށް ހުއްޓާލާށޭ، ނުވެސް ދައްކާށޭ، ނުވެސް ދައްކާށޭ… މި ހުރިހާ އަޑުތަކެއް. މިއީ ގައުމަކަށް ބޭނުންވާ އަޑުތަކެއް ނޫނޭ.

މަޖިލިސް ރައީސް ނަޝީދުއާއި ނަޝީދުއަށް ތާއީދުކުރާ ފަރާތްތަކަށް ނިސްބަތްކޮށް އަސްލަމް ވިދާޅުވިއެވެ.

އަސްމަލް ވިދާޅުވީ އެއަށްވުރެ މާ ހަރުދަނާކޮށް މިސަރުކާރު ހިންގޭނެ ކަމަށެވެ. އަދި ވިދާޅުވީ ލިބިފައި ހުރީ އެއަށްވުރެ މާ ކެތްތެރި ވިސްނުންތެރި ރައީސެއްކަމުގައެވެ.