މޯލްޑިވްސް ބްރޯޑްކާސްޓިންގ ކޮމިޝަންގައި މިހާރު ތިއްބެވި މެންބަރުންގެ ތެރެއިން މެންބަރެއްގެ މަގާމުގެ މުއްދަތު ހަމަވާތީ، އެ ކޮމިޝަނަށް މެންބަރަކު ޢައްޔަންކުރެއްވުމަށްޓަކައި މެންބަރުކަމުގެ މަގާމަށް ކުރިމަތިލުމުގެ ފުރުޞަތު ރައީސުލްޖުމްހޫރިއްޔާގެ އޮފީހުން މިއަދު ހުޅުވާލައްވައިފިއެވެ.
ރައީސް އޮފީހުން މިއަދު ކުރި އިއުލާނެއްގައި ވިދާޅުވެފައިވަނީ ބްރޯޑްކޮމްގެ މެންބަރުކަމަށް ކުރިމަތިލުމުގެ ފޯމު ބަލައިގަތުމަށް ހަމަޖެހިފައިވަނީ، 2023 ފެބުރުވަރީ 5 އަދި 6 ވަނަ ދުވަހު ހެނދުނު 09:30 އިން މެންދުރު 12:30 އަށް ރައީސުލްޖުމްހޫރިއްޔާގެ އޮފީހުންކަމުގައެވެ.
މި މަޤާމަށް ކުރިމަތިލުމަށް އެދޭ ފޯމު ލިބެން ހުންނާނީ ރައީސުލްޖުމްހޫރިއްޔާގެ އޮފީހުގެ ރިސެޕްޝަނުންނެވެ. އަދި ރައީސުލްޖުމްހޫރިއްޔާގެ އޮފީހުގެ ވެބްސައިޓް އިން ފޯމު ޑައުންލޯޑް ކުރެވެކަމަށްވެސް ރައީސް އޮފީހުން ހާމަ ކޮށްފައިވެއެވެ.
ރައީސް އޮފީހުންވަނީ މިމަހުގެ 12 ވަނަ ދުވަހުވެސް ބްރޯޑްކޮމްގެ މެމްބަރުކަމަށް ކުރިމަތި ލުމަށް ފުރުސަތު ހުޅުވާލާފައެވެ. އެފަހަރު ފުރުސަތު ހުޅުވާލާފައިވަނީ އެކޮމިޝަންގެ ނާއިބު ރައީސްކަމުގައި ހުންނެވި އަހްމަދު ގައިސް އިސްތިއުފާ ދެއްވުމާ ގުޅިގެންނެވެ.
ބްރޯޑްކޮމްގައި މިހާރު ތިއްބެވީ 6 މެމްބަރުންނެވެ. އެ މެމްބަރުންނަކީ:
މަރިޔަމް ވަހީދާ: ކޮމިޝަނުގެ ރައީސް
އަމްޖަދު ވަހީދު: މެމްބަރު
އަލީ ޔޫސުފް: މެމްބަރު
އާމިނަތު އަމީނާ: މެމްބަރު
މުހައްމަދު ފަޒީން: މެމްބަރު
ޝިފްލާ އިބްރާހީމް: މެމްބަރު
