މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގައި، އިދިކޮޅު ޕީޕީއެމްގެ އެކްޓިވިސްޓުން ނަޝީދަށް ކެމްޕޭން ކުރަނިކޮށް ނަގާފައިވާ ގިނަ ފޮޓޯތަކެއް ސޯޝަލް މީޑިއާގައި އާންމު ވެއްޖެއެއެވެ.
މިގޮތުން ރައީސް ސާލިހަށް ތާއީދު ކުރާ ބައެއް ފަރާތްތަކުންވަނީ، އިދިކޮޅު ޕީޕީއެމްގެ މުޒާހިރާތަކުގައިވެސް މިހާރުވެސް ފެންނަމުންދާ ބައެއް މޫނުތައް، ނަޝީދު ރަށްރަށަށް ވަޑައިގަންނަވާއިރު މަރުހަބާ ދެންނެވުމަށް ހަދާ ސަފުތަކުގައި މަރުހަބާ ކިޔާ ސަލާމް ކުރުމަށް ތިބޭ މަންޒަރުތަކާއި އަދި އޭގެ އިތުރުން ބައެއް ރަށްރަށް ނަޝީދު ވަޑައިގެންނެވުމުން ނަޝީދުއާއި ސަލާމްކޮށް އެކީގައި ނަގާފައިވާ ފޮޓޯތައްވެސް ސޯޝަލް މީޑިއާގައި ޝެއަރ ކޮށްފައެވެ.
މިހާރު ކުރިޔަށްދާ، ނަޝީދުގެ "ފިކުރެއްގެ ދިރުން" ކެމްޕޭންގައި، އިދިކޮޅުގެ ޕީޕީއެމްގެ އެކްޓިވިސްޓުން ނަޝީދަށް ތާއީދުކޮށް އަދި މަރުހަބާ ދެއްނެވުމުގައިވެސް ޕީޕީއެމްގެ އެކްޓިިވިސްޓުން ހަރަކާތްތެރި ވަމުންދާކަމުގައި އެމްޑީޕީގެ އިސް ބައެއް ފަރާތްތަކުން މީގެ ކުރިންވެސްވަނީ ތުހުމަތު ކޮށްފައެވެ.
މިގޮތުން އެންމެ ފަހުން، ރައީސް ސާލިހުގެ "އެމްޑީޕީ ކުރިއަށް" ކެމްޕޭނުން މާލޭގައި ބޭއްވި ބޮޑު ޖަލްސާގައި ވާހަކަ ދައްކަވަމުން ޑިފެންސް މިނިސްޓަރ މާރިޔާ ދީދީ ވިދާޅުވެފައިވަނީ ނަޝީދު ރަށްރަށަށް ވަޑައިގަންނަވާއިރު، ޕޯސްޓަރުތައް ތަތްކުރުމާއި ބެނަރތައް ދެމުމުގައި ހަރަކާތްތެރި ވަމުންދަނީ ޕީޕީއެމްގެ އެކްޓިވިސްޓުން ކަމުގައެވެ.
އަދި މާރިޔާ ވިދާޅުވީ އެންމެ ބިރު ހީވަނީ ނަޝީދު އިދިކޮޅު ޕީޕީއެމްއާ ކޯލިޝަން ހައްދަވާފާނެތީ ކަމުގައެވެ.
އޭގެ އިތުރުން މި ހަފްތާގައި އއ. އަތޮޅަށް ކުރެއްވި ކެމްޕޭން ދަތުރުފުޅުގައި އެއަތޮޅު މާޅޮހުގައި ވާހަކަ ދައްކަވަމުން، އިދިކޮޅު ޕީޕީއެމްއިން ނަޝީދަށް ޕްރައިމަރީ ކާމިޔާބު ކޮށްދީ، އެމްޑީޕީއަށް ރިޔާސީ އިންތިޚާބު ކާމިޔާބު ވިޔަ ނުދޭން މަސައްކަތް ކުރަމުންދާކަމަށް ރައީސް ސާލިހުވަނީ ތުހުމަތު ކުރައްވަފައެވެ.
ބައެއް ރަށްރަށުން އެ މަންޒަރު މިހާރު ފެންނަމުންދޭ. ތިބޭފުޅުން ވިސްނަވަން ވާނެ މަގްސަދަކީ ކޮބައިތޯ، އެ ބޭފުޅުން ކުރައްވަނީ ކޮން ކަމެއް ކަން ސާފުކޮށް. އެމްޑީޕީ އަށް ވެރިކަމުގައި ދެމިތިބެ އޮތްކަން އެނގޭތީ އެކަމަށް ހުރަސް އަޅަން އޮތް ކަންތައްތައް އެބޭފުޅުން އެ ކުރައްވަނީ.
އިދިކޮޅު ޕީޕީއެމްއިން އެމަނިކްފާނާއި ދެކޮޅަށް ރަށްރަށުގައި ހިންހަމުންދާ ހަރަކާތްތަކަކީ މިއިންތިޚާބު އެމަނިކްފާނަށް ކާމިޔާބު ކުރެވި، އަދި ރިޔާސީ އިންތިޚާބުވެސް އެމްޑީޕީއަށް ކާމިޔާބު ކުރެވޭނެކަން ޔަގީންވާތީ ހިންގަމުންދާ ހަރަކާތަތަކެއް ކަމަށް މޭރުންކޮށް ވާހަކަ ދައްކަވަމުން ރައީސް ސާލިހު ވިދާޅުވިއެވެ.
މިއީ އެމްޑީޕީގެ މެމްބަރުން ވަރަށް ފުންކޮށް ވިސްނާޖެހޭނެކަމެއް ކަމުގައިވެސް ރައީސް ވިދާޅުވެފައި ވެއެވެ.
