މާލޭގެ މަގުމަތިން، ގުރޫޕަކުން މީހެއްގެ ގަޔަށް ވަޅި ހަރައިފިއެވެ.
ޚަބަރު އޮންލައިނަށް މައުލޫމާތު ލިބިފައިވާ ގޮތުގައި މިހާދިސާ ހިގާފައިވަނީ މިއަދު ހަވީރުގެ ވަގުތެއްގައި، ޢިޔާސުއްދީން ސްކޫލް ކައިރިންނެވެ.
މަންޒަރު ދުށް މީހަކު ޚަބަރު އޮންލައިނަށް މައުލޫމާތު ދިން ގޮތުގައި ތޫނު ހަތިޔާރުން ހަމަލާ ދީފައިވަނީ މަގުމަތީ ކޮޅަށް ހުރި މީހަކަށް، ސައިކަލުތަކެއްގައި، ހެލްމެޓް އަޅައިގެން އައި ހަތަރު މީހެކެވެ. އަދި ވަޅިން ހަމަލާ ދިނުމަށްފަހު އެމީހުން ސައިކަލްތަކުގައި ފިލާފައިވާކަމަށްވެސް މަންޒަރު ދުށްމީހަކު ކިޔައިދީފައި ވެއެވެ.
މިހަމަލާގައި އަނިޔާވި މީހާ ހޮސްޕިޓަލަށް ގެންގޮސްފައިވަނީ އެސަރަހައްދުން ދުއްވަމުންދިޔަ ކާރަކަށް އަރުވައިގެން، އާންމުންގެ އެހީތެރިކަމާއެކުއެވެ. އަނިޔާވި މީހާގެ ހާލު އަދި އޮޅުން ފިލާފައެެއް ނުވެއެވެ. އަދި މިހާދިސާއާއި ގުޅިގެން ފުލުހުންގެ ބަހެއް އަދި ލިބިފައެއް ނުވެއެވެ.
ފަހަކަށް އައިސް މާލެއާއި ހުޅުމާލޭގައި ތޫނު ހަތިޔާރުން މީހުންނަށް ހަމަލާދިނުން އިތުރުވެފައިވާކަން ފާހަކަ ކޮށްލެވެ. ފުލުހުން ބުނަމުންދަނީ މިފަދަ ހުރިހާ ހާދިސާއެއްވެސް ތަހުގީގު ކުރަމުންދާ ކަމުގައެވެ.
