ޑިމޮކްރަސީގައި އެންމެ ބޮޑު އިސްކަމެއް ދޭންޖެހޭނީ މައިނޯރިޓީގެ ހައްގުތައް ހިމާޔަތް ކުރުމަށް: ރައީސް

ޑިމޮކްރަސީއެއްގައި އެންމެ ބޮޑު އިސްކަމެއް ދޭން ޖެހޭނީ މައިނޯރިޓީގެ ހައްގުތައް ހިމާޔަތް ކުރުމަށް ކަމަށާއި، އެހެންކަމުން ވެރިކަން ކުރާންޖެހޭނީ އެންމެން ގުޅިގެން ކަމުގައި ރައީސް ސާލިހު ވިދާޅުވެއްޖެއެވެ.

މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި، އިއްޔެ ހަވީރު ގއ. ވިލިގިއްޔަށް ވަޑައިގެން އެރަށުގެ އެމްޑީޕީއަށް ތާއީދުކުރާ ފަރާތްތަކާ މުޚާތަބުކޮށް ވާހަކަ ދައްކަވަމުން ރައީސް ސާލިހު ވިދާޅުވީ އެމްޑީޕީ ވުޖޫދުވީ އެތައް ބައެއްގެ ބުރަ މަސައްކަތުން ކަމަށާއި، އެއީ އެންމެ މީހެއްގެ އެކަނި މަސައްކަތެއް ނޫން ކަމުގައެވެ.

އަދި ކުރިޔަށްދާ ޕްރައިމަރީއަކީ، ސަރުކާރުން ކުރިޔަށް ގެންދާ ތަރައްގީގެ މަޝްރޫއުތައް ކުރިޔަށް ގެންދިއުމަށްޓަކާ ވަރަށް މުހިންމު ޕްރައިމަރީއެއް ކަމުގައި ވިދާޅުވަމުނ ރައީސް ސާލިހު ވިދާޅުވީ ޕްރައިމަރީގެ އިންތިޚާބުގެ ނަތީޖާ ނިމުންމުން ކުރާންހުރި މަސައްކަތްތައް ނިމުނީއ ނޫން ކަމަށާއި، މިއީ ފެށުމެއް ކަމަށެވެ.

މިގޮތުން، ޕްރައިމަރީގެ އިންތިޚާބު ނިމުމާއެކު، ރާއްޖޭގެ ވެރިކަމަށް މީހަކު ގެނައުމަށްޓަކާ ބާއްވާ ރިޔާސީ އިންތިޚާބަށް އެބައޮތްކަން ފާހަގަ ކުރައްވާ، ހަގީގީ މަސައްކަތަކަށް ވާންވާނީ ރިޔާސީ އިންތިޚާބު ކާމިޔާބުކޮށް، ފަށާފައިވާ މަސައްކަތައް ނިންމާލުން ކަމުގައި ރައީސް ސާލިހު ވިދާޅުވިއެވެ.

ރައީސް ވިދާޅުވީ އެކަން ކުރެވޭނެ ގޮތް ރާއްޖޭގެ ރައްޔިތުންނަށް މިހާރު ސާފުވާނެ ކަމަށާއި، ވެރިކަމަށް އާދެވޭނެ ގޮތް އެމްޑީޕީގެ މެމްބަރުންނަށްވެސް ސާފުވާނެ ކަމުގައެވެ.

2008، 2013، 2018 ގައި ކަން ވެގެންދިޔަ ގޮތް ވަރަށް ސަފުކޮށް މިއޮތީ ފެންނަން. އެއަކަށް، މާބޮޑު ބަދަލެއް ރާއްޖޭގެ ސިޔާސީ މަސްރަހަކަށް ނާދޭ. ގިނަބަޔަކު އެކުލެވޭގޮތަށް ސަރުކާރެއް އެކުލަވާލުން ނޫން ގޮތެއް ނެތް. އެކަން އިރާދަ ކުރެއްވިއްޔާ އަޅުގަޑު މިއަންނަނީ މުޅި ރާއްޖޭގެ ހުރިހާ ރައްޔިތުންނަށް ސާބިތު ކޮށްދެމުން. ތަފާތު ފިކުރުތަކާއެކީގައި އެކުލެވޭ ސަރުކާރެއް ގޮވައިގެން ރައްޔިތުންނަށް ޚިދުމަތް ކުރުމުގަ 4 އަހަރު ހޭދަ ކުރެވިއްޖެ.

ރައީސް ސާލިހު ވިދާޅުވިއެވެ.

އިއްޔެ ހަވީރު ވިލިގިލީގައި ބޭއްވުނު ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ އެންމެން ގޮވައިގެން މަސައްކަތް ކުރާއިރު ބައެއް ފަަހަރަށް ދަތި ކަންކަން ހުންނަ ކަމުގައެވެ. އެހެންނަމަވެސް ޑިމޮކްރަސީއެއްގެ އެންމެ މުހިންމު އަސާސަކީ މައިނޯރިޓީއެއްގެ ހައްގުތައް ހިމާޔަތް ކުރުން ކަމަށްވާތީ، ކުރިޔަށް ވަޑައިގަންނަވަނީ އެމަގުން ކަމުގައިވެސް ރައީސް ވިދާޅުވިއެވެ.

ޑިމޮކްރަސީއެއްގައި އެއްވެސް ރައްޔިތަކު ބާކީއެއް ނުކުރެވޭނެ. އެންމެ ބޮޑު އިސްކަމެއް ދޭންޖެހޭ ކަމަކީ މައިނޯރިޓީގެ ހައްގުތައް ހިމާޔަތް ކުރުން. ބާކީ ކޮށްފައެއް އަޅުގަޑުމެންނަކަށް ނުދެވޭނެ.

ރައީސް ސާލިހު ވިދާޅުވީ އެހެންވީމާ، މި ޕްރައިމަރީގެ ނިންމުން އެމްޑީޕީގެ މެމްބަރުން ނިންމަންވާނީ ވަރަށްބޮޑަށް ވިސްނާފަ ކަމުގައެވެ.

ވިލިގިލީގައި އިއްޔެ ހަވީރު އޮތް ބައްދަލުވުމުގައި ވާހަކަ ދައްކަވަމުން ރައީސް ސާލިހު ވިދާޅުވީ އެމަނިކްފާނު ކުރިޔަށް ވަޑައިގަންނަވާނީ އެމްޑީޕީގެ ހުރިހާ މެމްބަރުނާވެސް އެކު ކަމަށެވެ.

ރައީސް ސާލިހު ވިދާޅުވީ އެމްޑީޕީއަކީ މިއަދު ރާއްޖޭގަ އޮތް އެންމެ ތާއީދު ބޮޑު ޕާޓީއަށް ވެގެންދިޔައީ ވަރަށް ގިނަ ބައެއްގެ މަސައްކަތުން ކަމަށާ އެއިން އެއްވެސް ފަރާތަކާ ދިމާލަށް އެއްޗެއް ބުނެވިގެން ނުވާނެ ކަމުގައެވެ.