އަނދުންގޭ އާއިލާގެ ތާއީދު އޮތީ ރައީސް ޞާލިހަށް ކަމަށާއި، ރައީސް ނަޝީދު މަސައްކަތް ކުރައްވަނީ ކަންކަން އޮޅުވާލައްވަން ކަމުގައި ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) ވިދާޅުވެއްޖެއެވެ.
އޭނާ މިހެން ވިދާޅުވީ ރައީސް ނަޝީދު މިއަދު ހަވީރު އަނދުންގެއަށް ވަޑައިގެން އެގޭގެ މީހުންނާއިއެކު ހަވީރުގެ ސަޔެއްގައި އިންނަވާ ފޮޓޯތަކެއް ސޯޝަލް މީޑިއާގައި ދައުރުވުމާއި ގުޅިގެން ދެކެވުނު ވާހަކަތަކާއި ގުޅިގެން ކުރެއްވި ޓުވީޓެއްގައެވެ.
އޭނާގެ ޓުވީޓުގައި ރޭ ރައީސް ޞާލިހު އެގެއަށް ވަޑައިގެން އަނދުންގޭ މީހުންނާއި ބައްދަލުކުރި ފޮޓޯ ވަނީ ހިއްސާ ކުރައްވާފައެވެ. ފޮޓޯތައް ހިއްސާ ކުރައްވައި ޝަހީމް ވިދާޅުވީ އެއާއިލާގެ ތާއީދު އޮންނާނީ ރައީސް ޞާލިހަށް ކަމަށެވެ. އަދި ރައީސް ނަޝީދަށް އެމްޑީޕީގެ މެމްބަރުންގެ އިތުބާރު ގެއްލިގެންދަނީ ކަންކަން އޮޅުވާލައްވަން މަސައްކަތް ކުރާތީކަމަށް އޭނާ ވިދާޅުވިއެވެ.
އަޅުގަނޑުގެ އާއިލާގެ ތާއީދު އޮތީ ރައީސް ޞާލިހަށް. މިހިރީ ރައީސް ގެޔަށް ވަޑައިގެން ރޭގެ ފޮޓޯތައް. ރައީސް ނަޝީދަށް އެމްޑީޕީ މެމްބަރުންގެ އިތުބާރު ގެއްލެނީ ކަންކަން އޮޅުވާލައްވާތީ.
– ހުސެއިން ޝަހީމް ވިދާޅުވިއެވެ.
Alhugandaa a’aailaa ge thaaeedh othee Raees @ibusolih ah. Miheree Raees geyah vadaigennevi reyge photo thah. Raees @MohamedNasheed ah #MDP Memberun ge ithubaaru gellenee kankan olhuvaalavvaathee. pic.twitter.com/ld8IWMtHsT
— Hussain Shaheem (@AndhunHussain) January 22, 2023
ހުސެއިން ޝަހީމް މިހެން ވިދާޅުވިއިރު، ރައީސް ނަޝީދު އަނދުންގެއަށް ވަޑައިގެންފަހުން އެގޭގެ ތާއީދު ރައީސް ނަޝީދަށް އޮތްކަމަށް ވިދާޅުވެފައިނުވެއެވެ. އެމްޑީޕީގެ ޕްރައިމަރީގައި ރައީސް ނަޝީދު ވާދަކުރައްވައި ކެމްޕެއިންނަށް ތާއީދު ހޯދުމަށް ގެންދަވަނީ މާލެއާއި ރާއްޖޭގެ އެކި ރަށްރަށަށް ވަޑައިގެން ކެމްޕެއިންގެ ހަރަކާތްތައް ހިންގަވަމުންނެވެ. މިއަދު މާލޭގައި ކުރަމުންދާ ކެމްޕެއިންގައި ރައީސް ނަޝީދު ވަނީ އަނދުން ގެއަށް ވަޑައިގެން އެގޭގެ މީހުންނާއިއެކު ހަވީރުގެ ސަޔެއްގައި ބައިވެރިވެ ވަޑައިގެންފައެވެ. މިސައިގައި، އެމަނިކުފާނުގެ ދައުރުގައި ފިނޭންސް މިނިސްޓްރީގެ ސްޓޭޓް މިނިސްޓަރުކަން ކުރެއްވި އަނދުންގޭ އަލީ އާރިފްއާއި އެއާއިލާގެ ގިނަ ބޭފުޅުން ބައިވެރިވެ ވަޑައިގެންނެވިއެވެ.
ރައީސް ނަޝީދު މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވެފައިވަނީ ރައީސް ޞާލިހުގެ ކައިރީގައި މިހާރު ކެމްޕެއިންގައި ތިއްބެވި ގިނަ ބޭފުޅުންވެސް އަދި ގިނަ މަޤާމުތަކުގައި ތިއްބެވި ބޭފުޅުންވެސް އެމަނިކުފާނާއި ގުޅުއްވައި ވޯޓާއިމެދު ކަންބޮޑުނުވުމަށް ދަންނަވާކަމަށެވެ.
ގިނަ ބޭފުޅުންގެ ތާއީދާއި ވޯޓު އެމަނިކުފާކަށް ލިބޭނެކަމުގެ ޔަގީންކަން އޮތްކަމަށް ރައީސް ނަޝީދު ވަނީ ވިދާޅުވެފައެވެ. އަދި މަޖިލީހުގައި ހިމެނޭ ގިނަ މެމްބަރުންވެސް މިވަގުތާއި ހާލަތުގެ ގޮތުން ރައީސްގެ ކެމްޕެއިނުން ފެނުނު ކަމުގައިވީނަމަވެސް ވޯޓު ހަރުފާހުގައި ޖަހާ ފާހަގައާއިމެދު އެއްވެސް ވަރަކަށް ޝައްކު ނުކުރެއްވުމަށް އެބޭފުޅުން ދަންނަަވަމުންދާކަމަށް ރައީސް ނަޝީދު ވިދާޅުވިއެވެ.
