އަންނަ ހޮނިހިރު ދުވަހު ބާއްވާ އެމްޑީޕީގެ ރިޔާސީ ޕްރައިމަރީއާ ގުޅޭ ކަންކަމުގައި އެ ޕާޓީގެ ޗެއާޕާސަން ފައްޔާޒު އިސްމާއިލަށް އިތުބާރު އެބައޮތް ކަމަށް، އެ އިންތިހާބުގައި ވާދަކުރައްވާ އެމްޑީޕީގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.
އިންތިޚާބާއި ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ނަޝީދު ވަނީ ވޯޓްގެ ސައްކަން ކަށްވަރުކުރުމަށް ކުރަންޖެހޭ ބައެއްކަންކަން ވިދާޅުވެފައެވެ. އެގޮތުން ވޯޓްލާން އަންނަ މީހާގެ އައިޑީކާޑާއި ލިސްޓާއި ދިމާވޭތޯ ބެލުމާއި ވޯޓް ނިމުމަށްފަހު ކަރުދާހުގެ އަދަދު ދިމާވޭތޯ ބެލުން ކަހަލަ ކަންކަން ނަޝީދު ވަނީ ފާހަގަކުރައްވާފައެވެ.
ނަޝީދު ވިދާޅުވީ ވޯޓަކީ އެމްޑީޕީ މެމްބަރުންނަށް ވަރަށް ފަރިތަކަމެއްކަމަށާއި އިންސާފުވެރިކަމާއި އެކު ގެންދިއުމަށް ކަންކަން ވަރަށް ރަނގަޅަށް ބެލެހެއްޓިގެންދާނެކަމަށެވެ. ނަޝީދު ވިދާޅުވީ އިންތިޚާބުގެ ކަންކަން އިންސާފުވެރިކަމާއެކު ކުރިއަށް ގެންދިއުމަށް ޕާޓީގެ ޗެއަރޕާސަން ފައްޔާޒުގެ އިންތިޒާމު ކޮމެޓީއަށް އިތުބާރު އެބައޮތް ކަމަށެވެ.
މިކަންކަމަކީ އެމްޑީޕީ މެމްބަރުން ވަރަށް ފަރިތަކަމެއް. އަޅުގަނޑު ދެކޭގޮތުގައި މި ވޯޓު ރަނގަޅަށް ސެކިއުރކޮށް އިންސާފުވެރިކަމާ އެކީ ގެންދިއުމަށް ވޯޓު ރަނގަޅަށް ބެލެހެއްޓިގެންދާނެ. އަޅުގަނޑަށް އިތުބާރު އެބައޮތް ޗެއާޕާސަންގެ މައްޗަށް އަދި އިންތިޒާމު ކޮމިޓީއަށް.
– ނަޝީދު ވިދާޅުވިއެވެ.
ނަޝީދު މިހެން ވިދާޅުވާއިރު އެމަނިކުފާނަށް ތާއީދުކުރާ ފަރާތްތަކުން ދަނީ އިންތިހާބުގެ ސައްހަކަމާއި މެދު ސުވާލު އުފައްދަމުންނެވެ. އިންތިޚާބުގެ ވަގުތު ކުޑަތަންވަމުން އަންނައިރު ދެ ކެންޑިޑޭޓުންގެ ކެޕްމެއިން ޓީމުތަކުން ގެންދަނީ އެއްބަޔަކު އަނެއް ބަޔަކަށް ބަހުގެ ހަމަލާތައް ދެމުންނެވެ.
މީގެ ކުރިން ބޭއްވެވި ޖަލްސާއެއްގައި ނަޝީދު ވިދާޅުވީ ދަފްތަރުން 39،000 މެމްބަރުން ވަކިކުރުމަކީ ވަރަށް ބޮޑު ކަންބޮޑުވުމެއް ކަމަށެވެ. އެ ޕާޓީގެ މެމްބަރުން ދަފްތަރުން ވަކިކޮށް، އެހެން ޕާޓީތަކަށް ވައްދާފައިވާ ކަމަށާއި އެއީ ހަދާފައިވާ ވަރަށް ބޮޑު "ވަގެއް" ކަމަށް އެ މަނިކުފާނު ތުހުމަތުކުރެއްވިއެވެ.
