2021ވަނަ އަހަރުގެ މޭމަހުގެ 6 ވަނަ ދުވަހު ރައްޔިތުންގެ މަޖިލިހުގެ ރައީސް މުހައްމަދު ނަޝީދަށް އަމާޒުކޮށް ދެވުނު ޓެރަރިސްޓް ހަމަލާއަކީ ސަރުކާރުގެ ފަރުވާކުޑަކަމާ އަޅާނުލުމުގެ ނަތީޖާ ކަމުގައި ރައްޔިތުންގެ މަޖިލިހުގެ ހެންވޭރު ހުޅަނގު ދައިރާގެ މެމްބަރު ހަސަން ލަތީފު ވިދާޅުވެއްޖެއެވެ.
އޭނާ މިއަދު ކުރެއްވި ޓުވީޓެއްގައި ވިދާޅުވެފައިވަނީ އެންމެ އިސްކަންދެނީ ރައްޔިތުންގެ އަމާންކަމަށޭ ރައީސް ސޯލިހު ވިދާޅުވާއިރު މާލޭ މަޖީދީމަގުގައި ބޮމެއް ގޮއްވާލައި ނަޝީދު މަރާލަން އުޅޭ ކަމުގެ އެތައް ބައިވަރު މައުލޫމާތެއް ލިބި ތިބެމެ އެކަން ސަރުކާރަށް ހުއްޓުވުނު ކަމަކަށް ނުވި ކަމަށެވެ. އެހެންނަމަވެސް އެއީ ކޮން ބޭފުޅަކަށް ލިބުނު ކޮން މައުލޫމާތެއްގެ ވާހަކަކަމެއް އޭނާ ވިދާޅުވެފައެއް ނުވެއެވެ.
އެންމެ އިސްކަންދެނީ ރައްޔިތުންގެ އަމާންކަމަށޭ ރ.ސޯލިހް ވިދާޅުވާއިރު މާލޭ މަޖީދީމަގުގައި ބޮމެއް ގޮއްވާލައި ރ.ނަޝީދު މަރާލަން އުޅޭ ކަމުގެ އެތައް ބައިވަރު މައުލޫމާތެއް ލިބި ތިބެމެ އެކަން ހުއްޓުވުނު ކަމަކަށް ނުވި. 6 މެއިގެ ހަމަލާ އަކީ ސަރުކާރުގެ ފަރުވާކުޑަކަމާ އަޅާނުލުމުަގެ ނަތީޖަާ. pic.twitter.com/LzfcW1bz41
— Hassan Latheef🎈 (@HassanLatheef) January 20, 2023
ނަޝީދަށް އަމާޒުކޮށް ދެވުނު ޓެރަރިސްޓު ހަމަލާއަކީ ސަރުކާރުގެ އިހުމާލުން ދެވުނު ހަމަލާއެއްކަމުގައި ހަސަން ލަތީފު ވިދާޅުވެފައިވާއިރު، ނަޝީދަށް ތާއީދުކުރާ ފަރާތްތަކުން މީގެ ކުރިންވެސްވަނީ މި ހަމަލާގެ ޒިންމާ ޒަރުކާރުން އުފުލަންޖެހޭނަކަމަށް ބުނެފައެވެ.
އެހެންނަމަވެސް ސަރުކާރުން ވަނީ ބޭރުގެ ބައެއް ފަރާތްތަކުގެ އެހީތެރިކަމާއެކު މިހަމާލާ ތަހުގީގުކޮށް، އޭގެ ފަހުން މި ހަމަލާ ދިން ބައެއް ފަރާތްތައް މިހާރުވަނީ ޖަލަށްވެސް ލެވިފައެވެ.
މިމައްސަލާގެ ތަހުގީގު ކުރިޔަށް ދާގޮތް ބެލުމަށް ރައީސުލްޖުމްހޫރިއްޔާގެ ޚާއްޞަ މަންދޫބެއްގެ ގޮތުން ޢައްޔަންކުރެއްވިފައިވަނީ އައްބާސް ފާއިޒްއެވެ. އައްބާސް މީގެކުރިން ވިދާޅުވެފައިވަނީ، އޭނާއާ ޙަވާލުކޮށްފައިވާ މަސައްކަތް ކުރުމުގައި ރައީސުލްޖުމްހޫރިއްޔާއާއި، ސަރުކާރުގެ ފުރިހަމަ އެހީތެރިކަމަކާއި އެއްބާރުލުމެއް ލިބިފައިވާ ކަމުގައެވެ.
ނަޝީދަށް އަމާޒުކޮށް ދިން ޓެރަރިސްޓު ހަމަލާއަކީ ސަރުކާރުގެ އިހުމާލުން ދިން ހަމަލާއެއްކަމުގައި ނަޝީދުގެ ގާތް ފަރާތްތަކުން ތުހުމަތު ކުރި ނަމަވެސް، މިހަމަލާ ދިނުމުގައި ސަރުކާރުގެ އިހުމާލެއް އޮތްކަމެއް މިހާތަނަށް ކުރެވުނު އެއްވެސް ތަހުގީގަކުން ހާމަވެފައެއް ނުވެއެވެ.
އަދި އެމްޑީޕީގެ ނަޝީދު ފެކްޝަންއަށް ނިސްބަތްވާ މެމްބަރުން ހިމެނޭގޮތުން މަޖިލީހުގައި ގާއިމްކުރި ޚާއްސަ ކޮމިޓީއަކުންވެސްވަނީ މިމައްސަލަ ދިރާސާކޮށްގައެވެ. މި ކޮމިޓީގެ ދިރާސާ ރިޕޯޓުގައި މިހަމަލާގެ ޒިންމާ ސަރުކާރުން އުފުލާންޖެހޭނެ ކަމަށް ބުނެފައެއް ނުވެއެވެ.
6 މޭގެ ހަމަލާއަށްފަހު މަޖިލިސް ރައީސް ނަޝީދަށް ތާއީދުކުރާ އެތައްބަޔަކު ދިޔައީ، މިހަމަލާގެ ތަހުގީގާ ގުޅޭގިތުން އެތަކެއް ސުވާލުތަކެއް ފުލުހުންނާ މަތި ކުރުވަމުންނެވެ. މީގެތެރޭގައި ހަމަލާގެ އިސްކޮށް ތިބި މީހުން ހޯދިފައި ނުވާކަމުގެ ޝަކުވާއާއި، އަދި ހަމަލާއަށް ފަންޑު ކުރި ފަރާތްތައް ހޯދިފައި ނުވާކަމުގެ ޝަކުވާތަކުގެ އިތުރުންވެސް މިފަދަ އެތަކެއް ޝަކުވާތަކެއް ހިމެނެއެވެ.
