ކުރީގެ އަނިޔާވެރިކަމުގެ ތެރެއަށް ދާން އެކަކުވެސް ބޭނުމެއް ނުވާނެ: ރައީސް

ކުރީގެ އަނިޔާވެރިކަމުގެ ތެރެއަށް ދާން ބޭނުންވާނެ އެއްވެސް މީހަކު ނުހުންނާނެ ކަމަށާއި، އެއަނިޔާވެރިކަމުގެ ތެރެއަށް ނުގޮސް ވާން އޮތް ގޮތަކީ ކުރިޔަށް އޮތް އެމްޑީޕީގެ ރިޔާސީ ޕްރައިމަރީގައި އެމަނިކްފާނަށް ވޯޓުދެއްވުން ކަމުގައި ރައީސް ސާލިހު ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގައި ލ. އަތޮޅަށް ކުރައްވަމުން ގެންދަވާ ދަތުރުފުޅުގައި ލ. ކައްދޫގައި އެމްޑީޕީގެ ގިނަ އަދަދެއްގެ ސަޕޯޓަރުންނާއި ބައްދަލުކޮށް ވާހަކަ ދައްކަވަމުން ރައީސް ސާލިހު ވިދާޅުވީ ރައްޔިތުން އެދިއެދި ތިބީ ހުއްޓިގެން ތިބޭން ނޫން ކަމުގައެވެ. އަދި ދާގޮތަށް ކުރިޔަށް ގޮސް، ތަރައްގީގެ މަސައްކަތްތައް ނިންމާލުމަކީ ރައްޔިތުން ބޭނުންވާ ގޮތް ކަމަށާއި، މި ސަރުކާރު އޮވެއްޖެނަމަ ތަރައްގީ ދެމެހެއްޓޭނެ ކަމުގެ ޔަގީންކަންވެސް ރައްޔިތުން އޮތްކަމުގައިވެސް ރައީސް ސާލިހު ވިދާޅުވިއެވެ.

އަޅުގަނޑަށް ފެނުނު މަންޒަރަކީ ކޮންމެ ރަށަކުންވެސް ބޮޑު ތަފާތަކުން މި އިންތިހާބު އަޅުގަނޑުމެންނަށް ކާމިޔާބު ކުރެވޭނެ ކަން.

ރައީސް ސާލިހު ވިދާޅުވިއެވެ.

އެމްޑީޕީއަށް ތާއީދުކުރާ ގިނަ އަދަދެއްގެ މެމްބަރުނާއި މުޚާތަބުކޮށް ވާހަކަ ދައްކަވަމުން ރައީސް ސާލިހު ވިދާޅުވީ މި ޕްރައިމަރީގައި އެމްޑީޕީގެ މެމްބަރުން ލާ ވޯޓަކީ ކުރިޔަށް އޮތް ރިޔާސީ އިންތިޚާބު ކާމިޔާބު ކުރުމާއި ނުކުރުމާ ދެމެދު ގޮތް ކަނޑަައަޅާދޭ ވޯޓެއް ކަމަށާއި، އަދި އެނބުރި ގޮސް އަނިޔާވެރިކަމާއި ކުރިމަތިލާންވީތޯ ނުވަތަ ތަރައްގީއާއިގެން ކުރިޔަށްދާނީތޯވެސް ނިންމާންޖެހޭ އިންތިޚާބެއް ކަމަށެވެ.

ތިބޭފުޅުން މިޔާ ދޭތެރޭގައި ވިސްނަވާފައި ގޮތެއް ނިންމަވާ، އަޅުގަނޑު ހިތުން ދިވެހި އެއްވެސް ރައްޔިތަކު، އެމްޑީޕީގެ އެއްވެސް މެންބަރަކު އެނބުރި ވޭތުވެދިޔަ 2013 އިން 2018ގައި އަނިޔާވެރިކަމުގެ ތެރެެއަށް ދާކަށެއް ބޭނުމެއް ނުވާނެ.

އެމްޑީޕީގެ ފުރަތަމަ ވެރިކަން ނިމިދިއުމަށްފަހު ޖެހިގެން އަދި ދުވަސްވަރާއި އަދި އޭގެ ފަހުން ރައީސް ޔާމިންގެ ވެރިކަމުގައި ކަން ވެގެންދިޔަ ގޮތުގެ މައްޗަށް ވާހަކަ ދައްކަވަމުން ރައީސް ސާލިހު ވިދާޅުވިއެވެ.

ރައީސް ވިދާޅުވީ ރިޔާސީ އިންތިޚާބު ކާމިޔާބު ކުރެވޭނީ އެމްޑީޕީގެ ދަފްތަރުގައި ނެތް އެތައް މެމްބަރުންގެ ވޯޓުވެސް ހޯދައިގެން ކަމަށާއި، އެއީ ފާއިތުވި ހުރިހާ އިންތިޚާބަކުންވެސް ފެންނާން އޮތް ވަރަށް ބޮޑު ހަގީގަތެއް ކަމުގައެވެ.

މިމަހު 28ގައި ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި ރައީސް ސާލިހު މިހާރު ދަތުރު ކުރައްވަމުން ގެންދަވަނީ ލ. އަތޮޅުގައެވެ. ކެމްޕެންގައި ރައީސް ސާލިހި މިހާރުވަނީ ރ. ބ. ޅ. ހއ. ހދ ށ. ނ. އަތޮޅަށް ޒިޔާރަތް ކުރައްވާފައެވެ.

ރައިސް ސާލިހުއާއި ރިޔާސީ ޕްރައިމަރީގައި ވާދަ ކުރައްވަމުން ގެންދަވާ އެމްޑީޕީގެ ރައީސް ނަޝީދު މިހާރު ދަތުރު ކުރައްވަމުން ގެންދަވަނީ ހުވަދޫ އޮތޮޅުގެ ރަށްތަކަށެވެ.