ކުރިޔަށް އޮތް ދައުރުގެ އެމްޑީޕީގެ މެނިފެސްޓޯގައި ހއ. ދިއްދޫގެ އެއަރޕޯޓުގެ ވާހަކަ ނޯންނާންވީ އެއްވެސް ސަބަބެއް ނެތްކަމުގައި ރައީސް އިބުރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް ސާލިހު މިހެން ވިދާޅުވީ މިހާރު ކުރިޔަށްދާ އެމްޑީޕީގެ ޕްރައިމަރީ ކެމްޕޭންގައި އުތުރުގެ އަތޮޅުތަކަށް ކުރައްވަމުން ގެންދަވާ ދަތުރުފުޅުގައި މިރޭ ހއ. ދިއްދޫގައި ކުރިޔަށްދާ ކެމްޕޭން ޖަލްސާގައި ވާހަކަ ދައްކަވަމުންނެވެ.
މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ ދިއްދޫގެ ރައްޔިތުން އެދެމުންދާ އެންމެ ބޮޑު ދެ ކަމަކީ އެރަށުގެ އެއަރޕޯޓާއި އަދި އެރަށުގެ ބިންހިއްކުމުގެ ވާހަކަ ކަމުގައެވެ. ރައީސް ސާލިހު ވިދާޅުވީ މިހާރު ސަރުކާރުން ވިސްނަމުން ދަނީ، ރާއްޖޭގައި ބިންހިއްކަން މިސަރުކާރުން ވައުދެވެ، މިހާރު ބާކީ ހިއްކަން ޖެހިފއިވާ ހުރިހާ ރަށްތައް ހިއްކުމަށް ރާއްޖެއިން ބޭރުގެ ކުންފުންޏަކާ ހަވާކު ކުރުމަށް ކަމަށާއި އެ މަސައްކަތުގެ ތެރޭގައި ދިއްދޫގެ ބިންވެސް ހިއްކިގެންދާނެ ކަމުގައެވެ. އަދި މިދައުރުގައި އެމަސައްކަތް ފެށިގެންދާނެކަމުގައި ރައީސް ސާލިހު ވިދާޅުވިއެވެ.
އިރާދަކުރެއްވިއްޔާ އަދި ބިން ބޮޑުކުރެވެމުން ދާއިރުގަ ދެންމެ އަބުދުﷲ ވަހީދު އެ އިޝާރާތް ކުރެއްވި ގޮތަށް، އެއަރޕޯޓެއްގެ ވާހަކައަކީ އަޅުގަޑުމެންނަށް ނުދެއްކޭނެ ވާހަކައެއް ނޫން. އަޅުގަޑުމެން އަދި އިރާދަ ކުރެއްވިއްޔާ އަންނާނަން.. މި ޕްރައިމަރީއަށް ފަހުގަ. ރިޔާސީ އިންތިޚާބުގެ ކެމްޕޭންގައި މެނިފެސްޓޯއެއް އެކުލަވާލާނަން. ތިޔަބޭފުޅުންނާއި މަޝްވަރާ ކުރާނަން. އޭގަ މިރަށުގެ އެއަރޕޯޓު ނުހިމަނަންވީ ސަބަބެއް އަޅުގަޑަކަށް ނުފެނޭ.
ރައީސް ސާލިހު ވިދާޅުވިއެވެ.
މީގެ އިތުރުންވެސް ރައީސް ސާލިހުވަނީ ދިއްދޫގައި މިހާރު އަޅަމުންދާ ހައުސިން ޔުނިޓްތަކަށް ދިއްދޫ ރައްޔިތުން އެދެމުންދާ މިންވަރަށް އިތުރު ކޮށްދެއްވާނެކަމަށް ވިދާޅުވެފައެވެ. އަދި ދިއްދޫ ރައްޔިތުން އެދެމުންދާ އައުޓުޑޯ ޖިމްވެސް އެރަށަށް ލިބިގެންދާނެ ކަމުގައިވެސް ރައީސް ސާލިހު ވިދާޅުވިއެވެ.
މިޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، އެމްޑީޕީ ހުއްޓި އޮވެގެން ނުވާނެކަމަށާއި، އެމްޑީޕީ ދާންވާނީ ކުރިޔަށް ކަމުގައެެވެ. އެކަމަށްޓަކާއި މި ޕްރައިމަރީވެސް ކާމިޔާބު ކުރާންޖެހޭ ކަމުގައިވެސް ރައީސް ސާލިހު ވިދާޅުވިއެވެ.
ކުރިޔަށްދާ އެމްޑީޕީގެ ރިޔާސީ ޕްރައިމަރީއަށް ރާއްޖޭގެ އުތުރުގެ ބައެއް ރަށްތަކަށް ކުރައްވާ ދަތުރުފުޅެއް ރައީސް ސާލިހު ފައްޓަވާފައިވަނީ މިއަދުއެވެ.
ރައީސްގެ މި ދަތުރުފުޅުގައި ހއ. އަތޮޅު، ހދ. އަތޮޅު، އަދި ށ. އަތޮޅުގެ ގިނަ ރަށްތަކަކަށް ވަޑައިގަންނަވާ ގޮތަށް ވަނީ ހަމަޖެހިފައެވެ. ރައީސްގެ މި ދަތުރުފުޅުގައި ހދ. ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއުގެ މަސައްކަތް ފައްޓަވާ ދެއްވާ ގޮތަށް ވަނީ ހަމަޖެހިފައެވެ.
މައުލޫމާތު ލިބިފައިވާ ގޮތުގައި މި މަޝްރޫޢު ފެށުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މާދަމާއެވެ. އަދި މި ރަސްމިއްޔާތުގައި އިންޑިއާގެ ފޮރިން ސެކެޓްރީ ޖައިޝަންކަރު ބައިވެރިވެވަޑައިގަތުމަށް ހަމަޖެހިފައިވާކަމަށްވެސް ވަނީ މައުލޫމާތު ލިބިފައެވެ.
ރައީސް ސާލިހުވަނީ ވަނީ ކެމްޕޭން ދަތުރުތަކުގައި ރ، ނ، ޅ އަދި ބ. އަތޮޅަށް ވަޑައިގެންފައެވެ.
ކޮމެންޓު ފޮނުވާ