އައްޑޫ ސިޓީއަށް ކުރެއް ޕްރައިމަރީ ކެމްޕޭން ދަތުރުފުޅު ނިންމަވާލެއްވުމަށްފަހު ރައީސް އިބުރާހިމް މުހައްމަދު ސާލިހު ފުރާވަޑައިގެންފިއެވެ. އައްޑޫގެ ހުރިހާ ދާއިރާއެއްގައިވެސް ކެމްޕޭން ކުރެއްވުމަށްފަހު ރައީސް މާލެ ވަޑައިގަތުމަށް ފުރާވަޑައިގެންފައިވަނީ މިރޭ އިރާކޮޅުގެ ވަގުތެއްގައެވެ.
މިމަހު 28ގައި ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީއަށް ކެމްޕޭން ކުރެއްވުމަށް ރައީސް ސާލިހު އަށްޑުއަށް ވަޑައިގަތީ މިމަހުގެ 14 ވަނަ ދުވަހުއެވެ.
މިގޮތުން އައްޑޫ ސިޓީގައި އެންމެ ފުރަތަމަ ރައީސް ސާލިހުވަނީ އައްޑޫ ސިޓީ ފޭދޫގައި ކެމްޕޭން އެއްވުމެއް ބާއްވާފައެވެ. އެއަށްފަހު އެ ސިޓީގެ ދާއިރާތަކުގެ ކެމްޕޭން ޓީމްތަކާއި ބައްދަލު ކުރައްވާ، ރައީސް ސާލިހުވަނީ ދޮރުން ދޮރަށް ހިންގަވާފައެވެ.
މިދަތުރުފުޅުގައި ރައީސް ވަނީ އައްޑޫގެ ތަރައްގީއާއި ގުޅުންހުރި ގިނަ ވައުދުތަކެއްވެސް ވެވަޑައިގެންފައެެވެ. އޭގެތެރޭގައި އައްޑު އަތޮޅު ޝަންގްރިއްލާ ރިސޯޓު އަލުން ހިންގަން ފެށުމަށް ސަރުކާރުން ގޮތްތަކެއް ހޯއްދަވާފައިވާކަމަށް ރައީސް ވިދާޅުވިއެވެ. އަދި އޭގެ އިތުރުން އައްޑޫ އެއަރޕޯޓު ތަރައްގީ ކުރުމަށް މިމަހު ބަޔަކާއި ހަވާލު ކުރެވޭނެކަމަށްވެސް ރައީސް ސާލިހު ވިދާޅުވިއެވެ.
ރައީސްގެ އައްޑޫ ދަތުރުފުޅުގައިވަނީ ފޭދޫ ސްކޫލްގެ 50 ވަނަ އަހަރީ ދުވަހުގެ ރަސްމިއްޔާތު ޝަރަފްވެރި ކުރެއްވުމުގެ އިތުރުން، ފުލުހުންގެ އެކަޑަމީ ނުވަތަ ނެޝަނަލް ކޮލެޖް އޮފް ޕޮލިސިން އެންޑު ލޯ އެންފޯސްމަންޓުގެ 34ވަނަ ޕޮލިސް އިނިޝިއަލް ޓްރެއިނިން ކޯހުގެ ދަސްވެނިމުގެ ރަސްމިއްޔާތުގައި ވެސް ބައިވެރިވެވަޑައިގެންފައެވެ.
