ބ. ތުޅާދޫގައި އެއަރޕޯޓެއް އެޅުމަށް ކުރިޔަށް އޮތް ތިން ހަފްތާ ތެރޭގައި ބަޔަކާއި ހަވާލުކުރޭނޭ ކަމުގައި ރައީސް އިބުރާހިމް މުހައްމަދު ސާލިހު ވިދާޅުވެއްޖެއެވެ.
ކުރިޔަށް އޮތް އެމްޑީޕީގެ ރިޔާސީ ޕްރައިމަރީއަށް ކެމްޕޭން ކުރެއްވުމަށް، މިހާރު ބ. އަތޮޅަށް ކުރައްވަމުން ގެންދަވާ ދަތުރުފުޅުގައި ބ. އޭދަފުށީގައި އެމްޑީޕީގެ މެމްބަރުންނާއި ބައްދަލުކުރައްވާ ވާހަކަ ދައްކަވަމުން ރައީސް ސާލިހު ވިދާޅުވީ ސަރުކާރުން އަމާޒު ކުރާނީ މިއަހަރު ނިމެންވާއިރަށް އެއަރޕޯޓު ބޭނުންކުރަން ފެށޭވަރު ކުރުމަށް ކަމުގައެވެ.
އިރާދަކުރެއްވިއްޔާ ކުރިއަށް މިއޮތް ދެތިން ހަފްތާ ތެރޭ އަޅުގަނޑުމެން އެކަން ކުރުމަށްޓަކާ ބަޔަކާ ހަވާލުކުރެވޭނެ ކަމުގެ ޔަގީންކަން މިއަދު އަރުވަން.
އޭދަފުށީގެ އެމްޑީޕީގެ މެމްބަރުންނާއި ބައްދަލުކުރައްވާ ރައީސް ސާލިހު ވިދާޅުވިއެވެ.
އަދި ރައީސް ސާލިހު ވިދާޅުވީ އެއަރޕޯޓު އެޅުމަށް ބޭނުންވާ ބިން ހިއްކާ ނިންމާ އިމާރާތްކުރުމުގެ މަސައްކަތްވެސް ވަރަށް އަވަހަށް ފައްޓަވާނެ ކަމުގައެވެ.
ބ. އަތޮޅުގައި އެންމެ އެއަރޕޯޓެއް އޮންނައިރު، ބ. އަތޮޅުގައި އިތުރު އެއަރޕޯޓެއް އެޅުމަށް ރައީސް ސާލިހު ވައުދުވެ ވަޑައިގަތީ 2018ގެ ރިޔާސީ އިންތިޚާބުގައެވެ. ބ. އަތޮޅުގައި އެއަރޕޯޓެއް އޮންނަނީ ދަރަވަންދޫގައެވެ.
