މާލޭގެ ރައްޔިތުންނަށް މި ސަރުކާރުން ދޭން ވަޢުދުވެފައިވާ ގޯތިތައް ދިނުން ލަސްވާއިރު، އެމްޑީޕީގެ ރިޔާސީ ޕްރައިމަރީއާއި ގުޅިގެން ކެމްޕެއިންގައި ބައެއް މެމްބަރުން ގޯތިދޭ ލިސްޓެއް ހިފައިގެން ކެމްޕެއިން ކުރަމުންދާކަމުގެ ކަންބޮޑުވުން މާލެ ސިޓީގެ ކުރީގެ މޭޔަރު ސިފާ މުހަައްމަދު ފާޅުކުރައްވައިފިއެވެ.

ސިފާއަކީ އެމްޑީޕީ ޕްރައިމަރީގައި ރައީސް ނަޝީދަށް ތާއީދުކުރާ ބޭފުޅެކެވެ. މާލޭގެ ރައްޔިތުންނަށް މި ސަރުކާރުން ދޭން ވަޢުދުވެފައިވާ 5000 ގޯތި ކަނޑާ، އިން ވަކިކޮށް މިއަހަރުގެ މެދުތެރޭގައި ޙަވާލުކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވަނީ ކެމްޕެއިންގައި ނ.ވެލިދޫގައި ބޭއްވި ޖަލްސާގައި ވިދާޅުވެފައެވެ.

މާލޭގެ ރައްޔިތުންނަށް ގޯތި ދިނުމަށް ސަރުކާރުން ވެފައިވާ ވައުދު ނުފުއްދި ލަސްވާތީ މާލެ ތަމްސީލްކުރާ ގިނަ މެމްބަރުންގެ ނުރުހުން ވަނީ ސަރުކާރަށް އަމާޒުވެފައެވެ. ގޯތި ދިނުމާއި ގުޅިގެން ހުރި ކަންބޮޑުވުންތައް ފާޅު ކުރައްވައި ސިފާ ވިދާޅުވީ ގޯތި ދޭން ސަރުކާރުން ނިންމާފައިވާއިރު މިކެމްޕެއިންގައި ވަކި ލިސްޓެއް ހިފައިގެން ބައެއް މެމްބަރުން އުޅޭކަމުގެ ކަންބޮޑުވުން ލިބިފައިވާކަމަށެވެ.

މާލޭ މީހުންނަށް ގޯތި ދިނުމުގެ ކަންކަން ލަސްވާއިރު އާންމު މީހުންގެ ތެރޭގައި މިހާރު ދެކެވޭ ވާހަކައެއް، ބައެއް މެމްބަރުން ލިސްޓެއް ހިފައިގެން ކެމްޕެއިނަށް ނިކުމެ އުޅޭ ޚަބަރު. ބައެއް ފުދުންތެރި ފަރާތްތަކުން ކެމްޕެއިނަށް ފައިސާ ދެމުން ދާކަމަށް އަދި ފައިސާ ނަގަމުންދާކަމަށް.

– މާލޭގެ ކުރީގެ މޭޔަރު ސިފާ ވިދާޅުވިއެވެ.

ނ. ވެލިދޫގައި ބޭއްވި ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، ބޯހިޔާވަހިކަމުގެ ވަޢުދަކީ މި ސަރުކާރުން ވީ އެންމެ ބޮޑު ވަޢުދުކަމަށެވެ. އެ ވަޢުދާއެއްގޮތަށް 16،000 އަށްވުރެ ގިނަ ބޯހިޔާވަހިކަމުގެ މަޝްރޫޢުތައް ރާއްޖޭގެ އެކި ކަންކޮޅުތަކުގައި ކުރިއަށްދާކަމަށް އެމަނިކުފާނު ވިދާޅުވިއެވެ. މީގެ ތެރޭގައި ފްލެޓާއި، ރޯހައުސްތަކާއި، ގޯތި ދިނުމުގެ މަޝްރޫޢުތައް ހިމެނޭކަން އެމަނިކުފާނު ފާހަގަކުރެއްވިއެވެ. ރައީސް ވިދާޅުވީ މާލޭ ސަރަޙައްދުގައި އެކަނިވެސް 8782 ފްލެޓާއި 5000 ގޯތި ދިނުމުގެ އަމަލީ މަސައްކަތް ކުރިއަށްދާކަމަށެވެ.

ރައީސުލްޖުމްހޫރިއްޔާ ވަނީ މި ސަރުކާރުން މާލޭގެ ރައްޔިތުންނަށް ވީ ވަޢުދާ އެއްގޮތަށް 5000 ގޯތި ކަނޑާ، އިން ވަކިކޮށް މިއަހަރުގެ މެދުތެރޭ ޙަވާލުކުރައްވާނެކަމުގެ ޔަޤީންކަން އެ ޖަލްސާގެ ތެރެއިން ދެއްވާފައެވެ.