މާލެއާއި އަތޮޅުތަކުގައި ދާދިފަހުން ހިނގި އަލިފާނުގެ ހާދިސާތަކުގެ ބޮޑު ތަހުގީގެއް މިހާރު ފަށައިފިކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.
ކޮމިޝަނަރ މިހެން ވިދާޅުވީ ރޭގެ ވަގުތެއްގައި މާލޭގެ ނީލަން ފިހާރަ ސަރަޙައްދުގައި ރޯވެ ބޮޑު އަލިފާނުގެ ޙާދިސާއެއް ހިނގާފައިވަނިކޮށް ކުރެއްވި ޓްވީޓެއްގައެވެ. އޭނާ ވިދާޅުވީ މިކަމަށް އާންމުންގެ އެއްބާރުލުން ދިނުމަށް ގޮވާލައްވާކަމަށެވެ.
ފަހަށްއައިސް ގޮތް ނޭނގޭ ގޮތްގޮތަށް މާލެއާއި އަތޮޅުތަކުގެ އެހި ސަރަޙައްދުތަކުގައި އަލިފާނުގެ ޙާދިސާތަކެއް ހިނގާފައިވެއެވެ. މިފަދަ ޙާދިސާތަކާ ބެހޭގޮތުން ކަމާބެހޭ ފަރާތްތަކުން މާބޮޑު މަޢުލޫމާތެއް ހާމައެއް ނުކުރެއެވެ.
A major investigation in to the recent incidences of fire in Male’ & atolls is now launched by @PoliceMv. We call for public support for it. Also, public order officers’ way of handling an elderly woman at the protest last night in Male’ is of concern. Will be looked in to.
— Mohamed Hameed (@M_Hameedh) January 9, 2023
ރޭގެ އަލިފާނުގެ ޙާދިސާއާ ގުޅިގެން އަދިވެސް ސިފައިން އަންނަނީ އަލިފާން ނިއްވުމުގައި ޙަރަކާތްތެރިވަމުންނެވެ. މިހާރު ކޮންމެވެސް ވަރަކަށް އަލިފާންގަނޑު ކޮންޓްރޯލްވެއްޖެކަމަށް ސިފައިން ބުނެއެވެ. އެހެންނަމަވެސް އަދިވެސް މުޅިން ނިއްވައެއް ނުލެވެއެވެ.
ފުލުހުން ބުނީ މާލެ، ނީލަން ފިހާރަ ސަހައްދުގައި އަލިފާން ރޯވުމާ ގުޅިގެން އެމްއެންޑީއެފް އާއި ފުލުހުން ދަނީ ހަރަކާތްތެރިވަމުންކަމަށެވެ. އެ ސަރަހައްދުގައި ދިރިއުޅޭ އާންމުން ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށާއި އާންމުން އެ ސަރަހައްދަށް ނުދިއުމަށް ފުލުހުން އިލްތިމާސްކުރެއެވެ. އަދި އަލިފާނުގެ ހާދިސާއާ ގުޅިގެން ވިލާ ކޮލެޖާއި ސްޓެލްކޯއާ ދެމެދުގެ ގިނަ މަގުތައް އާންމު ދަތުރުފަތުރަށް ވަނީ މިވަގުތު ބަންދު ކޮށްފައެވެ. ދުމުގެ އަސަކުރާ ސަރަހައްދުތަކުގައި ދިރިއުޅޭ މީހުން ދުމުން ރައްކާތެރިވުމުގެ ގޮތުން އެކަށީގެންވާ މާސްކް އެޅުމަށް ފުލުހުން އެދެއެވެ.
