އެމްޑީޕީއަކީ ވަކި މީހެއްގެ އެއްޗެއްކަމަށް ހަދަން ކިތަންމެ މަސައްކަތް ކުރިނަމަވެސް އެކަމެއް ނުވާނެކަމުގައި އެމްޑީޕީގެ ކުރީގެ ޗެއާޕާސަން މޫސާ މަނިކު ވިދާޅުވެއްޖެއެވެ.
އޭނާ މިހެން ވިދާޅުވީ އެމްޑީޕީގެ ޕްރައިމަރީ ކެމްޕެއިންގައި ރ.މީދޫގައި ރޭ ބޭއްވި ރައީސް ޞާލިހުގެ ކެމްޕެއިން ޖަލްސާގައި ވާހަކަ ދައްކަވަމުންނެވެ. މޫސަ ވިދާޅުވީ އެމްޑީޕީއަކީ އެތައްބައެއްގެ ބުރަ މަސައްކަތާއިއެކު އުފެދިފައިވާ ޕާޓީއެއްކަމަށެވެ. މިހާރު އެޕާޓީއަކީ ވަކި މީހެއްގެ އެއްޗަކަށް ހަދައި، ވަކި ސިޔާސަތުތަކެއް އެކަނި ތަންފީޒު ކުރަން އުޅުމަކީ އެމްޑީޕީ މެމްބަރުން ގަބޫލު ކުރާ ކަމެއްނޫންކަމަށެވެ.
މޫސަ ވިދާޅުވީ, އެމްޑީޕީން ވިސްނީ ކުރީ ޒަމާނުގައި ރާއްޖޭގައި އޮތް ރަސްކަމުގެ އުސޫލުތަކާ ވަކިކޮށް, ދައުލަތަށް ލިބޭ އެއްޗަކުން އެންމެން ހިއްސާވެގެން އުޅުން ކަމަށެވެ. އެގޮތުން ބޭރުގެ މާހިރުންގެ ލަފާ ވެސް ހޯއްދެވި ކަމަށް އޭނާ ވިދާޅުވިއެވެ.
އެމްޑީޕީއަކީ ދިވެހިރާއްޖޭގެ ރައްޔިތުންނަށްޓަކައި އަޅުގަނޑުމެން އުފެއްދި ޕާޓީއެއް. މީހެއްގެ އެއްޗެއް ނޫން. އަޅުގަނޑުމެން ހުރިހާ ރައްޔިތުންގެ އެއްޗެއް. ދިވެހި ރާއްޖޭގެ ރައްޔިތުންގެ ތެރެއިން އެމްޑީޕީގެ ފިކުރު ބަލައިގަތް އެންމެންގެ އެއްޗެއް.
– މޫސަ ވިދާޅުވިއެވެ.
މޫސަ ވިދާޅުވީ ރައީސް ސޯލިހަށް ދެވަނަ ދައުރެއް ދީފި ނަމަ، ރައްޔިތުންނަށް ބޭނުންވާ ހުރިހާ ކުރިއެރުމެއް ލިބިގެންދާނެ ކަމަށެވެ. އެމްޑީޕީން އެންމެ ފުރަތަމަ ވައުދުވީ ފެނާއި ނަރުދަމާ ނިޒާމު ގާއިމު ކުރުމާއި މަގުތައް ހެދުމާއި ބަނދަރު ހެދުން ފަދަ ވައުދުތައް ކަމަށާއި އެ ހުރިހާ ވައުދުތަކެއް ފުއްދާފައިވާ ކަމަށް މޫސަ ވިދާޅުވިއެވެ. އަދި މިހާރު ކުރަން ޖެހިފައި ވަނީ "ތަންކޮޅެއް ރަނގަޅުކޮށްލުން" ފަދަ ކުދިކުދި ކަންކަން ކަމަށް އޭނާ ވިދާޅުވިއެވެ.
މޫސަ ވިދާޅުވީ ފުޓްބޯޅައިގައި މެދު ރޮނގު ހުރަސްކުރުމުން "ދެމިލައިފި" ކަމަށް ބުނާ ކަމަށާއި އެފަދައިން ރައީސް ސޯލިހު ވެސް، ސަރުކާރުން ރައްޔިތުންނަށް ވައުދުވި ކަންކަން ފުރިހަމަކޮށްދެއްވައި "ދެމިލާފައިވާ" ކަމަށެވެ. މޫސަ ނުސީދާ ގޮތެއްގައި އެ ޖޯކް ޖެއްސެވީ، އިދިކޮޅު ޕީޕީއެމް/ޕީއެންސީގެ "ފެލާލައިފި" ލަވައަށެވެ.
މޫސާ މަނިކު ވިދާޅުވިގޮތުގައި އޭނާ ރައީސް ސޯލިހާ އެކު އެމްޑީޕީއާ ދެވަނަ ފަހަރަށް ގުޅިވަޑައިގަތީ ހިކުމަތްތެރި މަސައްކަތްތަކަކާއި ހަގީގަތްތަކެއްގެ މައްޗަށް ބިނާކޮށެވެ.
