ޔޫރަޕްގެ ބޮޑު ފަސް ލީގަށް ބަލާއިރު މި ސީޒަންގައި މިހާތަނަށް ބަލި ނުވެ އޮތް ހަމައެކަނި ޓީމު ކަމަށްވާ ނަޕޯލީ 1-0 އިން ބަލިކޮށް އިންޓަ މިލާނުން ލީގުގެ ހަތަރު ވަނަ އަށް ޖެހިލައިފިއެވެ.
މެޗުގެ ތިން ވަނަ މިނެޓުގައި ރޮމެލޫ ލުކާކޫ ހުރަސްކޮށްދިން ބޯޅަ އަކުން އެޑިން ޒެކޯ އަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިފައެވެ. ނަމަވެސް ޒެކޯ ފޮނުވާލި ބޯޅަ ދިޔައީ ގޯލުގެ ދަނޑި މަތިން ބޭރަށެވެ. އޭގެ ފަހުން 25 ވަނަ މިނެޓުގައި ނަޕޯލީގެ އޭރިޔާ ތެރެއިން ޒެކޯ ދިން ބޯޅައެއް ޑާމިއަން ފޮނުވާލި ނަމަވެސް، އެ ބޯޅަ ވެސް ދިޔައީ ގޯލުގެ ހުރަސް ދަނޑި މަތިން ބޭރަށެވެ. މެޗުގައި އިންޓަ އިން ލަނޑު ޖެހުމަށް ކުރި މަސައްކަތް ކާމިޔާބުވީ 56 ވަނަ މިނެޓުގައެވެ. ފެޑެރިކޯ ޑިމާކޯ ހުރަސްކޮށްދިން ބޯޅައެއް ބޮލުން ގޯލަށް ފޮނުވާލައިގެން އިންޓަ އަށް ލީޑު ނަގައިދިނީ ޒެކޯއެވެ.
އިންޓަ މިލާން އަތުން ބަލިވި ނަމަވެސް ނަޕޯލީ އޮތީ އިޓާލިއަން ލީގުގެ ތާވަލްގެ އެއް ވަނަގައި 41 ޕޮއިންޓާ އެކުގައެވެ. ދެ ވަނަގައި 36 ޕޮއިންޓާ އެކު އެންމެ ފަހުގެ ޗެމްޕިއަން އޭސީ މިލާން އޮތްއިރު، ތިން ވަނަގައި އޮތީ 34 ޕޮއިންޓާ އެކު ޔުވެންޓަސްއެވެ. އިންޓަ މިލާނުން ވަނީ ރޭ ލާޒިއޯ ބަލިވުމުގެ ފައިދާ ނަގައި ތާވަލްގެ ތިންވަނަ އަށް ޖެހިލާފައެވެ.
