އެމްޑީޕީއަކީ ކަންކަން ދިމާވީމާ، ދިމާވާ ކޮންމެ ކަމަކާ ރިއެކްޓް ކުރާ ޕާޓީއެއް ނޫންކަމަށާއި، އެމްޑީޕީއަކީ އަބަދުވެސް ހަކުޅި ކުރިއަށް ކުޅޭ ޕާޓީއެއް ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.

ރިޔާސީ ޕްރައިމަރީގައި ރައީސް އިބްރާހިމް މުހައްމަދު ސޯލިހުގެ ކެމްޕެއިން ޓީމުން ބޭއްވި ޖަލްސާގައި މާރިޔާ ވިދާޅުވީ، އެ ޕާޓީގެ ރައީސްގެ މަގާމާއި ރައްޔިތުންގެ މަޖިލީހުގެ ރައީސްގެ މަގާމުގައި ހުންނަވައިގެން ނަޝީދު މި ސަރުކާރާ ދެކޮޅަށް މަސައްކަތްޕުޅު ކުރައްވާތީ މީހުން ސުވާލުކުރާ ކަމަށެވެ. އޭނާއަކީ އެމްޑީޕީގެ "މަންމަ" ކަމަށް ގިނަ ބަޔަކު ދެކޭތީ ނަޝީދު ކުޅުއްވާ އެ މަންޒަރު ބެލުމަކީ ފަސޭހަ ކަމެއް ނޫން ކަމަށް މާރިޔާ ވިދާޅުވިއެވެ.

މާރިޔާ ވިދާޅުވީ ރައީސް ނަޝީދު ކެމްޕެއިންގައި ރައީސް ޞާލިހު ރިއެކްޓް ނުކުރައްވާކަމަށް ވިދާޅުވެ ދެއްކެވި ވާހަތަކަކީ އެއްވެސް އަސްލެއްނެތް ވާހަކަތަކެއް ކަމަށެވެ. އެމްޑީޕީއަކީ އަބަދުވެސް ހަކުޅި ކުރިއަށް ކުޅޭ ކަންކަމުގައި ތެޅިފޮޅި ބަޔަކު ކުރާހާ ކަމަކަށް ރިއެކްޓް ކުރާ ޕާޓީއެއް ނޫންކަމަށް މާރިޔާ ވިދާޅުވިއެވެ.

– މާރިޔާ ވިދާޅުވިއެވެ.

އޭނާ ވިދާޅުވިގޮތުގައި، މި ސަރުކާރު ނެތް ނަމަ އަނެއްކާވެސް ޖެހޭނީ ކުރީގެ ރައީސް ޔާމީންގެ ސަރުކާރުގައި ވެސް ކަން ހުރި ގޮތަށް ނަޝީދު މިނިވަން ކުރަން އެމްޑީޕީން މަގުމަތީގެ ހަރަކާތްތަކުގައި އުޅޭށެވެ. މި ސަރުކާރަށް ނަޝީދު ފާޑު ވިދާޅުވާއިރު، އެއްވެސް ރައްދެއް ނުދެއްވުމަކީ ރައީސް އިބްރާހިމް މުހައްމަދު ސޯލިހުގެ ކެތްތެރިކަން ކަމަށް މާރިޔާ ވިދާޅުވިއެވެ.

މާރިޔާ ވިދާޅުވި ގޮތުގައި އެއް ޕާޓީއަކަށް ވެރިކަން ކުރުމަކީ ރާއްޖޭގައި މިވަގުތު ނުކުރެވޭނެ ކަމެކެވެ. އެހެންވެ، އެކި ފިކުރުގެ ޕާޓީތަކާ ގުޅިގެން ވެރިކަން ކުރެއްވުމަކީ ފަސޭހަ ކަމެއް ނޫން ކަމަށާއި އެކަމަކު ހަތަރު އަހަރު ވަންދެން ކޯލިޝަން ދެމެހެއްޓުމަކީ ރައީސް އިބްރާހިމް މުހައްމަދު ސޯލިހުގެ ގާބިލުކަން ކަމަށް އޭނާ ވިދާޅުވިއެވެ. އެކަމަކު ނަޝީދުގެ ވެރިކަމުގެ ކުރީކޮޅު ވެސް ކެބިނެޓް އިސްތިއުފާ ދިނުން ފަދަ ކަންކަން ކުރަން ޖެހުނު ކަމަށް ވިދާޅުވިއެވެ.

އެމްޑީޕީ ފެށުނީއްސުރެ ދައްކަމުން އަންނަ ވާހަކައަކީ މީހާ ތަރައްގީ ކުރާ ވާހަކަ ކަމަށާއި އެކަން ކުރުމަށް ކުރެވެން ހުރި ހުރިހާ ކަމެއް ކުރަން ޖެހޭ ކަމަށް ވެސް މާރިޔާ ވިދާޅުވިއެވެ. އެމްޑީޕީން ވައުދުވީ އެމީހަކު ދިރިއުޅޭ ރަށެއްގައި ހަމަޖެހިލައިގެން ދިރިއުޅެވޭނެ ގޮތްތައް ހަމަޖައްސައި ދިނުން ކަމަށާއި ޕާޓީގެ ވައުދުތައް ފުއްދުމަށްޓަކައި ރައީސް މަސައްކަތްޕުޅު ކުރައްވަނީ ކުދި، ބޮޑު ރަށްތައް ވެސް ތަރައްގީ ކުރައްވައި އަސާސީ ހިދުމަތްތައް ދެއްވަމުން ކަމަށް މާރިޔާ ވިދާޅުވިއެވެ.