ކޯޓުތަކުން ބަލަމުންދާ 2 މައްސަލައަކާ ގުޅިގެން ދެމީހަކު ހޯދަން ފުލުހުން އިއުލާންކޮށްފިއެވެ.
ހޯދަން އިއުލާންކޮށްފައިވާ ދެ މީހުންގެ ތެރެއިން އެކަކީ ކްރިމިނަލް ކޯޓަށް ހުށަހަޅާފައިވާ މައްސަލައަކާ ގުޅިގެން އެ ކޯޓަށް ހާޒިރު ކުރަން ބޭނުންވެ ހާޒިރު ކުރެވިފައިނުވާ މީހަކު ބަންދުގައި ބަހައްޓައިގެން ކޯޓަށް ހާޒިރު ކޮށްދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން ހޯދަ މީހެކެވެ. އެއީ ކ. މާލެ / ވ. ހުވަފެން، އަލީ ޝަފީޤް (22އ) އެވެ.
ދެން ފުލުހުން ހޯދަމުންދަނީ ފ. ނިލަންދޫ ޕޮލިސް ސްޓޭޝަނަށް ހުށަހެޅި ތަހުގީގު ކުރަމުންދާ މަކަރާއި ހީލަތުން ގިނަ އަދަދެއްގެ ފައިސާ ހޯދާފައިވާ މައްސަލައެއްގެ ތަހުގީގަށް ހާޒިރުކުރުމަށް ބޭނުންވާ މީހެކެވެ. އެއީ ގދ. ތިނަދޫ / ވެސްޓްޕްލޯއިރު، އަޙްމަދު ސަލީމް (41އ)އެވެ. އޭނާ ހޯދަނީ ޖިނާއީ މައްސަލަތައް ތަޙުޤީޤުކުރުމުގައި ފުލުހުން ޢަމަލުކުރާނެ އިޖުރާއަތުގެ ޤަވާއިދުގެ 27 ވަނަ މާއްދާގައި ވާގޮތުގެ މަތިންނެވެ. އަދި އޭނާ ހޯދަން ޢިއުލާންކުރީ އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓް ރައްދުކުރެވިފައިނުވާތީއާއި އާއިލާއަށްވެސް އޅޭ ވަކިތަނެއް އެނގިފައިނުވާތީކަމަށް ފުލުހުން ބުނެއެވެ.
