ހދ. ނޮޅިވަރަން ހިތަށްފިނިވާގެ ނިޝާމާ މުހައްމަދު މަރާލާފައިވަނީ ކަރުގައި އެއްޗެއް އަޅައި ނޭވާ ހާސްކޮށްލައިގެން ކަމަށް ޕޯސްޓްމޯޓަމުން ދައްކާ ކަމަށް ފުލުހުން ހާމަކޮށްފިއެވެ.
ނިޝާމާގެ ޕޯސްޓްމޯޓަމްގެ ވަގުތީ ރިޕޯޓް ލިބިފައިވާ ކަމަށާއި، މި ރިޕޯޓްގައިވާ ގޮތުން ނިޝާމާ މަރާލާފައިވަނީ ނޭވާ ހާސްކޮށްލައިގެން ކަމަށް ފުލުހުންވަނީ ހާމަކޮށްފައެވެ. މީގެ އިތުރުން މިރިޕޯޓާ ގުޅޭ އިތުރު މަޢުލޫމާތު ފުލުހުން ހާމަކޮށްފައި ނުވެއެވެ.
ހދ. ނޮޅިވަރަން ހިތަށްފިނިވާގެ އުމުރުން 28 އަހަރުގެ ނިޝާމާ މުޙައްމަދު މަރުވެފައި އޮއްވާ ފެނުނީ މިމަހުގެ 10 ވަނަ ދުވަހު އޭނާ ދިރިއުޅުނު ގޭގެ ކޮޓަރި ތެރެއިންނެވެ. ނިޝާމާގެ މަރުގައި ޝައްކު ކުރެވޭ ކަންތައްތަކެއް ހުރުމާއި ގުޅިގެން، އެ މައްސަލަ ފުލުހުން ދަނީ ތަޙުޤީގުކުރަމުންނެވެ. އެގޮތުން އިތުރު ތަޙުލީލުތަށް ހެދުމަށް ނިޝާމާގެ ޕޯސްޓްމޯޓަމް ހެދުމަށް ނިންމާ، ހަށިގަނޑު އިންޑިއާއަށް ފޮނުވާފައިވަނީ މިމަހުގެ 21 ވަނަ ދުވަހުއެވެ.
ނިޝާމާގެ ޕޯސްޓްމޯޓަމް ހެދުމަށްފަހު ހަށިގަނޑު މާލެގެނެސްވަނީ ވަޅުލާފައެވެ. ނިޝާމާގެ ޖަނާޒާ އޮތީ ހޮނިހިރު ދުވަހުގެ މަޣުރިބު ނަމާދަށްފަހު އާސަހަރާ މިސްކިތުގައެވެ.
ނިޝާމާގެ މަރުގެ މި މައްސަލައިގައި ފުލުހުން ތުޙުމަތު ކުރަނީ ނިޝާމާގެ ފިރިމީހާ ފައިޞަލް ޢަލީއަށެވެ. މިތުޙުމަތުގައި ފައިޞަލް ޢަލީ ހައްޔަރުކޮށްފައި ހުއްޓާ އަމިއްލައަށް މަރުވާން މަސައްކަތްކުރުމުން، ކުޅުދުއްފުށީ ރީޖަނަލް ހޮސްޕިޓަލުގައި ފަރުވާ ދެމުންދަނިކޮށް މިމަހުގެ 19 ވަނަ ދުވަހު ވަނީ މަރުވެފައެވެ.
