އެމްޑީޕީގެ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް ތާއީދު ކުރެއްވުމަށް ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު އަދި ޖުޑިޝަލް ސާވިސް ކޮމިޝަންގެ ރައީސް ހިސާން ހުސެއިން ނިންމައިފިއެވެ.

ޖުޑީޝަލް ސަރވިސް ކޮމިޝަނަކީ ދިވެހިޖުމްހޫރިއްޔާގެ ޤާނޫނުއަސާސީގެ ދަށުން އެކުލަވާލާފައިވާ މިނިވަން މުސްތަޤިއްލު ޝަޚްޞެކެވެ. ޖޭއެސްސީގެ ރައީސްކަމާއި ހިސާން ހަވާލުވެ ވަޑައިގެންނެވީ ރައީސް ޔާމީންގެ ވެރިކަމަށްފަހު މިސަރުކާރުން ވެރިކަމާއި ހަވާލުވެ ޖޭއެސްސީގެ މެމްބަރުންނަށް ގެނައި ބަދަލުތަކާއި އެކުގައެވެ.

ރައީސް ޞާލިހަށް ތާއީދުކޮށް ހިސާން ކުރެއްވި ޓުވީޓުގައި ވިދާޅުވީ ޤައުމުގެ ހަމަޖެހުމާއި، ސިޔާސީ ހަމަޖެހުމަށްޓަކައިވެސް ރައީސް ޞާލިހަށް އިތުރު ދައުރެއް ދިނުން މުހިންމު ކަމަށެވެ. އަދި ރައީސް ޞާލިހު ވަނީ ޤައުމު ހިންގެވުމުގައި ލީޑާޝިޕް ދައްކަވައި ނަތީޖާ ހާސިލް ކުރައްވާފައިކަމަށް ހިސާން ވިދާޅުވިއެވެ.

ޖޭއެސްސީގެ ރައީސަށް ހުންވައި އަދި މަޤާމުގެ ގޮތުން އަދާކުރައްވަން ޖެހޭ ޒިންމާތަކަށް ބަލާއިރު ހިސާން މިއިންތިޚާބުގައި ބައިވެރިވެ ކެމްޕެއިންގެ ކަންކަމުގައި އުޅުމަކީ ޖުޑީޝަރީގެ މިނިވަންކަމާއިމެދު އިތުރަށް ސުވާލު އުފެދޭ ކަމެއްކަމަށް ގިނަ ބަޔަކު ވަނީ އޭނާގެ ޕޯސްޓަށް ކޮމެންޓްކޮށްފައެވެ. އަދި ބައެއް މީހުން ބުނެފައިވަނީ ޖޭއެސްސީގެ ރައީސަކަށް އިންވައިގެން މިހާރުގެ ރައީސަށް ތާއީދު ކުރުމަކީ މިވަންކަން އޮތް މިންވަރު ހާމަވާ ކަމެއްކަމަށެވެ.

I fully support President @ibusolih for a second term. Our country needs political stability, sustainable policies and strong leadership which President Solih has been able to provide. #Ibu2023 #Heyoverikan pic.twitter.com/jmnlGHElHr

— Hisaan 🎈؟ (@hisaanhussain) December 24, 2022

ރައީސުލްޖުމްހޫރިއްޔާ އިންތިޚާބުގައި ވާދަކުރެއްވުމަށް ފޯމު ހުށަހަޅާފައިވާއިރު، އެމަނިކުފާނުގެ ކެމްޕޭން ހަރަކާތް ވަނީ މިދިޔަ ބުރާސްފަތި ދުވަހުގެ ރޭ ރަސްމީކޮށް ފަށާފައެވެ. އެގޮތުން ކެމްޕޭންގެ ގޮތުގައި ޖަގަހަ ޖަލްސާތައް ފެށިއިރު އެކަމުގައި އިސްކޮށް ހުންނެވީ ރައްޔިތުންގެ މަޖިލީހުގެ ކުރީގެ ނައިބުރައީސް އަދި އެމްޑީޕީ އަލަށް އުފެދިގެން އައިރު އެންމެ އިސް ސަފުގައި ހުންނެވި އެއް ބޭފުޅާކަމުގައިވާ ރީކޯ މޫސާ މަނިކެވެ.

މި އިންތިޚާބުގައި ރައީސް ޞާލިޙުގެ އިތުރުން، ރައްޔިތުންގެ މަޖިލީހުގެ ރައީސް އަދި އެ ޕާޓިގެ ރައީސް މުހައްމަދު ނަޝީދު ވެސް ވާދަކުރައްވާއިރު، އެމަނިކުފާނު ވަނީ މިދިޔަ ބުރާސްފަތި ދުވަހު ފޯމު ހުށަހަޅުއްވާފައެވެ.