ރާއްޖޭގެ ރައްޔިތުނަށް 24 ގަޑިއިރު ކަރަންޓު މި ދެވެނީ ސަރުކާރުގެ ހެޔޮފުޅުކަމުންކަމަށާ، އެއީ ތެލުގެ އަގުބޮޑުވެގެން ގޮސް އަތް ނުފޯރާފަަށަށް ތެޔޮގެ އަގު ގޮސްފައި ވީނަމަވެސް ކަރަންޓުގެ ސިނާއަތަށް އެއްވެސް ކަހަލަ ބުރޫ އެރުމެއް ނެތި ހިދުމަތް ދެމުން ގެންދަނީ ސަރުކާރުގެ ސަބްސިޓީ ދެއްވާތީކަމަށް ސްޓެލްކޯގެ މެނޭޖިން ޑިރެކްޓަރ އަޙްމަދު ޝަރީފް ވިދާޅުވެއްޖެއެވެ.
ޝަރީފް ވިދާޅުވީ ފާއިތުވި 73 އަހަރުގެތެރޭގައި ރައްޔިތުންނަށް ކަރަންޓުގެ ޚިދުމަތް ދިނުމަށް ސްޓެލްކޯއިން ކޮށްފައިވާ މަސައްކަތް އެކި ސަރުކާރުތަކުގައި ކުރިއަރަމުން ތަރައްޤީވަމުން އައިސްފައިވާކަމަށެވެ. އަދި މި މުހިންމު ޚިދުމަތް ދެމެހެއްޓެނިވި ގޮތެއްގައި ދިނުމުގައި އެންމެ މުހިންމު ދައުރެއް އަދާކުރީ ސްޓެލްކޯގެ މުވައްޒަފުންކަން އޭނާ ފާހަގަކުރެއްވިއެވެ.
މުވައްޒަފުންނަށް ޝުކުރު އަދާކުރައްވަމުން ޝަރީފް ވަނީ މުވައްޒަފުންގެ ކުރިއެރުމާއި ޢިނާޔަތަށް ކުރެވިފައި މުހިންމު ބައެއް ކަންކަމަށް އަލިއަޅުއްވާލައްވާފައެވެ. އެގޮތުން މުވައްޒަފުންނަށް ހިންގާފައިވާ އެންމެ ކާމިޔާބު ޕްރޮގްރާމަކީ ހައުސިން ސްކީމްކަން އޭނާ ފާހަގަކުރެއްވިއެވެ. އެގޮތުން 360 އާއިލާއަށް ވަނީ ބޯހިޔާވަހިކަން ފޯރުކޮށްދީފައިވާކަމަށާ، އެ ފްލެޓްތަކަށް ފައިސާ ދައްކަން ޖެހޭ އަހަރު ސްޓެލްކޯ ބޯޑުން މިހާރު ވަނީ 25 އަހަރަށް ބަދަލުކޮށްފައިކަން ޝަރީފް ފާހަގަކުރެއްވިއެވެ. އަދި މުވައްޒަފުން މަހަކު ދައްކާ ފައިސާގެ އަދަދު ވެސް ދަށްކޮށްފައިވާކަން ޝަރީފް ފާހަގަކުރެއްވިއެވެ.
