ހދ. ނޮޅިވަރަމުގައި މަރުވެފައި އޮއްވާ ފެނުނު ނިޝާމާ މުހައްމަދު މަރާލި ކަމަށް ތުހުމަތު ކުރެވޭ އޭނާގެ ފިރިމީހާ, އަބޫބަކުރު ފައިސަލް (32އ) އަމިއްލައަށް ދަންޖެހި މަރުވާން ކުރި މަސައްކަތުގައި ހާލު ސީރިއަސްވެ ފަރުވާ ދެމުންދާއިރު އޭނާގެ ހާލު އަދިވެސް ކްރިޓިކަލް ކަމަށް ކުޅުދުއްފުށީ ރީޖަނަލް ހޮސްޕިޓަލުން ބުނެފިއެވެ.
ފައިސަލްގެ ހާލު ދަށްވެ ވެންޓިލޭޓަރުގައި ފަރުވާދެމުން އަންނަތާ މިއަދަށް ފަސް ދުވަސް ވެފައިވާއިރު، ކުޅުދުއްފުށީ ރީޖަނަލް ހޮސްޕިޓަލުގެ އޮފިޝަލަކު ބުނެފައިވަނީ އޭނާގެ ހާލު އަދިވެސް ރަނގަޅު ނުވާކަމަށެވެ. މިހާރުވެސް ފައިސަލްއަށް ފަރުވާދެމުންދަނީ ވެންޓިލޭޓަރުގެ އެހީގައެވެ.
ފައިސަލް އަމިއްލައަށް ފުލުހުންނާ ހަވާލުވީ އޭނާގެ އަންހެނުން ހދ. ނޮޅިވަރަމް, ހިތަށްފިނިވާގޭ ނިޝާމާ މުހައްމަދު 28އ، މަރުވެފައި އޮތްވާ ފެނިގެން، ނިޝާމާ މަރާލި ކަމުގެ ތުހުމަތު ފައިސަލް ކުރި ހިސާބުންނެވެ. މި މަހުގެ 10 ވަނަ ދުވަހު ނިޝާމާގެ ހަށިގަނޑު ފެނުނު އިރު ފައިސަލް ހުރީ ޑޮކްޓަރަށް ދައްކަން ކަމަށް ބުނެ އެ އަތޮޅު ކުޅުދުއްފުށީގައެވެ. އޭނާ ހަވާލުވެފައިވަނީ ކުޅުދުއްފުށީ ޕޮލިސް ސްޓޭޝަނާއެވެ.
ނިޝާމާގެ މަރުގެ މައްސަލައިގައި އޭނާގެ ފިރިމީހާ ފައިސަލް ހައްޔަރު ކުރީ މިދިޔަ ހޮނިހިރު ދުވަހުގެ ރެއެވެ. އެ މައްސަލަ ތަހުގީގު ކުރަން ފުލުހުންގެ ޓީމެއް ވެސް ނޮޅިވަރަމްގައި ހަރަކާތްތެރިވެއެވެ.
އާއިލާ އިން ތުހުމަތު ކުރާ ގޮތުގައި ނިޝާމާ މަރާލީ ފައިސަލްއެވެ. އާއިލާ އިން ބުނި ގޮތުގައި ދެ މީހުންގެ ދެމެދު ޒުވާބު ކުރުމާއި މާރާމާރީ ހިންގުން ފަދަ ކަންކަން ހިނގައެވެ. އަދި ނިޝާމާގެ އެންމެ ފަހު ވަގުތުކޮޅު، އޭނާއާ އެންމެ ކައިރީގައި ހުރީ ފައިސަލް ކަމަށް ބުނެފައިވެއެވެ. އެ ކަން ހިނގުމާއެކު، ފިރިމީހާ ރަށުން ފުރައިގެން ހދ. ކުޅުދުއްފުއްޓަށް ދިއުމަކީ ވެސް އާއިލާ އިން ފައިސަލް އާ މެދުގައި ކުރާ ޝައްކުތައް އިތުރަށް ބޮޑުވި ކަމެކެވެ.
