"ވައްކަން" އޮތީ މެކުހުގައިކަމުން އެމްޑީޕީގެލީޑަރުންނަށް އިތުބާރެއްނެތް ކަމުގައި ނޭޝަނަލް ޓެންޑަރ ބޯޑުގެ ކުރީގެ ޗެއަރމަން އިސްމާއީލް ޒަރިޔަންދު ވިދާޅުވެއްޖެއެވެ.
ޒަރިޔަންދު މިހެން ވިދާޅުވީ ކުރިއަށް އޮތް ރިޔާސީ އިންތިޚާބުގައި އެމްޑީޕީއަށް ވެރިކަން ހޯދުމުގެ މުހިންމު ކަމާއި ގުޅޭގޮތުން ފޭދޫ ދާއިރާގެ މެމްބަރު މުހައްމަދު ނިހާދު ކުރެއްވި ޓުވީޓަކަށް ރައްދު ދެއްވައި ކުރި ޓުވީޓެއްގައެވެ.
ނިހާދު ވިދާޅުވެފައިވަނީ އެމްޑީޕީގެ ތެރޭގައި އުފެދިފައިވާ ޚިޔާލުތަފާތު ވުންތަކާއިއެކު ރައީސް ނަޝީދާއި ރައީސް ޞާލިހުގެ ފެކްޝަންގެ ވާދަވެރިކަން ބޮޑުވެފައިވާ ދަނޑިވަޅެއްގައެވެ. އަންނަ އަހަރު ބާއްވާ ރިޔާސީ އިންތިޚާބަށްވެސް އެމްޑީޕީއަށް ކެނޑިޑޭޓެއް ނުދެއްކިގެން އުޅޭ މައިގަނޑު ސަބަބަކީވެސް ދެރައީސުންގެ ތެރޭގައި އޮތް ޚިޔާލު ތަފާތުވުމެވެ.
މެމްބަރު ނިހާދު ވިދާޅުވީ އެމްޑީޕީގެ އާންމު މެމްބަރުން ޕީޕީއެމްއަށް ވެރިކަން ލިބެން ނޭދޭކަމަށެވެ. ޕީޕީއެމްއަށް ވެރިކަން ލިބިއްޖެނަމަ ކަންކަން ވެގެންދާނެ ގޮތް އެމްޑީޕީގެ އާންމު މެމްބަރުންނަށް ސާފުވާކަމަށް ނިހާދު ވިދާޅުވިއެވެ. ކޯލިޝަން ވެރިކަމެއް ކަމުގައި ވީނަމަވެސް އެމްޑީޕީން ދަމަހައްޓަން ބޭނުންވާ ކަމަކީ ޕީޕީއެމްއަށް ވެރިކަން ނުލިބޭނެ ގޮތެއް ހޯދުންކަމަށާއި، ޕީޕީެމްއަށް ވެރިކަން ލިބިއްޖެނަމަ ސަލާމަތެއް ނުވާނެކަމަށް ނިހާދު ވިދާޅުވިއެވެ.
ނިހާދުގެ ވާހަކަތަކަށް ރައްދު ދެއްވައި ޒަރިޔަންދު ވިދާޅުވީ ޤާނޫނު އަސާސީގެ ދަށުން މިނިވަން އިންތިޚާބެއް 2008 ވަނަ އަހަރު ހޯދުމަށްފަހު މިހާތަނަށް އެކި ވަރިކަންތަކުގައި ފެނިގެން ގޮސްފައިވަނީ މަކަރުވެރި ގޮތަކަށް ވެރިކަން ކުރިތަން ކަމަށެވެ. އޭގެ 10 އަހަރުފަހުން މިކަންކަން ބަދަލު ކުރުމަށް ލިބުނު ފުރުސަތުގައި މިފެންގެން ދިޔައީ ވައްކަން އިންތިހާއަށް އިތުރުވެ އެމްޑީޕީގެ ފަލްސަފާއި މުޅިން ދެކޮޅަށް ކަންކަން ވާތަންކަމުގައެވެ.
2008ގެ ޤާނޫނު އަސާސީއިން ލިބުނީ"ވޯޓުލުމުގެ މިނިވަންކަން"، އެހެން ހުރިހާ ބާރާއި ޙައްޤެއް އޮތީ ކެހިވެރިގޮތަކަށް ވެރިކަން ހިންގާފަރާތަށް، އޭގެ 10 އަހަރުފަހުން އުންމީދެއްލިބުނީ -އެމްޑީޕީ- ވީ ވަޢުދުތަކުން، ނަމަވެސް "ވައްކަން" އޮތީ މެކުހުގައިކަމުން އެމްޑީޕީގެލީޑަރުންނަށް އިތުބާރެއްނެތް.
– ޒަރިޔަންދު ވިދާޅުވިއެވެ.
އެމްޑީޕީގެ ޕްރައިމަރީ ބާއްވާނެ ތާރީހެއް މިހާތަނަށްވެސް ދެއްކިފައި ނުވާއިރު، އިިދިކޮޅު ޕީޕީއެމްއިން ރިޔާސީ އިންތިޚާބުގައި ނެރުމަށް ހަމަޖެހިފައިވާ ކެނޑިޑޭޓަކީ ކުރީގެ ރައީސް ޔާމީންކަމަށް ވަނީ ނިންމާފައެވެ. އަދި ޕީޕީއެމްއިން ވަނީ މިނިންމުން ނިންމުމަށްފަހު ރައީސް ޔާމީނާއިއެކީ ރިޔާސީ ކެމްޕެއިންވެސް ކުރަމުންނެވެ.
އެމްޑީޕީގެ ތެރޭގައި އޮތް ޚިޔާލު ތަފާތުވުންތަކާއިއެކު އެޕާޓީއަށް ވެރިކަން ލިބިދާނެކަމާއިމެދު އެމްޑީޕީގެ ބައެއް މެމްބަރުންގެ ހިތުގައިވެސް ވަނީ ސުވާލު އުފެދިފައެވެ.
